¹ Keho Yesu, mukushula nampundhi ya kujela, ua hilukile kutunda kundonga ya Yolondau mpundhi yakuYela ya mutualele mu mpambo, ² muYe muaka muethekelele Satana makumi auana amatangua. mumatangua aye kalile navimo vyahi, keho uovuile njala. ³ Satana ua muleke nguendi, "Nga ove umuna Kalunga, leka mavue aa ahimuke vyakulya." ⁴ Yesu ua mutavele nguendi, "Vanathono nguavo, 'muntu ke kuovoka kuvyakulya lika." ⁵ Keho haye vene Satana ua mutualele Yesu kumukinya na kumuleketha vumuene vua hantci. ⁶ Satana ua mulekele nguendi, "Njika kuhana vumuene ovu na vumpahu vuavo vuoshe, mukonda vana nji hanavuo, keho njivihana ku nkala uoshe uo njiyongola. ⁷ Keho, ambe anji tcikamena nakunjilemetha, vika kala vyove.'' ⁸ Vunoni yesu ua mutavele nguendi, ''Vana thona nguavo, 'Uka tcikamena kalunga Muene uove, yikeye lika yu kapangela.'' ⁹ Keho satana ua tualele Yesu ku Yerusalema na kumuhaka kuilu kuilu lya kantjongua katembele yakutunga, nakumuleka nguendi, ''Nga umuna Kalunga, lyumbile hantci. ¹⁰ Mukonda vana thono nguavo, 'Aka tuma tungelu kuli yove, muku kutakametha' ¹¹ Keho, 'Vaka kukavuila mumavoka avo, linga keti uka punduke muanja uove kulivue.''' ¹² Mukutavako, Yesu ua kuanyene nguendi, ''Vana kuanya nguavo, 'Keti uetheke Muene Kalunga kove. ¹³ ''Muamanene satana kuetheka Yesu, ua tundileho uayile noho ntcimbu yayo. ¹⁴ Keho yesu ua hilukile ku Ngalileya na ndhili ya mpundhi ya kujela, keho mudhimbu uendi ua lishandele na hanja lya chifuti. ¹⁵ Keho ua shangumukile kuambulula muvi thinangonga na voshe vamu shangalele. ¹⁶ Uedhile na kukovela muNazaleta, muje muva mu lelelele, keho, kutuala hachithemua chendi, ua kovelele muthinangonga mulitangua lya Sapalalo keho uemanene na kutanda nalijui lyakama. ¹⁷ Lidhengununo lya mukanda ua kapolofeto Isaya vamuhanenelyo. Ua fukuile lidhengununo nakutala kuye kuva thonene nguavo, ¹⁸ ''Mpundhi ya Muene yili hali yange, mukonda ua njivuavuethele mukuambulula mudhimbu ua chili kuvi hutu. Nanjitumu kuambulula kuvutula vaka tumenga na kukanguitha tupuputua, kuvutula vaje vava na yandetha, ¹⁹ kuambulula muaka ua ua ngodhi ua Muene.'' ²⁰ Keho ua thengele lidhengununo, ualihanene kuvantu vaje vakeleho, mukemo mua tumamene. Mesho a voshe vakele muthinangonga atalele kuli yikeye. ²¹ Ua shangumukile kuhandeka navo nguendi, ''Mathona aa lelo ana pumo linga mu a tolilile.'' ²² Nkala uoshe uakele muje ua handekele vya chili kutuala hali yikeye nakukomoka vinguli viye vya tundile mukanua kendi, keho valihuile nguavo, ''Ou kuma keti muna Yosefe ndi?'' ²³ Ua va lekele nguendi, ''Muvuchili muka njitela chithimo echi ngueni, 'Chimbanda, lithake ove vavenya. Vyoshe vituovuile vi ua pangele mu Kapenama, vilinge namuno muimbo lyove.''' ²⁴ Vuno honi ua kuanyane nguendi, ''Vuchili njimileka nguange, kapolofeto naumo uahi yiva tambula muimbo lyendi vavenya.'' ²⁵ Vuno muvuchili njimileka nguange kua kele vantuluue vavengi mu Yisaleli kuntcimbu ya Eliya, ha lya lishokele lilu hamyaka yitatu na vingonde vitanu na yimo na njala yakama yedhile muchifuti choshe. ²⁶ Vuno Eliya kuva mutumine kuli vakevo, ava kuahi, kuvanga lika kuli Zelafati mu Sindone, muye mua kele ntuluue. ²⁷ Kuntcimbu ya kapolofeto Elisha, mu Yisaleli muakele vaka vikeka vavengi, vuno naumo uahi yiva kanguithile kuvanga lika Namane muka Silya.'' ²⁸ Vantu voshe vakele muthinangonga va kele navukalu mukuvua vihandeka evi. ²⁹ Vakatukile naku mutuhula hanja ya limbo, naku mu kanduitha kuilu lya mukinya kuye kuva tungilile mbongi yavo, linga va mumbile hantci. ³⁰ Vuno ua hitile hakati kavo nakuya kuakuo. ³¹ Keho ua shelelele kukapenama, limbo lyamu Ngalileya, mukemo mua shangumukile kuvalongetha mu Sapalalo. ³² Vakomokele kulongetha kuendi, mukonda ua kuanyene na ndhili. ³³ Keho muthinangonga mua kele lyala ua mpundhi ya kuvihya, keho ua lilile na lijui lya kama, ³⁴ ''A! Vati tukupanga, ove Yesu ua Nazaleta? Unenja muku tu shandola ndi? Njina kudhivuka yove ua kuyela umo ua Kalunga!'' ³⁵ Yesu ua vyanene mpundhi ya kujuala na kukuanya nguendi, ''Keti ukuanye! Tuhukenimo muli yikeye!'' Keho mpundhi ya kujuala ya uithilile lyala uye mukati kavo, ya tuhukilemo, nevi vyoya vihithile muli yikeye vyahi. ³⁶ Vantu voshe vakomokele, keho vayile naku vikuanya ku umo namukuavo. Keho nguavo, ''Vihandeka muka vije? Endi kutumina vimpundhi vya kuvihya na ndhili keho vituhukamo.'' ³⁷ Keho mudhimbu uendi ua lishandele kunkala mutambela ua chifuti. ³⁸ Ngocho Yesu ua tuhukile muthinangonga keho ua kovelele munjivo ya Simoni. Vayinamueno ya Simoni vayandele ku lithikathika, vantu va kandelelele Yesu nguavo shukulukambu. ³⁹ Keho ua katukile ua vindikile lithikathika, mukemo lya mutundile. Haye vene ua katukile naku va avadhela. ⁴⁰ Omo lyatokele litangua, vantu va nehelele Yesu vaka kuvavala mavedhi ao na ao. Ua vakambekele mavoko na kuvakanguitha. ⁴¹ Vimpundhi vya kuvihya vya tuhukile mu chingi cha vantu, nakulila nguavyo, "Ove umuna Kalunga!" Yesu ua vindikile vimpundhi vyakuvihya keti vihandeke, mukonda vya mu dhivukile ngavyo yikeye Kilistu. ⁴² Kuntcimbu ya mutanya, Yesu ua yile kumuhela ua likalyendi. Vantu vavengi va mu thetelele na kuija kumuhela kuje kua kele. Va mutatelele linga keti a vathe. ⁴³ Vuno honi ua kuanyene navo nguendi, "Njina pandele lalo kuambulula mudhimbu ua vumuene vua Kalunga kumembo avakueni, mukonda evi vikevyo vyova njitumina hano." ⁴⁴ Keho ua shuenethele ko kuambulula mu vithinangonga vya mu Yundea muoshe.