¹ Telehlah kasih ba mao'anlah sidi-sidi karunio-karunio rohani, tarutamo supayo kau biso ba nubuat. ² Sabab,sape nang bakato doopm bahaso jioh, ino' ba kato ka manusio,tapi kapado Allah; karamo ino ado urokng nang ngarati, tapi io ngatootn hal-hal nang rahasio doopm roh. ³ Tapi, urokng nang ba nubuat bakato ka manusio sak mambangun, nasehat, ba pangiburotn. ⁴ Urokng-urokng nang bakato doopm bahaso jioh mambangun diri'e sorokng, tapi urokng nang ba nubuat mambangun jamaat. ⁵ Aku ba arap kau samuo bakato doopm bahaso-bahaso jioh, tapi labih agi' supayo kau ba nubuat. Urokng nang ba nubuat labih kayo' daripado urokng nang bakato doopm bahaso jioh, kacuali kalo' io ugo' nang ngaratiotn io jadi jamaat biso narimo' panaguhotn. ⁶ Kamaru'-kamaru', kalo' aku atokng ka kau lalu bakato doopm bahaso-bahaso roh, ameo untunge kau, kacuali kalo' aku bakato ka kau ba panyatootn, pangatahuan, nubuat, atopun pangajaran? ⁷ Bahkan alat-alat nang ino' banyawo, angayo soleng ato kacapi nang ngauarot bunyi, kalo ino' ngauarot pabedootn doopm bunyie, jamae urokng biso nahui' alat dameo nang gi' dimainan, soleng ato ge' kacapi? ⁸ Ato, kalo' sarompet ngauarotn suaro nang ino' jalas, sape bo nang mao' nyiapotn diri' mao' baparango'? ⁹ Jakoo ugo' kau. kalo' ba jiohngu, kau ngatootn kato-kato nang ino' biso di ngarati, jamae urokng nahuio' dameo nang dingatootn? Saolah-olah kau bakato ka angin. ¹⁰ Mungkin, manyak macam bahaso ka dunio nyian lalu ino' sete' pun amapat ka io nang ino' baarti. ¹¹ Tapi, kalo' aku ino' nahui' arti bahaso koo, aku dah pasti jadi urokng asing kalo' io nang bakato, lalu urokng nang bakato koo jadi urokng asing bagiku. ¹² Jakoo ugo' kau, karamo kau sungguh- sungguh barusaha sa' karunia-karunia rohani, barusahalah supayo bakalimpohotn sa' manguno' jamaat. ¹³ Karamo koo, hendaklah urokng nang bakato doopm bahaso jioh bado'a supayo io biso ngaratiotn io. ¹⁴ Sabab, kalo aku bado'a doopm bahaso jioh, rohku bado'a, tapi pikiranku ino' babuoh. ¹⁵ Jadi, dameo nang arus ku karajaan? Aku pasti bado'a ba rohku lalu aku ugo' pasti bado'a ba pikiranku. Aku pasti barenyoh ba rohku lalu aku ugo' pasti barenyoh ba pikiran ku. ¹⁶ Kalo' kau kahe mangucap syukur ba rohngu, jamae ba urokng, nang ado doopm kaadaan ino ba karunio koo, biso bakato, "Amin," atas ucapotn syukurngu koo karamo io ino' ngarati dameo nang kau ngatootn? ¹⁷ Sakaipun kau mangucap syukur paling baik, tapi urokng lain ino' dibangun. ¹⁸ Aku basyukur ka Allah bahawo aku bakato doopm bahaso-bahaso jioh ngalabihi' kau samuae. ¹⁹ Tapi, doopm jamaat, aku labih baik bakato limo kato ba pikiranku supayo aku ugo' biso ngajar urokng lain, dari pado sapuluh ribu kato doopm bahaso jioh. ²⁰ Kamaru'-kamaru', ame jaji kamudo'-kamudo' doopm pamikiranngu. Jajilah kamudo'-kamudo' doopm