¹ Sawaktu koa ada uga'k urakng rami dikoa nang manyak jumbalahhe, tarus urakng-urakng koa ina' ada ba pamakanan, Yesus nyarui'k murit-murit-Te lalu bakata: ² "Ati-Ku tagarak kasihatn ka urakng manyak nyian. Udah talu ari kabatnne nunaan Aku ba kabatnne nyian ina'k ada ba pamakanan. ³ Kade' Ku suruh puakng karumahhe ba parut kaparatn, ana kabatnne bisa jantu'k ka maraga, barang ada nang atakng dari jauh. ⁴ Murit-murit-Te nyahuti'k: "Ayamae ka tampat sunyi'k nyian urakng bisa mare'k kabatnne makatn roti sampe kanyang?" ⁵ Yesus batanya'k ka murit-murit-Te : "Sangahe roti nang ada ka kao?" tarus ja kabatnne: Tujuh." ⁶ Lalu Ia nyuruh urakng manyak koa duduk ka tanah. Apas koa Ia naap katujuh roti koa, tarus ngucapatn sukur, macah-macahatn ia ba mareatn ka murit-murit-Te untu' dibagi-bagiatn, lalu kabatnne mareatn ia ka urakng manyak koa. ⁷ Kabatnne uga'k ada ba sangahe eko'k ikatn, apas ngucap barakat ka atas e, Ia nyuruh supaya ikatn koa uga'k dibagi-bagiatn. ⁸ Lalu urakng nang rami koa makatn sampe kanyang. Apas koa urakng ngomoan potongan-potongan roti sisa', samanyak tujuh baku. ⁹ Dangan nang makatn koa ada kira-kira ampat ribu urakng. Tarus Yesus nyuruh dangan koa puakng. ¹⁰ Ia langsung naik ka parahu ba murit-murit-Te lalu baputar ampus ka daerah Dalmanuta. ¹¹ Tarus muoklah urakng-urakng Farisi lalu basoal jawap ba Yesus. Untu' nyobai Ia kabatnne minta' dari Ia sote' tanda dari saruga. ¹² Tarus Yesus ngeluh ka daapm ati-E lalu bakata: "Ngahe angkatan nyian minta' tanda? Aku bakata ka kao, sasidie ka angkatan nyian sakai-kai pun ina' akan dibare' tanda." ¹³ Ia ningaatn kabatnne; lalu Ia naik ka parahu tarus ampus ka sabarang. ¹⁴ Apas koa rupae murit-murit Yesus kaupaatn ngicakng roti, kahe sabuah maan nang ada ka kabatnne daapm parahu. ¹⁵ Lalu Yesus mare' paringatan ka kabatnne, jakata-E: "Bajaga-jaga ba awaslah ka ragi urakng Farisi ba ragi Herodes." ¹⁶ Tarus kabatnne bapikir-pikir lalu seko' bakata ka nang lain: "Ia bakata yakoa barang diri'k ina' ada ba roti." ¹⁷ Ba sawaktu Yesus nauan ahe nang kabatnne koa ngataatn, Ia bakata: "Ngahe kao bakata soal ina' ada roti? Nape' ugak me kao paham ba ngarati? Udah babal ge'k atinyu? ¹⁸ Kao ada ba mata, ina'k me kao nee'k ba kao ada batarenyekng, ina'k me kao nagar? Ina'k me kao ingat agik, ¹⁹ sawaktu Aku macah-macahatn lima roti untu' lima ribu urakng koa, sangahe baku bainsi'k potongan-potongan roti kao ngomoan? Ja kabatnne: "Dua balas baku." ²⁰ "Ba waktu tujuh roti untu' ampat ribu urakng koa, sangahe baku bainsi'k potongan-potongan roti kao ngomoan? "Ja kabatnne: Tujuh baku." ²¹ Tarus jakata-E ka kabatnne: "Masih ge'k kao ina'k ngarati?" ²² Ataknglah Yesus ba murit-murit-Te ka Betsaida. Dikoa urakng ngicakng ka Yesus seko' urakng buta ba kabatnne koa mohon ka Yesus, biar Ia bisa nyangkam ia. ²³ Yesus nyingi'ik kokot urakng buta' koa ba ngicakng ia kaluar kampokng. Tarus Ia ngaujahi'k mata urakng koa ba narohatn kokot-Te ka atase, tarus batanya'k: "Udah gek kao nee'k sesuatu?" ²⁴ Urakng koa nee'k ka depan, lalu bakata: "Aku nee'k urakng, barang nee'k kabatnne bajaatn-jaatn, tapi tolen kateeatn aya puhutn-puhutn kayu." ²⁵ Yesus narohatn agi'k kokot-Te ka mata urakng koa, lalu urakng koa sidi-sidi nee'k ba udah tomo, sampe jajie ia bisa nee'k sagalae jalas. ²⁶ Apas koa Yesus nyuruh ia puakng ka rumahhe tarus bapasatn: "Ame taama'k ka kampokng!" ²⁷ Apas koa Yesus ba murit-murit-Te barangkat ka kampokng-kampokng ka sakitar Kaisarea Filipi. Ka tangah maraga Ia batanya'k ka murit-murit-Te, jakata-E: "Ja urakng, sae gek Aku nyian?" ²⁸ Ja kabatnne: "Ada nang ngataatn: "Elia, ada uga'k nang ngataatn: seko'k dari na' nabi-nabi." ²⁹ Ia batanya'k ka kabatnne: "Tapi kade'k janyu, sae ge'k Aku nyian?" tarus ja Petrus: "Kao adalah Mesias!" ³⁰ Tarus Yesus maian sidi kabatnne koa biar ame mare'k nauan ka sae pun parihal Ia. ³¹ Lalu mulai'klah Yesus ngajaratn ka kabatnne, kade'k Anak Manusia harus nanggong manyak penderitaan ba ditolak di tua-tua, imam-imam kapala ba ahli-ahli Taurat, tarus dibunuh ba bangkit apas talu ari. ³² Hal nyian Ia ngataatn sacara tarus tarang. Tapi Petrus narik Yesus ka samping ba nagor Ia. ³³ Tarus maleklah Yesus sambi nee'k murut-murit-Te Ia merai'k Petrus jakata-E: "Darilah Ibalis, barang kao buke'k mikiratn ahe nang dimikiri'k di Jubata, tapi mikiratn ahe nang dimikiri'k manusia." ³⁴ Tarus Yesus nyarui'k urakng manyak ba murit-murit-Te lalu bakata ka kabatnne koa samua: "Satiap urakng nang mao'k nunaan Aku, ia harus nyangkal diri'k e, mikut salippe ba nunaan Aku. ³⁵ Barang sae nang mao'k nyalamatatn nyawa e, ia akan kailangan nyawa e; tapi sae pun kailangan nyawa e karna Aku ba karna Injil, ia akan nyalamatatn ia. ³⁶ Ahe gunae urakng namuan saluruh dunia, tapi ia kailangan nyawa e. ³⁷ Barang ahe ge'k nang bisa dibareatn dihe jak ganti nyawa e? ³⁸ Barang saepun nang supe'k karna Aku ba karna pakataatn-Ku ka tangah-tangah angkatan nang ina'k setia ba badosa nyian, Anak Manusia pun akan supe'k karna urakng koa kade'k Ia atakng ana daapm kamuliaan Apa'k-E, dingirikngi'k malaekat-malaekat kudus."