¹ Kunima Yesu mua manethele vyuma vyoshe , ua kuanyene muku vuithitha vantu, ua kovelele mu Kapenama. ² Ngocho muene ua kele nandungo yendi uye uamu thingimikile muakama. Ua vavalele muhyehi-hyehi nakutca. ³ Muye muene muovuile vya kutyama kuli Yesu, ua tumine vakuluntu vavali ku Yundeya, mukumu kandelela aku kanguithe ndungo yendi. ⁴ Mu vedhile kuli Yesu, va muihuile, nachivovo nguavo, kuatha umu pangele vyo yikeye. ⁵ ''Mukonda ua yongola chifuti chetu, yikeye umo ua tutungila sinangonga yetu.'' ⁶ keho Yesu ua yile navo mungila yendi. Vuno kuakele hale na njivo, mukuluntu ua vaka ndhita ua tumine va vuthamba vendi vaka muleke nguavo, "Muene , keti uli pakethe ove yivena, mukonda ange konja fuililile yove ukovele munjivo yange. ⁷ Kulyevi kunja lihakeleko ange vavenya, konja fuililile kuija kuli yove, vuno kuanya lika nalijui na ngamba yange akanguka. ⁸ Nga ange lalo lyala ua kala muintci lya mpoko, na vaka kulua ndhita vakala muintci lyange, ange njikuanya evi, 'Aye,'na yikeye uayile, na kuli umo, ' Yija,'na yikeye uedhile, na kuli ngamba yange, 'panga evi,' na yikeye ua vipangele.'' ⁹ Muye Yesu muo vuile vyuma evi, ua mukomokele, mukemuo ua tengulukile kumbunga ya mushuamene ua kuanyene nguendi, " Ange njimileka nguange, kechi nambe mu Yisaleli konja ua nene kutcelela kua kufua ngechi." ¹⁰ Muye voshe vaye vova tumine vahilukile kunjivo, vaka uanene ndungo na kanguka. ¹¹ Muhyehi, naku manetha, Yesu uayile ku limbo lyo vatumbuile Naini, na vandonge vendi Nambunga ya yingi ya mu shuamene. ¹² Mua hetele muhyehi na chikolo cha limbo lya kama, taleni, lyala uye ua tcile chivimbi chendi vachi tuhuile hanja, ua kele munike umo lika ua lyala muva muthemene vayina {uye ua kele ntulu-ue}, na mbunga yayingi ya tundile muimbo lya kama ya kele hamo nendi. ¹³ Muene mua muene uye mukentu, uamu vuililile ngodhi, ua mulekele nguendi, keti ulile. ¹⁴ Ua shueneneko na kukuata kuchipoya chiye chova mbatelele chivimbi, na vaye va chambatele chivimbi ve manene nkili. Endi ua handekele nguendi, "Mukuenje ua lyala ange njina handeka nguange, hinduka. ¹⁵ Keho mukuenje ua lyala uje uatcile ua hindukile ua shangumukile ku handeka, na Yesu ua muhanene kuli vayina. ¹⁶ Keho chova-ova chava uanene voshe, vayile kulutue na kushangala Kalunga, vahandekele nguavo, "kapolofeto ua kama na shituka mukati ketu" na ''Kalunga ua talele mu vantu vendi. " ¹⁷ Mudhimbu ou ua Yesu uali shandanganene, muli voshe va Yundeya na vifuti viye vya hatele ku Yundeya. ¹⁸ Vandonge va Youano vamulekele vyuma vyoshe. ¹⁹ Keho Youano ua thanene vandonge vendi ua vatumine kuli muene vaka handeke nguavo, "Yove uye uva tumbuile nguavo akeja, ndi tuka tatelela uaye akeja?" ²⁰ Muvedhile muhyehi na Yesu, vamala vahandekele nguavo, "Youano muka kumbuitika natu tutumu kuli yove nguendi, '' Ove yove uye akeja ndi tuka tatelela uaye?"" ²¹ Ha ntcimbu yiye vene ua kanguithile vantu vavengi vakele nama vedhi na vaka kuvavala vimpundhi vyakuvihya, nava vavengi tupuputua ua veshuile. ²² Yesu uava tavele na kukuanya navo nguendi, kunima ya ntcimbu ambe munayi mungila, yeni mukambulule kuli Youano viye vyomu namono nevi vyomu novu. Tupuputua va muene, na vilema vendele, vaka vikeka vakangukile, tuthinda matui vovuile, vaka kutca va shitukile vakele na muono na vihutu va va-ambuluilile mudhimbu ua chili. ²³ Na vedhuka muntu uye ke kuli kela kunji tcelela mukonda lya vipanga vyange." ²⁴ Kunima ya mudhimbu ua Youano unahu, Yesu ua shangumukile kukuanya ku mbunga vya mudhimbu ua Youano, "Vika mua kamuene vyo mua yililile mumpambo? Lihongo lili nenenga kumpudhi ndi? ²⁵ Nkuma vika muaka muene? Lyala nadhala vidhala vya kutcimbuka ndi? Taleni, vaye veku dhala vidhala vya ndando yakama vakevo