¹ Choni awa akeo majwi a Ndabiti a amamanethelo - Ndabiti muna Yose, munalume ou, bathinganyekele manene, umo ou babwabethele kuli Njambi wa Yakobo, muka kwimba wamubwa waba Isalela. ² Muthzithzime wa Njambi wendekele muli yange, cho lijwi lyendi lya kele ha lilimi lyange. ³ Njambi waba Isalela wendekele, libwe lya Isalela lyendekele kuli yange ngwabo, 'Ou akayulu mubuthunga hali banu, aba bakayulu mu lyoba lya Njambi. ⁴ Akapwa ngwe cheke cha mutondo wakwilika mashelwa, omu mwila waubwa ujobelela kutunda mulibu kwtila mu kutemuna cha lithathe hanima ya kunyoka nyonthzi. ⁵ Mukemo bene, nkuma nanga yange kuyalifwile nebi kumesho a Njambi? Nkuma kapangele chithzibathano cha myaka yoshe nange, mukuthungama na buthunga mubingila byoshe ndi? Nkuma katumithile bwoboke bwange na kushulitha kushaka change choshe ndi? ⁶ Oloni ebi byakujeneka kufwila bikapwa ngwe mingonga ei bakombila kuti, mwaafwa kubatha kuibingiya na maboko a munu. ⁷ Munu ou akuikwata kubanga akapangethe chipangetho chachikubo nambe cheti cha likunga. Byapande kubyenyekela oho bikalala." ⁸ Cho awa akeo mathzina a banu ba kulema ba Ndabiti: Njoashebu - Mbashe - Mbeti ka Takemone, wakele ntwama wa banalume ba nthzili. Wathsiile banalume bakweta bita bitanu na bitatu hathimbu imo lika. ⁹ Hanima yendi bethzile Elayaza muna Ndodai kaAholite, umowabaje banalume banthzili batatu. Wakele hamo na Ndabiti hathimbu ba nyongethele ba Filisite aba balikungulwilile hamo ku kulwa, nomu belukile banu ba Isalela hanima. ¹⁰ Eleyaza wemanene nakulwa naba Filisite kweta nomu liboko lyendi lyakolele kukukwata mukwale wendi. Njambi wakelekuhyana cha kama halitangwa lije. Mashwalale belukile hanima ya Eleyaza, kuya nakushulula mibila lika. ¹¹ Hanima yendi hethzile Shama muna Angi, ka Halalite. Ba Filisite balikungulwile hamo kuje kwakele lihya lya Lentile, cho baje mashwalale batewele kutunda kuli bakebo. ¹² Oloni Shama wemanene mukati ka lihya na kulilwila. Wathsiile baje ba Filisite, cho Njambi wanenele kulyana chakama . ¹³ Mashwalale batatu hali baje makumi atatu bathikumukile kuli Ndabiti hathimbu ya kuteja, kuchingelengenya cha Andulamu. Mashwalale baba Filisite bakele chilombo mu mingulunga ya Lefwaimu. ¹⁴ Hathimbu ije Ndabiti wakele mu myela yakutakama chendi, muchingelengenya, thimbu ba Filisite batungile kuje ku Mbetelema. ¹⁵ Cho Ndabiti wakele nakuthsila mema nakwendeka ngwendi, "Oshe ngwe kukala umo anjana mema akulithima lyaku Mbetelema njinwe, lithima lije lyakala kuje kuchikolo!" ¹⁶ Cho aba banalume batatu banthzili betile mukati ka mashwalale baba Filisite na kutekula mema mu lithima lyaku Mbetelema, lithima lyaku chikolo. Bambatele mema nakuwanena kuli Ndabiti, oloni wabyanene kuwanwa. Olojo, wawetilile kuli Njambi. ¹⁷ Cho wendekele ngwendi, " Njambi, chithzila kuli yange, kulinga ngechi. Nkuma njapande kunwa maninga a banu aba banakele myonyo yabo mu kuthsa?" Cho wabyanene ku wanwa. Byumebi babilingile kuli bakakutakama batatu. ¹⁸ Ambishai, ndolome ya Njoabu muna Zeluiya, wapwile ntwama hali baje batatu. Thimbu imo walwile nalikunga lyendi na banu bita bitatu nakubathsiya. Cho thimbu yoshe bamutumbwile hamo nabaje mashwalale batatu. ¹⁹ Nkuma kathzibakanene manene kutubakana baje batatu? Bamupwithile kupwa mukulunu wabo. Nambe ngocho, puho yendi kuyalitele na puho ya baje mashwalale batatu bathzibakanene manene. ²⁰ Mbenaiya kutunda ku Kambuzile wakele muna Njehoiyanda; wakele munu wakutakama , ou wapangele bya kukaluka. Wathsiile baje bana babali ba Aliyeo waku Mowabu. Naikeye wathikumukile mu bwina na kuthsiya ndumba thimbu akele na kwona. ²¹ Kutundaho wathsiile munalume wakama ka Ingitu. Uje ka Ingitu wakele nalikunga muliboko lyendi, oloni Mbenaiya walwile nendi na mbweti, Watambwile lije likunga muliboko lya ka Ingitu nakumuthsiya kupangetha lukunga lyendi ibenya. ²² Mbenaiya muna Nehoiyanda walingile bya kukaluka, cho bamutumbwilile halibaje batatu bakutakama. ²³ Bamuthingimikile manene kutubakana baje mashwalale makumi atatu mukutuma, oloni kubamuthingimikile manene ngwe baje banalume bakutakama batatu. Nambe ngocho Ndabiti wamwakele bukulunu hali baka kumunyunga. ²⁴ Hali baje makumi atatu hakeko hakele na banalume aba: Asahe ndolome ya Njoabu, Elanani muna Ndondo wa kutunda ku Mbetelema. ²⁵ Shama ka Halonde, Elika ka Halonde, ²⁶ Helezi ka Peletite, Ira muna Ikeshi ka Tekoite, ²⁷ Ambieza ka Anatotite, Simbekai ka ²⁸ Hushatite, Zalumoni ka Ahohite, Makalai ka Netofatile; ²⁹ Helebu muna Mbana, ka Netofatite, Itai muna Limbai kutunda ku Ngimbeya baku Mbejamite, ³⁰ Mbenaiya ka Pilatonite, Hindai waku mingulunga yaku Ngashi: ³¹ Ambi- Alumboni ka Ambatite, Azimabeti ka Mbahumite, ³² Eliyambu ka Shalumbonite, bana ba Njasheni, Njonathani muna Shama ka Halatite' ³³ Ahiyamu muna Shala ka Halalite, ³⁴ Elifeleti muna Ahasimbai ka Makatite, Eliyamu muna Ahitofelo ka Ngilonite, ³⁵ Hezilo ka Kamelite, Palai ka Ambite, ³⁶ Ingao muna Nathani wakutunda ku Zomba, Mbani kutunda ku lilimi lya Ngandi, ³⁷ Zeleki ka Amonite, Nahalai ka Mbelothile, mukakukwata chikubo kuli Njoabu muna Zeluiya, ³⁸ Ira ka Itilite, Ngalebu ka Itilite, ³⁹ Uliya ka Hitite -makumi atatu naba bali mukutuma.