kajahatotn, tapi doopm pamikiranngu jajilah dewasa! ²¹ Angayo tatulis doopm Hukum Taurat, Karamo urokng-urokng nang ba bahaso asing ba moot urokng-urokng asing, Aku pasti ba kato ka bangso nyian, tapi ne'ido' pasti ino' nangarotn Aku, Firman Tuhan."Yesaya28:11-12 ²² Jadi, bahaso-bahaso jioh koolah tando, buke' sa' urokng nang picayo', tapi sa' urokng nang ino' picayo', sadangkan banubuat koolah tando, buke' sa' urokng nang ino' picayo', tapi sa' urokng nang picayo'. ²³ Kalo' saluruh jamaat bakomo' sabayo doopm sege' tampat, lalu samuo bakato ba bahaso-bahaso jioh, lalu ado urokng-urokng nang ino' ngarati atopun urokng-urokng ino' picayo taamo' ino' ge' ne'ido' pasti ngatootn bahawo kau dah gilo? ²⁴ Tapi, kalo' samuae banubuat, ako'koo ado urokng nang ino' picayo' atopun urokng nang ino' ngarati taamo', io pasti disadarotn samuae ba dinilai samuae. ²⁵ Rahasio doopm atie pasti nyato, io pasti tasongkop, lalu nyamboh Allah, ngako' bahawo sasungguhe Allah ado ka antarangu. ATURAN-ATURAN DOOPM PATAMUAN JAMAAT ²⁶ Jadi, salanjute jamae, Kamaru'- kamaru'? Waktu kau bakomo', masing-masing ado ba mazmur, pangajaran, panyatootn, bahaso jioh, atopun sabuoh panujuman. Biarlah samuo nyian dikarajaan sa' mambangun. ²⁷ Kalo' ado nang ba bahaso jioh, no' meolah kahe duo atopun paling manyak talu urokng, lalu masing-masing ba gante'-gante', lalu arus ado ba urokng lain nang ngaratiotn io. ²⁸ Tapi, kalo' ino' ado urokng nang ngaratiotn io, io arus diopm ka doopm jamaat lalu no'meolah io bakato kadiri'e sorokng ba ka Allah. ²⁹ No'meolah kahe duo ato talu nabi nang bakato lalu nang lain ba pikir-pikir doho'. ³⁰ Tapi, kalo' panyatootn dingamuat sa' urokng lain nang duduk dikoo, urokng nang pamulo arus diopm ³¹ Sabab, kito' samuoe biso banubuat seko'-seko' supayo samuoe biso balajar lalu samuoe biso dikoatotn. ³² Roh-roh para nabi tunduk ka para nabi. ³³ Sabab, Allah buke'lah Allah ampat ka kacootn, malainkan damai sajahtaro, sabayo angayo doopm samuo jamaat urokng-urokng kudus. ³⁴ Ambini arus tatap diopm doopm jamaat karamo ne'ido' ino' dimuihotn bakato, malainkan arus tunduk ayamae Hukum Taurat ugo' ngatootn io. ³⁵ Kalo' ado nang mao' ne'ido' palajari, no' meolah ne'ido' batanyo' ka aki-e karumoh karamo adolah hal nang nyupatni' ka ambini ba katoo' doopm jamaat. ³⁶ Memange firman Allah baasal ampat ka kau? Atopun, memang kahe ka kau ajo' firman kok dinyampeotn? ³⁷ Kalo ado nang bafikir bahawo io koo nabiatopun urokng nang rohani, no'meolah io nganali' bahawo hal-hal nang ku nulis ka kau adolah parentoh Tuhan. ³⁸ Kalo ado urokng nang ino' nganali' nyian, io ino' dikanal. ³⁹ Jadi, Kamaru'-kamaru'ku, usahakanlah sidi-sidi sa' banubuat, lalu ame diberai' urokng bakato doopm bahaso-bahaso jioh. ⁴⁰ Tapi, samuae arus dikarajaan ngan sopan ba taatur.