³ Aku nyian urokng Yahudi, dimaranakot di Tarsus, Kilikia, ayo ka koto nyian, Gamaliel nedek katat sabayo ba hokom nene' moyang diri, jadi rajit ka Allah, samuee sabayo macam kau ari nyian. ⁴ Aku nganiayo, ngikat, ba naaman ne'ido' baek angaki, maopon ambini kadpoop pinjaro sampe mati, ⁵ sabayo ba Imam Besar ba samuee majelis penatuo mare kisoh ka aku. Ka ne'ido' aku namu surat-surat onto kamaru-kamaru di Damsik ampos onto ngikat ne'ido' nang ado dinaun ka Yerusalem jadi tahanan nang mao diokom. ⁶ Kiro-kiro tangahari pas aku gi kamarago dah amper nyampeo ka Damsyik, tibo-tibo ado cahayo tarok dari angit nyalo ngulelengi aku. ⁷ Aku raboh ka tanoh nangar suaro bakato ka aku, Saulus, Saulus, ngamio kau ngarongoi Aku?' ⁸ Taros aku nyawab, 'Siape Kito', Tuhan?' Lantas io bakato' ka aku, 'Aku nyian Yesus dari Nazaret, nang kau ngarongoi.' ⁹ Urokng-urokng nang nanang cahayo ba aku koo, ano ngarati ka suaro Urokng nang gi ba kato' ba aku koo. ¹⁰ Taros aku bakato, damio nang haros aku amuat, Tuhan?' Lantas, Tuhan nyawab aku, 'Badiri amposlah ka Damsyik, kanaon kau baru dibataki samuee nang dah dinatuot onto kau amuat. ¹¹ karano kemuliaan cahayo koo aku no biso nanang, ado urokng-urokng nang ba aku ngirihot aku taamo ka Damsyik." ¹² Ako koo, ado urokng nang badamo Ananias, urokng taat manorot Hokom Taurat, urokng Yahudi nang dinganal baek diop di naan, ¹³ atok kaaku, badiri ka samakku, io bakato, 'Kamaruku Saulus, nananglah!' Lantas, waktu koo ugo, aku biso nanang agi taros nanang io. ¹⁶ Lantas io bakato, 'Allah nene' moyang diri' nantuot kau onto nahui kamaoan Allah ba nanang nang banar, nangarot suaro dari moot Tuhan, ¹⁵ karano kau haros jadi saksi onto Tuhan kasamuo urokng ka hal nang dah kau nanang ba nangar. ¹⁶ Kanio , ngamio kau nundo-nundo? Umpat bare diringu dibaptes, taros barasihot doso-dosongu sambir nyaru namo Tuhan." ¹⁷ Pas muok ka Yerusalem aku badoa ka Rumah Allah, aku dinguasoi Roh, ¹⁸ aku nanang Io bakato ka aku, 'Anceh-anceh kauar ka Yerusalem karano ne'ido' bai narimoo kisohngu maganai Aku.' ¹⁹ Lantas, aku bakato, 'Tuhan, ne'ido' sandiri nahui aku minjaro ba ngikat ne'ido' nang picayo ka-Kau dari sege garejo ka nang laene. ²⁰ Ako daroh Stefanus, saksi-Ngu koo dinumpohot, aku sandiri ado di koo, nyatujui ba njago pakean urokng-urokng nang munuh io. ²¹ Ako koo, Yesus bakato ka aku, 'Amposlah aku mao ngotos kau jauh ka bangso-bangso laen." ²² Urokng rami koo nangarot kato Paulus. Ako koo ne'ido' samuee ngampak sambir bakato, " oser urokng koo dari dunio karano io no Pantas onto idop!" ²³ Lantas ne'ido' taros ngampak, sambir nabakot juboh ne'ido', ba ngejet dabu ka udaro, ²⁴ kapalo balo nyuruh nabanan Paulus ka markas, sambir madohot Paulus haros diparekso ba cambok supayo biso ditahui ngamio ne'ido' ngampak ngalawan io macam koo. ²⁵ Pas ne'ido' ako ngikat io ba tali-tali koet, Paulus bakato' ka saridadu nang kasamake , "Sah ge bagi kito onto nyambok urokng nang ugo warga nagari Roma kalo no diadeli'?" ²⁶ Pas kapalo saridadu nangar, io ampos mataki kapalo balo, Kato'e, "Amio nang kau amuato? Karano, urokng nyian ugo warga nagari Roma." ²⁷ Lantas, kapalo balo koo atok sambir bakato' ka Paulus, "Padohot ka aku, kau urokng nagari Roma?" Paulus bakato, "Au". ²⁸ Kapalo balo koo nyawab, "Aku namu warganagari nyian ba doet nang manyak." Taros, Paulus bakato, "Tapi, aku jadi warga nagari koo karano dimaranakot kasio'." ²⁹ Ako koo, urokng-urokng nang mao marekso Paulus langsong ningoot io kapalo balo koo jadi gai pas io nahui Paulus nyian warga nagari Roma nang ako io ngikat. PAULUS BAKATO' BA PAMEMPEN YAHUDI ³⁰ Taros, ka ari salanjote, karano kapalo balo mao nahui damio sabanare alasan urokng Yahudi nuduh Paulus koo, io ngapasot Paulus ba nyuruhot imam-imam kapalo saluruh Sanhedrin onto bakomo, lantas io nabanan Paulus turut ngadap io ka tangoh-tangoh ne'ido'.