vekutumama ha hangulu muvimbala vya vi myene. ²⁶ Vuno vika mua tuhukilile muka mone? Kapolofeto ndi? Mukemo, Ange njikuanya neni nguange, njinatuvakana kapolofeto. ²⁷ Ou yikeye uye uova thonene, Tala, Ange njituma mudhimbu uange kulutue lua chihanga chove, uye avuahetha ngila yove kulutue luove. ²⁸ Ange njikuanya neni nguange, hakati kavo voshe vovana theme kuvakentu uahiko ua kama uaku tuvakana Youano. Vuno nambe ngocho uye uoshe ua mundende muvu muene vua shukulu Kalunga yikeye natuvakana Youano. ²⁹ (Muye vantu voshe mova vyuvuile evi, hamo navaka kutambula lithimu, vantu vatavele nguavo Kalunga yikeye muka vuchili. ³⁰ Mukemo va Falisau, nava longishi va majui alishiko va vyanene vutumbe vua Kalunga kulyavo vavena, mukonda kava mbuitikile Youano.) ³¹ Kuvika, lalo, kuatha njethekethe vantu ava nalimo lya ntcimbu yino? Vakufua vati? ³² Va nalifu ngue vanike vava ndende vaye vehela mumuhela uaku landethela, Vaye vana tumama va lithana umo na mukuavo na kukuanya nguavo, tuami thikilile dhimbendo, eni komua kinine. Tuembile muaso uaha kutca, eni komua lilile; ³³ Mukonda Youano muka kumbuitika, uedhile kalile mbolo nambe kunua ku vinyu, keho eni mua kuanyene ngueni, ali navi mpundhi vyakuvihya. ³⁴ Muna muntu uedhile ualile na kunua, eni muakuanya ngueni, Taleni, uatca hakulya navu nkolue, kavu thamba kavaka kutambula lithimu navaka kuvihya. ³⁵ Vuno vaka lyano vana thambua ku vana vavo voshe." ³⁶ Keho umo ua vaFaliseo, ua kumuine Yesu akalye nendi. Keho munima Yesu mua kovelele mu vinjivo ya vaFaliseu, uatumamene kumesa na kulya. ³⁷ Taleni, kua kele mukentu umo muimbo lyakama uye uakele muka mulonga. Omuo mua dhivukile nguendi yikeye aka tumama kumesa munjivo ya kaFaliseu, ua nehele ntadhi yakushula ya madhi akunika luengo. ³⁸ Ngue mue manene kunima yendi hamuhyehi na myanja yendi, ua hundile, ua shangumukile kujulika myanja yendi na mishodhi yendi, naku muhunda na vinkambu vyaku mutue uendi naku mutcemba kumyanja yendi na kumu vuavuetha na madhi akunika luengo. ³⁹ Uye kaFaliseu ua kumuine Yesu muavi muene evi, ua lihuile endi vavenya, nguendi , Nga ou lyala ua kele kapolofeto, nga nadhivuka yiya na chifua chou mukentu ou namukuata, mukentu muka mulonga." ⁴⁰ Yesu uamu tavele na kumu leka nguendi , "Simoni, njili navimo vyonji kuanya nove. Nguendi, vikuanye, Mulongishi!" ⁴¹ Yesu uakuanyene nguendi, Umo muka ku levaletha vimbongo uakele na vavali vamu lya makongo. Keho umo uamu levalele vihita vitanu vyapalata, mukuavo makumi atanu. ⁴² Muva yenekele kumu fueta, voshe vavali ua vethelele, Ngocho, yiya umo uavo akamu yongola muakama?" ⁴³ Simoni uamu tavele uakuanyene nguendi, "Tenga yange umo uye yethelele muakama," Yesu uamu lekele nguendi , unakuanya muachili." ⁴⁴ Yesu ua tengulukile ku mukentu uakuanyene na Simoni nguendi, "Una mono ou mukentu. Ange nja kovelele munjivo yove. Ove koua njihanene mema nji tane kumyanja yange, vuno ou mukentu ua julikile myanja yange na mishodhi yendi naku njihunda navi nkambu vya kumutue uendi. ⁴⁵ Ove koua nji tcembele, vuno kutunda ha ntcimbu yo njedhilemo mukentu kali kelele kutcemba kumyanja yange. ⁴⁶ Ove koua vuavuethele mutue uange na madhi, vuno mukentu ua vuavuethele myanja yange namadhi akunika luengo. ⁴⁷ Ngocho vene njikuleka nguange, milonga yendi, yiye yelanene, vana muethelayo mukonda ua muethele ngodhi yendi yakama. Vuno kuli uye uova nethela kamandende, aka muetha ngodhi yayi ndende." ⁴⁸ Keho Yesu ua lekele uye mukentu nguendi, "Milonga yove vana kuethelayo. ⁴⁹ Keho vaye voshe va tumamene hamo nendi kumesa vashangumukile kukuanya hakati kava nguavo, yiyacho ou atha kuethela milonga?" ⁵⁰ Keho Yesu uakuanyene nauye mukentu nguendi kutcelela kuove kuna kuovola. Ya nachivovo."