¹ Samuae anyian udoh Aku gato'ot ka'kau supayo kau ano tagoncok. ² Ne'ido ma'o yuruho kau dari ampat ka sinagoge. Bahkan, waktue ma'o sampe sasungguhe satiap urok'ng nang munuh kau pasti bapikir iolah ne'ido cakahan babakti ka Allah. ³ Ba, jukut-jukut ang'koo ma'o ne'ido lakuot karano ne'ido ano ganali Bapo atougo Aku. ⁴ Tapi ko'o, samuae anyian udoh Aku gato'ot ka'kau supayo apabilo waktue atok, kau ingat sasungguhe Aku udoh gato'otio ka'kau. Lantas, jukut-jukut anyian ano Aku kato'ot ka'kau pado awale kareno Aku masih ba'kau. Pakarajo'ot Roh Kudus ⁵ Tapi ko'o, kanio Aku ma'o ampuso ka Io nang gutus Aku, ba ano seko urok'ng pun dari kau nang na'yai Aku, 'Ka mae Kito ma'o ampuso?' ⁶ Tapi, kareno Aku udoh gato'ot samuae anyian ka'kau, atinyu baisi kasadihot. ⁷ Tapi ko'o, Aku padohot kabanarot ka'kau: labih baik baginyu kade Aku ampus karano kade Aku ano ampus, panolong ang'koo pasti ano atok'ko ka'kau; tapi kade Aku ampus, Aku ma'o gutuso-Io ka'kau. ⁸ Lantas, takallo panolong ang'koo atok, Io ma'o yadaroto dunio mangganai doso, kabanarot, ba pengakiman (takallo urok'ng Farisi ba urok'ng Yahudi nuduh Io pandoso, Io gigati ne'ido untu balaku adil) ; ⁹ mangana'i doso, kareno ne'ido ano picayo ka-Aku; ¹⁰ mangana'i kabanarot, karano Aku ampus ka Bapo lantas kau pasti ano nanang'go Aku agi, ¹¹ Lantas mangana'i pangakiman, karano panguaso dunio anyian udoh diakimi. ¹² Masih manyak jukut nang ma'o Aku kato'oto ka'kau, tapi kau ano biso nangung'go io kanio. ¹³ Tapi, takallo Io, Roh kabanarot ang'koo atok, Io ma'o mimbing'go kau ka doop samuo kabanarot. Soale, Io ano bakato atas kamaoan-Ne sorok, malainkan samuo jukut nang Io nangar ang'koolah nang ma'o Io kato'ot; lantas Io pasti madahi'kau jukut-jukut nang ma'o terjadi. ¹⁴ Io ma'o mulio'oto Aku karano Io pasti narimo nang Aku tarimo, ba ma'o madohoto'io ka'kau. ¹⁵ Sagalo sasuatu nang ado ka Bapo iolah ane-Ku ugo. Oleh sabab ang'koo, Aku gato'ot sasungguhe Roh Kabanarot ma'o madohoto ka'kau ameo nang Io-narimo ampat ka-Aku." Kasadihot Menjadi Karepo'ot ¹⁶ Tinggal sabantar agi, lantas kau pasti ano nanang'go Aku agi; ba sa'kai agi, tinggal sabantar agi, ba kau ma'o nanang'go Aku." ¹⁷ Basangape urok'ng murit Yesus saling batanyo, "Ameo maksud-Te Io bakato ka diri, 'Tinggal sabantar agi, lantas kau pasti ano nanang'go Aku agi; ba sa'kai agi, tinggal sabantar agi, lantas kau ma'o nanang'go Aku?' ba 'kareno Aku ma'o ampuso ka Bapo'?" ¹⁸ Tarus, ne'ido batanyo, "Ameo nang Io maksud ja'koo, 'tinggal sabantar agi'? Diri ano nahui ameo nang Io gato'ot." ¹⁹ Yesus nahu'i sasungguhe murit-murit-Te ma'o batanyo'o ka-Io, makae Io batanyo ka ne'ido, "Kito saling batanyo'ke ka antaro kito sandiri mangana'i jukut nang Aku maksud takallo Aku bakato, 'Tinggal sabantar agi lantas kau pasti ano nanang'go Aku agi; ba sa'kai agi, tinggal sabantar agi, lantas kau ma'o nanang'go Aku'? ²⁰ Sasidie, Aku bakato ka'kau, kau pasti nangis ba garatapi, tapi dunio ma'o karepo'ot; kau ma'o basadih, tapi kasadihatnyu pasti baruboh menjadi sukacita. ²¹ Takallo seko urok'ng ambini baranak, io kasakitot karano waktue untu baranako udoh sampe; tapi dah ako anak'ke kauar, io kaupo'ot mangana'i pandaritaane nang barat karena karepo'ot seko urok'ng manusio udoh dimaranakot ka dunio. ²² Ja'koolah kau ugo galami pandaritaan saat anyian, tapi Aku ma'o namu'io kau agi lantas atinyu pasto karepo'ot, ba ano ado seko urok'ng pun nang biso gicok karepo'otnyu ampat ka'kau. ²³ Ari ang'koo , kau pasti ano batanyo ameo pun ka-Aku. Sasungguhe, Aku bakato ka'kau, ameo pun nang kau minto ka Bapo-Ku kadoop nama-Ku, Io pasti mareot'io ka'kau. ²⁴ Sampe kanio, kau nape suoh minto ameo pun kadoop nama-Ku. Mintolah, ba kau pasti narimo'io supayo karepo'otnyu menjadi sampurna." Kamanangan atas Dunio ²⁵ "Aku udoh gato'ot jukut-jukut anyian ka'kau pake parumpamaan; waktue pasti sampe takallo Aku ano agi bakato ka'kau pake parumpamaan, tapi ma'o bakato ka'kau ba'tarus tarang mangana'i Bapo. ²⁶ Ari ang'koo, kau ma'o minto kadoop nama-Ku, lantas Aku ano gato'oto ka'kau sasungguhe Aku yampangano'io (minto, memohon) ka Bapo untunyu. ²⁷ Soale, Bapo sandiri gasihi kau karano kau udoh gasihi Aku ba picayo sasungguhe Aku atok ampat ka-Bapo. ²⁸ Aku barasal ampat ka-Bapo ba udoh atok ka dunio; kanio, Aku ma'o ningo'oto dunio lantas muok'ko ka Bapo." ²⁹ Murit-murit-Te bakato, "Nah, kanio Kito bakato tarus tarang ba ano make parumpamaan agi. ³⁰ Kanio, kami nahu'i Kito sasungguhe nahui sagalo sasuatu ba ano palaru seko urok'ng batanyo ka-Kau. Karano ang'koo, kami pocayo sasungguhe Kito atok ampat ka Allah." ³¹ Yesus yawab ne'ido, "Picayo'ke kau kanio? ³² Tananglah! waktue pasti atok, bahkan dah atok baginyu ma'o dicare-bareot(dipisoh-pisohot), masing-masing puok ka tampat asale sandiri ba ma'o ningo'oto Aku sandiri. Tapi ko'o, Aku ano sandiri karano Bapo ado ba-Aku. ³³ Samuo anyian Aku gato'ot ka-kau supayo ka doop Aku, damai sejahtra ado ka kau. Ka dunio, kau pasti gala'mi panyikso'ot, tapi pakaraslah atinyu! Aku udoh galohot dunio!"