¹ Cho lalo butenu bwa Njambi bwa bendukulile ba Isalela, cho watakamethele Ndabiti nakwendeka ngwendi, "Ya, utande ba Isakela na ba Yunda." ² Mwene wendekele kuli Njoabu mukulunu wa mashwalale, ou akele nendi hamo ngwendi, "Ya mutuluke mu miyati yoshe ya ba Isalela, kutunda kuli Ndani kweta kuli Mbeyashemba, nakutanda banu boshe, mangana njithzibuke kutuma cha banalume banapande kuya ku nthzita." ³ Njoabu wendekele kuli mwene ngwendi, "Echela Yehoba Njambi yobe atumithe kutuma cha banu mu bita, cho echeleni mesho a mwene wange shukulu achimone kupangewa. ⁴ Oloni mwomo bika shukulu mwene achakela echi?" Nambe chikale ngocho, lijwi lya mwene lyapwa lyakumanethelako kuli Njoabu nakuli bakulunu ba mashwalale . Cho Njoabu na bakulunu ba mashwalale baile kutunda ku mesho a mwene bakatande banu ba Isalela. ⁵ Bajabukile Yondani nakukala ha chilombo kuyehi na Aloya, kushango ya nganda ya mu mingulunga. Cho bendele kwita mu Ngandi kweta ku Njaza. ⁶ Betele ku Ngileadi naku lifuti lya Tatimu Hondishi, kweta ku Ndani Njani na kuthzenguluka kuyehi na Sindoni. ⁷ Betele kwatakamena Taiya na binganda byoshe bya Hitite na Kanana. Cho baile ku Nengebu mu Yunda ku Mbeyashemba. ⁸ Omu betele mu mafuti oshe, belukile ku Yelusalema hakuhwa cha bingonde bitanu na biwana na matangwa makumi abali. ⁹ Cho Njoabu wathzimbwile kutuma cha kutanda cha banalume bakulwa kuli mwene. Mu Isalela mwakele 800, 000 banalume bakwilika lyoba aba bakwatele mukwale, cho banalume bamu Yunda bakele 500,000. ¹⁰ Cho mbunge ya Ndabiti yababalele hanima ya kutanda banu. Cho wendekele kuli Njambi ngwendi, "Njina bulumuna mwakama hakulinga echi. Choni, Njambi, tundithamo kuthsa na mulonga cha ngamba yobe, mwafwa njinapanga mwa bulema. ¹¹ Omu endukile Ndabiti mutondo, lijwi lya Njambi lyethzile kuli kapolofita Ngandi, mukakumwenako Ndabiti, ngwendi, ¹² "Ya umuleke Ndabiti ngwobe: Njambi nendeka ngechi: "Njili na kukwana bingila bitatu. Shakulaho ngila imo." ¹³ Cho Ngandi waile kuli Ndabiti na kwendeka kuli ikeye ngwendi, "Ushaka kwija myaka itatu ya njala mulifuti lyobe ndi? Nameme ushaka kutewa mu bingonde bitatu kutunda kubaka ng'ole bobe thimbu bali nakukusheka ndi? Nameme ushaka kupwe mishongo ya matangwa atatu mu lifuti lyobe ndi? Choni shakulaho kukumbulula chinjapande kutwala kuli ou nanjitumine. ¹⁴ Cho Ndabiti wendekele kuli Ngandi ngwendi, "Njili mubukalu bwakama manene. Echeleni tuwile mumaboko a Njambi kutakana mumaboko a munu, mwafwa bilinga byendi bya ng'eke byapwa bya kama." ¹⁵ Cho Njambi watumine mishongo hali ba Isalela kushangumuka ku mutondo kweta ku thimbu eyi wakele, cho banu bakweta makulakathzi atanu na abali ( 70,000) bathsile kutunda ku Ndani kweta ku Mbeyashemba, ¹⁶ Omu kangelo wolwele liboko lyendi kuya ku Yelusalema nakuinyongetha, Njambi watengulwile bithinganyeka byendi ha mulonga wa kubulumuna chijamo, cho wendekele kuli kangelo ou wakele na kunyongetha banu ngwendi, "Nkyeho! Choni ilwitha liboko lyobe." Hathimboyo uje kangelo wa Njambi wemanene ku chijungwilo cha Alaunaka Njebusite. ¹⁷ Cho Ndabiti omu amumwene uje kangelo ou alukukile banu wendekele kuli Njambi ngwendi, "Njina bulumuna, cho njinapanga mwamubi manene. Oloni aba bimanga, banalingi bika? Njinalombo echela liboko lyobe linjithzangamethe yange na nanga yaba tate!" ¹⁸ Cho Ngande wethzile kuli Ndabiti ha litangwa lije na kwendeka ngwendi, "Ya helu utunge mutula wa Njambi ku chijungwilo cha Alauna ka Njebusite." ¹⁹ Cho Ndabiti wakandukile ngwe omu Ngandi wamukambeyeye kulinga, ngwe omu Njambi wamukambeyeye. ²⁰ Alauna wakengele nakumona uje mwene na bingamba bendi bana kwija. Cho Alauna waile na kuthsikama kuli mwene na chihanga chendi hathi. ²¹ Cho Alauna wendekele ngwendi," Bikajo byanethzila shukulu mwene kuli yange, ngamba yendi? Ndabiti wakumbulwile ngwendi, "Nakulanda chijungwilo chobe, mangana njitungeho mutula wa Njambi, mangana mishongo baitundithe hali banu. ²² Alaima wendekele kuli Ndabiti ngwendi, "Chambate kupwa chobe, shukulu mwene wange. Chipangethe muli obyo umona bubwa ku mesho obe. Kenga, bingombe aba ba mulambu wa kwenyeka na bijungwilo na mangati kupwa bitale. ²³ Byoshe ebi mwene wange, yange, Alauna, njibyana kuli yobe," Cho wendekele kuli mwene ngwendi, " Echela Yehoba Njambi yobe akutabele." ²⁴ Mwene wendekele kuli Alauna ngwendi, "Embwe, njishaka kulanda na ndando. Kunjana chuma kupwa mulambu wakwenyeka kuli Njambi echi kuchethi cha kulanda na ndando." Cho Ndabiti walandele lije libu lya chijungwilo na bingombe na mashekele makumi atanu a siliva. ²⁵ Ndabiti watunguileho mutula wa Njambi na kulambwilaho mulambu wa kwenyeka hamo na mulambu wa kulinunga kuli Njambi. Cho Njambi wakumbulwile kulomba cha kwimanenako lifuti, cho mishongo hali ha Isalela baimikile.