¹ Cho chasholokele hanima yechi omu Ambusalome walimbwahethelele litemba na tubalu hamo na banalume makumi atanu bakushatuka kulutwe lwendi. ² Ambusalome wakele nakwinduka mutondotondo na kwimana ku ngila yakuya ku chikolo cha nganda. Omu munu woshe wakele na ng'anda yakunena kuli mwene nakumubatwilayo, Ambisalome wakele na kumuthana na kumuleka ngwendi, " kutunda ku nganda muka?" Cho uje munu akumbulula, "Ngamba yobe natundu ku lilimi limo lya muba Isalela." ³ Cho Ambusalome endeka kuli likeye ngwendi, "Kenga, ng'anda yobe yaibwa na kuthungama, oloni kukwethi nambe umo banana moko kuli mwene ya kuthziba ng'anda yobe." ⁴ Ambasalome wabwethzeleleko ngwendi, " Ngwe ngwabo banjipwithile mukakuthompetha muno mulifuti, mangana munu woshe ou akala na ng'anda nameme mulonga ngwe aija kuli yange, cho njimubatwila mwa kutela!". ⁵ Cho chasholokele omu munu woshe wethzile kuli Ambusalome nakumulemetha, Amusalome watandubwile liboko lyendi nakumukwata nakamuthsemba. ⁶ Ambusalome wapangele ngechi kuli ka Isalela woshe uje ethzile kuli mwene nakuthompa. Cho Ambusalome webile bimbunge bya banu ba Isalela. ⁷ Chasholokele hakukuma cha myaka iwana. Ambusalome wendekele kuli mwene ngwendi, "Njalombo echela njiye nakufweta chithingo chije njalithingile kuli Njambi mu Hembuloni. ⁸ Mwafwa ngamba yobe walithingile thimbu njayoyelele ku Ngeshule mu Alamu, ngwange, 'Oshe Njambi akanjimanena lalo mu Yelusalema, cho njikalemetha Njambi." ⁹ Cho mwene wendekele kuli ikeye ngwendi, "Ya mukwoloka." Cho Ambusalome wakatukile nakuya ku Hembuloni. ¹⁰ Oloni nambe ngocho Ambusalome watumine bya bweko bwabubwa ku malimi oshe a Isalela, ngwendi, "Oho bene hathimbu muthziba kwohya cha ndolombita, cho mwendeke ngweni, 'Ambusalome napu mwene mu Hembuloni." ¹¹ Ambusalome waile na banalume bita bibali kutunda mu Yelusalema, aba bathanene. Bendele mu bukuma, chakwilika kuthzibuka obyo byathinganyekele Ambusalome. ¹² Thimbu wakele nakwana milambu Ambusalome, wathanene Ahitofelo kutunda mwimbo lyendi kuje ku Ngilo. Ou wakele mukakukwatha Ndabiti. Kutenguluka cha Ambusalome kwatakamene, mwafwa banu banu bakabangeyeye Ambusalome batwaleleleho kutuminako. ¹³ Kwethile kanganda kuli Ndabiti nakwendeka ngwendi, "Bimbunge bya banalume ba Isalela byakele nakukabangeya Ambusalome." ¹⁴ Cho Ndabiti wendekele ku bingamba bendi boshe baje akele nabo mu Yelusalema ngwendi, "Katukeni tutewe ngochongocho naumo wahi muli yetu akatha kutunda kuli Ambusalome. Aha bene libwahetheni kukatuka, ngochongocho aija nakututhzikilila, cho anena bukalu hali yetu na kulwitha nganda na mpoko yamukwale." ¹⁵ Cho bingamba ba mwene bendekele kuli mwene ngwabo, " Kenga, bingamba bobe banalibwahetha kulinga chili choshe shukulu mwene wetu endeka." ¹⁶ Mwene na nanga yendi yoshe ya katukile, oloni mwene wathethzele banakathzi likumi, aba bakele mapangala bendi, kunyunga ije nganda. ¹⁷ Hanima ya mwene nabanu boshe kuya, bemanene kunjubo ya mamanethelo. ¹⁸ Mashwalale bendi boshe bendele nendi hamo, cho kulutwe lwendi kwaile baka Kelethile boshe, na boshe baka Pelethile, na boshe baka Ngite - banalume bakweta bita bitanu na chimo aba bamukabele kutunda ku Ngathi. ¹⁹ Cho mwene wendekele kuli Itai uje ka Ngite