¹ Kade-' akupane bakata ka daap'm bahasa- bahasa taino ba bahasa malaekat, tapi kade' aku ina' ada ba kasih, aku sabaya maan ba aguk'ng nang babunyi ba garonong nang nyarek'ng bunyie. ² Kade' aku ada ba karunia ba nubuat, ba nauan samua rahasia, ba samua pangatahuat'n , aku ada bariman onto' mindahat'n bukit -bukit tapi kade' aku ina' ada bakaseh sayak'ng, aku buke'lah ahe-ahe. ³ Kade' aku mareat'n samua kakayaat'nku ka urak'ng nang kodo, aku nyarahat'n tubuhku onto' ditunu, tapi kade' aku ina' bakaseh sayak'ng, sabebetpun ina' ada gunae bagi diri'ku. ⁴ Kasih koa sidi sabar, murah ati, kasih koa ina' panimuru, ina' tingi ati, ba ina' banga', ⁵ ina' minjawat nang ina' pantas ia pinjawat, ina' ngago' kapantingane babaro, ina' pamera, ina' ngetong kasalahat'n urak'ng lain, ⁶ ina' karepoat'n atie kade' ada nee' nang ina' banar. ⁷ Kasih koa mampu nahan sigala hal, picaya' ka samua hal, ngarapat'n sigalae ba sabar sidi nanggung sigalae. ⁸ Kasih ina' suah mati. Tapi, kade' ada nubuatan-nubuatan, dibuak'ng; kade' ada bahasa-bahasa, mao dibarantiat'n; kade' ada pangatahuat'n, mao diaboat'n. ⁹ Sabape, diri' kahe nauan sabagian maan, ba kahe banubuat sabagiat'n maan. ¹⁰ Ana, kade' nang sasidie atak'ng, nang sabagiat'n koa mao diabo'at'n. ¹¹ Waktu aku masih gi' enek, aku bakatai' aya kamuda' enek, aku bapikir aya kamuda' enek, baretong aya kamuda' enek. Waktu aku dah nuha, aku ningaat'n samua hal nang masih aya kamuda' enek. ¹² Angkit'n diri' kahe nee' nang ina' kateeat'n gia' ka daap'm caramin, tapi ana ada waktue diri' batee muha ba muha. Angkit'n aku kahe nganal sabagiat'n, tapi ana aku nganal sasidie, aya aku udah dinganali sasidie. ¹³ Jajie, angkit'n talu hal nang tatap ada, ahe nang dinyabut iman, pangarapat'n ba kasih; tapi nang labih aya' dari talu koa tai kahe kasih.