¹ Vukua tjilemo tjange, katjimutave kumuthithimba uoshe vunoni ethekeni muthithimba ngaukeuo ua Kalunga. Moumu vaPolofeto vavishaki vavengi vana shanduokela hamavu. ² Mukemuo mumuthivukila Spilitu uaKalunga, muthithimba uoshe utava nguehoni Jesu Kilistu nenja mulila uathitu, tjiketjo tjaKalunga. ³ keko tjithithimba tjoshe katjitava kuli Jesu otjo, ketji tjaKalunga. Tjotja anti Kilistu. Uje imunovu akuinja, navuno alilaja hamavu. ⁴ Vana vange vavandende, muvaka- Kalunga, neni muava tuvavakana. Moumu ou ali mulieni natuvakana ou ali hamavu. ⁵ Vakevo vahamavu, mukemuo vekuhandeka viahamavu. Keho vakamavu vavovua. ⁶ Etu tuvakua Kalunga, ou athivuka Kalunga, atutolilila, ou ketji uaKalunga. Katutolilila, mukemuo tuthivukila tjithithimba tjavusunga namuthithimba ua kushavuitha. ⁷ Vakatjilemo tjange, tulilemeni umo namukuavo, moumu tjilemo tjiketjo tjaKalunga. Keho uoshe alema mukuavo, ikeje nathemuka kuli Kalunga na ikeje athivuka Kalunga. ⁸ Uje kaleme mukuavo kathivuka Kalunga, muomu Kalunga ikeje tjilemo. ⁹ Mukemuo tjilemo tjaKalunga tjasolokele mulietu, omo Kalunga natumu munendi umo lika hamavu linga tujo je hali ikeje. ¹⁰ Mukemuo muli tjilemo, ketji jetu tualemene Kalunga. Vunoni ikeje uatulemene, keho ua tumine munendi apue nkombelo jamaninga aku vupi vuetu. ¹¹ Vakuatjilemo tjange, Kalunga nganatuleme ngatjije, netu tulilemeni umo namukuavo. ¹² Naumo uahi namono Kalunga thimbuimo, ngatu lilema umo namukuavo. Kalunga akala mulietu, natjilemo tjendi tjitantuluka mulietu. ¹³ Mukemuo mututhivuka ngatjije tuli muli ikeje, nendi mulietu ali, Moumu natuhana ko Spilitu uendi. ¹⁴ Netu tuna mono keho tuambulula vukaleho ishe natumu munendi apue muovole uavakuamavu. ¹⁵ Oushe uje atava ngatjije Jesu ikeje muna Kalunga. Kalunga akala muli ikeje, nendi muli Klunga. ¹⁶ Keho tunathivuka nakuthelela tjilemo tjije Kalunga ali natjo kulietu. Kalunga ikeje tjilemo. Nou akala kala mutjilemo, ikeje akala kala muli Kalunga naKalunga akala muli ikeje. ¹⁷ Omuovene tjilemo tjitantuluke netu, linga tukale nakuthimpa kulitangua lia kusompa milonga. Moumu nguehoni muali ikeje, mukemuo vene netu mutulihano hamavu. ¹⁸ Mutjilemo liova liahimo, vunoni tjilemo tjakutantuluka. Tjumbila liovakuti, muomu liova kuneha kjando, nou ali naliova katantuluka mutjilemo. ¹⁹ Etutumilema, muomu ikeje ualivangele kutulema. ²⁰ Ngaumo ahandeka nguendi, tjilema Kalunga keho athinda mukuavo. Ikeje mukavishaki, moumu oukaleme mukuavo janamono, kahatha kulema mukuavo lalo. ²¹ Keho tuli nalijui lia lithiko eli lia kutunda kuli iokeje. Ngatjije ou alema Kalunga alema mukuavo lalo.