¹ nyianlah katiga kalie aku ngunjungi kao. harus ado katerangan dari duo ato tiga saksi, maka suatu pakaro dingatoot sah. ² sanapee, aku dah ngingati ne' udo nang badoso lantas samuae nang laene. kanio, walaupun aku anok ado ba kao, aku ngingati ne' udo angayo nang aku ngarajaan doop kunjunganku nang kaduo, koolah kade aku atok agi, aku anok akan nyayangkan ne' udo, ³ karamo kao nuntut bukti tentang Kristus, nang bakato kadoopku lantas nang anok lamoh terhadap kao, malaenkan bakuaso kadoopngu. ⁴ sasungguhe, Kristus disalib doop kalamahan, tapi Io idup oleh kuaso Allah. sebab, kami ugo lamoh kadoop Io, tapi kami akan idup sabayo-bayo nang Io karamo kuaso Allah terhadap kao. ⁵ ujilah diri'ngu sandiri onto' nanang, ameolah kao tatap ka doop imanngu. pariksolah diri'ngu sandiri! ato, amelah kao anok nganali diri'ngu sandiri kade Kristus Yesus ado ka doopngu, kacoali kalo kao gagal kadoop ujian. ⁶ aku baarap kao akan nahui kade kami bukelah urok nang anok tahan uji. ⁷ namun, kami badoa ka Allah supayo kao anok babuat saloh, buke supayo kami tatanang tahan uji, tapi supayo kao ngarajaan ameo nang banar, meskipun katanange kami dah gagal ujian. ⁸ kami anok biso ngarajaan hal-hal nang batantangan dengan kabanarot, melaenkan hanya onto' kabanarot. ⁹ kami sanang waktu kami lamoh lantas kao koat. doa kami adolah supayo kao jadi sempurna. ¹⁰ koolah sebabpe, aku nulis hal-hal nyian waktu aku jauh dari ngu supayo waktu aku atok, aku anok parlu ngunakan dengan karas, kuasa nang Tuhan mareot ka aku onto' ngoati kao, lantas buke onto' nyantooto kao. ¹¹ akire, kamaru-kamaru, basukacitalah. barusoholah jadi sempurna, iburlah seko dengan nang laene, saati dapikir, lantas idup doop damai. lantas, Allah sumber kasih lantas damai sejahtera nyertai kao. ¹² barelah salam seko dengan nang laen dengan baidung kudus. ¹³ samuae urok-urok kudus ngiriman salam onto' ngu. (13-14) anugrah Tuhan Yesus Kristus, lantas kasih Allah lantas pakomoaan dari Roh Kudus nyertai kao samuae.[[ayt.co/2Ko]]