ngwendi, "Bika biwithzila netu? Iluka ukatumbame na mwene, mwafwa yobe uliita ndinda munu wakutewa. Iluka kwimbo lyobe. ²⁰ Hakupwa unatundileho ithzau , bika binjikunenethela kwendangana netu? Kunjathzibukile noku njili nakuya. Cho iluka wambate na bakweni boshe, echela chithzemo chakukakatela na likulahelo byende nobe." ^{21 23} Oloni Itai wakumbulwile mwene ngwendi, "Omu ayoya Njambi, nomu lalo ayoya shukulu mwene wange, mwimbo mwoshe omu shukulu mwene wange akaya chili bene, mukemo nange ngamba yobe akaya, nambe chikale kuyoya indi kuthsa." ²² Cho Ndabiti wendekele kuli Itai ngwendi, "Libange, twalelela netu." Cho Itai uje ka Ngite wendele na mwene, hamo na banu bendi na binanga bije akele nabyo. Lifiuti lyoshe na muteto wakama omu banu boshe betile mu mingulunga ya Kindiloni, nomu mwene wajabukile. Banu boshe bendele ha mukwakwa nakuya ku mambo. ²⁴ Nambe Zandoki hamo naba Lebi boshe, baje bambatele chikasha cha chithzibathano cha Njambi, kubakele. Batumbikile chikasha cha Njambi hathi, choni Ambiyata walinungile nabo. Babandamenene kweta nomu banu boshe batubakanene ije nganda. ²⁵ Mwene wendekele kuli Zandoki ngwendi, "Ambata chikasha cha Njambi wilwithe mu nganda. Oshe ngwe njiwana kubethzika mu mesho a Yehoba, akanjilwitha kuno nakunjimwetha lalo chikasha na mwela ou ayoyela. ²⁶ Oloni oshe ngwe endeka ngwendi, 'Kunjabwahelelele nobe, 'Kenga, yange uno echela apange kuli yange omu mwoshe chishokolokela kuli ikeye." ²⁷ Mwene wendekele lalo kuli kapilisitu Zandoki ngwendi; "Nkuma kuwethi muka kumona ndi? Iluka mukwoloka munganda, hamo na banu bobe babanalume, munobe Ahimazi, na Njonathani muna Ambiyata. ²⁸ Kenga, njikabandamena kuje ku binema bya Alamba shwi nomu lijwi likaija kutunda kuli yobe kujileka." ²⁹ Cho Zandoki na Ambiyata belwithile chikasha cha Njambi mu Yelusalema, cho batumbamene muje bene. ³⁰ Oloni Ndabiti wakandukile ku munkinda wa Olibeta mendimendi na kulila, cho wafwikile ku mutwe wendi. Munalume woshe mubanu akele nabo wafwikile ku mutwe wendi, cho bakandukile nakulila omu bakele nakwenda. ³¹ Munu umo walekele Ndabiti ngwendi, "Ahitofelo ali hakati kabaka kumulwitha na Ambusalome." Cho Ndabiti walombele ngwendi, "Obe Yehoba, njalombo utengulule bukwathi bwa Ahitofelo kupwa bulema." ³² Chasholokele omu Ndabiti wetele helu lya mukwakwa, kuje bakele na kulemethela Njambi, Hushai uje ka Akite wethzile nakuliwana nendi nathzala chithzalo chakutabuka na mabu ha mutwe wendi. ³³ Ndabiti wendekele kuli ikeye ngwendi, "Oshe ngwe wenda nange, cho ukala chitele kuli yange. ³⁴ Oloni oshe wiluka ku nganda nakuleka Ambusalome ngwobe, 'Njipwa nji ngamba yobe, mwene, ngwe omu njakele ngamba wa isho kunima, cho njikala nji ngamba yobe ndi,' cho ukaluwanganetha bithinganyeka bya Ahitofelo mukanjimanenako yange. ³⁵ Nkuma kuupu na tupilisitu ba Zandoki na Ambiyata hamo? Cho byoshobyo ukathziba mu nganda ya mwene, ukabileke tupilisitu ba Zandoki na Ambiyata. ³⁶ Ukamone ngwobe bali hamo na bana babo babanalume babali, Ahimazi, muna Zandoki, na Njonathani, muna Ambiyata. Wapande kunjitumina kwitila mu maboko abo byoshe obyo ukathziba." ³⁷ Cho Hushai, kabuthamba wa Ndabiti, wethzile munganda omu etele Ambusalome nakukobela mu Yelusalema.