¹ Cho Ndabiti wembile majwi a mwatho ou kuli Njambi halitangwa lije Njambi wamuyobwele kutunda mumaboko abaka ng'ole bendi boshe, na muliboko lya Saulu. ² Walombele ngwendi, "Yehoba ikeye libwe lyange, mwakubanda mwange, umo ou akanji yobola. ³ Njambi ikeye libwe lyange. Njikawana kubanda muli ikeye. Ikeye ntelo yange, mbinga ya bwoboke bwange, mukemo munjikatakamena, cho munji kabanda, umo ou akanjilwili kutunda kubukenya bwoshe. ⁴ Njikathana hali Yehoba, ou atela kulemethewa, cho akanji yobola kutunda kuli baka ng'ole bange. ⁵ Mwafwa mang'imba a buthsi anjthzengelekele, na muta wamema aku nyongetha anjithzeyethele. ⁶ Na malenge a Shoyole anjithzengulukile; cho makambwila a buthsi anjikutile. ⁷ Mukukalekeya change njathanene hali Yehoba; Njalilile kuli Njambi; cho wathzibile lijwi lyange kutunda mu tembele yendi, nakuthana chakutonda bukwathi chakobelele mu matwi endi. ⁸ Cho kaye kalinikithile na kujaja. Na mabulu a melu ajajele cho bawanikithile, mwafwa walubalele. ⁹ Bwithi bwakandukile mwilu kutunda mumajulu endi, na milangi ya tuhya yatuhukile mu kanwa kendi. Manungu bawa kwatethele ku milangi yacho. ¹⁰ Washokolwele melu chowethzile hathi, cho lithuthulungu lyakama lyakele mwithi ya myanja yendi. ¹¹ Wendele hali likelube naku mbululuka. Bamumwene ha mambaba a lihuthzi. ¹² Walingithile lithuthulungu kupwa tende ya kumuthzengeleka, kubungiya mashelwa a nyothzi mwilu. ¹³ Kutunda kukuhyatuka chendi manungu atuhya akele na kuwa. ¹⁴ Yehoba waluminine mwilu. Ikeye wakuhyana watambekele. ¹⁵ Washele mikili na kushandwola baka ng'ole - kumunika cha mihyato nakubashandwola. ¹⁶ Cho bingila bya kalunga ndonga byasholokele; malubula akaye ba ajalele hakamwa hakubyanetha cha Yehoba, ha kupemba cha kuhwima cha mumajulu endi. ¹⁷ Wetele hathi kutunda hakamwa; wanjikwatele! Wanjikokele kutunda mukuthziminina cha mema. ¹⁸ Wanjiyobwele kutunda kuli muka ng'ole wakutakama, kutunda kuli baje banjithzindile, mwafwa bakele na nthzili hali yange. ¹⁹ Bethzile nakunjimanena halitangwa lya kulyakamena change, oloni Njambi wakele mukwathi wange. ²⁰ Wanjitundithile lalo kunjinena ha mwela wakujela. Wanjiyobwele mwafwa wabwahelelele nange. ²¹ Njambi wanjifwetele mukushula ha kuthungama change; nanjilwithila mukushula ha kujela cha maboko ange. ²² Mwafwa njinanyungu bingila bya Yehoba cho kunjapangele mwamubi mukutunda kuli Njambi yange. ²³ Mwafwa mashiko endi oshe akuthungama anakala kuli yange; hamulonga wa mashiko endi; kunjatundile ku akeo. ²⁴ Cho njinakala lalo wakujeneka mulonga kumesho endi; na kulinyunga kutunda ku bubi. ²⁵ Cho ngachije Njambi nanjilwithila mukushula cha kuthungama change, kweta ku theteko ya kujela change ku mesho endi. ²⁶ Kuli baka likulahelo., lishololeni yeni babenya kupwa ba likulahelo; kuli munu ou wakujeneka katenga, lisholole yobe libenya kupwa wakujeneka katenga. ²⁷ Nakutoka lisholole yobe libenya kupwa wa kutoka, oloni unapu umuka kubihitha wa kujeneka kuthziba. ²⁸ Kwatheni banu bali mubukalu, oloni mesho eni apwa akutengulukila baka kulithziba, cho mukabanene hathi. ²⁹ Mwafwa yobe ndeya yange, Yehoba. Yehoba akamunika mulithuthulungu lyange. ³⁰ Mwafwa kwitila muli yobe njikajomboka mingowa; kwitila muli Njambi yange njinatha kujomboka mbango. ³¹ Hamulonga wa Njambi, bingila byendi byapwa byakulonga. Lijwi lya Yehoba lyapwa lyakujela. Napu ntelo kuii munu woshe ou atewela muli ikeye. ³² Mwafwa iya napu Njambi kubanga Yehoba lika, cho iya napu libwe kubanga Njambi yetu lika? ³³ Njambi mukemo mwakutewela mwange, cho akatwamenena munu wakujeneka katenga mu ngila yendi. ³⁴ Cho akathzambwitha mendi ange ngwe mbambi waminkinda na kunjaka helu ya malundu. ³⁵ Akalongetha maboko ange kulibwahethela nthzita, na maboko mukukoka mata a bunengu. ³⁶ Unanjana ntelo ya bwoboke bwabo, na kutetela chobe chinanjipwitha wakama. ³⁷ Unapanga mwela wakama wa myanja yange mwithi yange, cho myanja yange kuyathenetele. ³⁸ Njakabele baka ng'ole bange nakubanyongetha. Kunjelukile hanima kweta nomu banyongele. ³⁹ Njababetwethele na kukatuka. Banawila mwithi ya myanja yange. ⁴⁰ Unakele nthzili hali yange ngwe mwiba wathzita; unaka baje bakayimanena mwithi yange. ⁴¹ Cho wanjanene makothi a baka ng'ole bange; Cho njatapele boshe baje banjithzindile. ⁴² Balililile bukwathi' oloni kukwakele wakubayobola; cho balililile hali Njambi oloni kabakumbulwile. ⁴³ Cho njabalikitile ngechi balumukile ngwe likungu lya hathi, njabatikile ngwe ndambo yamubingila. ⁴⁴ Unanjiyobola lalo kutunda ku bimata bya banu bange. Unanjinyungu hakupwa mutwe wa mafuti. Cho banu aba kunjathzibukile bakanjipangela. ⁴⁵ Metandinda babathindiyiye kunjithsikamena. Hajebene omu banjithzibile, banji kabangeyeye. ⁴⁶ Metandinda bethzile mukujaja kutunda mu membo mubatakamena. ⁴⁷ Yehoba wayoya! Echeleni libwe lyange balilemethe. Echeleni Njambi bamujundule, libwe lya bwobole bwange. ⁴⁸ Ou ikeye Njambi ou akelwitha bubi hamulonga wange, umo akawithila banu muuthi yange. ⁴⁹ Akanjithzitula kuli baka ng'ole bange. Mukemobene, wanjijundwile helu lyabaje bakanjimanena na ng'ole. Wanjiyobola kutunda kuli banalume ba bukenya. ⁵⁰ Cho ngachije njikana kukandelela change kuli yobe, Yehoba, hakati ka mafuti; Njikemba myatho yakulemetha halithzina lyobe. ⁵¹ Njambi akana kuhyana chakama kuli mwene wendi; cho akamanetha kulyononona cha chithzibathano, kuli Ndabiti na chithemunwina chendi myaka yoshe.