¹ Vya yombolokele ha litangua liye omuo Yesu mua longethele vantu mutembele na kuambulula mudhimbu uachili kuedhile vakuluntu vaka kukombelela na valongisi vaka majui alishiko hamo navakuluntu voshe vedhile. ² Vakuanyene, nendi vamuihuile nguavo, "Tuleke nandhili yeyatjo upanga nayo vyuma evi, ndi yiya nakuhana npoko eyi." ³ Uava kuanyene naku handeka navo nguendi, "Nange njimihula chihula, eni munjileke. ⁴ Kumbuitika kua Youano: kuatundile muilu ndi kuaatundile kuli muntu?" ⁵ Keho vashangumukile kulihula hakati kavo, vakuanya nguavo, "Nga tuka handeka nguetu, 'yatundile muilu; aka handeka nguendi, 'Keho vika kumua mutcelelele? ⁶ Vuno nga tuka handeka nguetu, 'yatundile kumuntu; vantu voshe vaka tuashanga mavue, mukonda voshe vadhivukile nguavo Youano ua kele Kapolofeto." ⁷ Vamu kuanyenene nguavo kotua dhivukile kuya tundilile. ⁸ Yesu uava lekele nguendi, "Nange kunjimileke mpoko eyi yonji pangetha nayo vyuma evi." ⁹ Ua lekele vantu chithimo echi nguendi, "Lyala umo uakunine lihya lya vushuka vua vinyu, ua thile lihya eli kuli vaka kupanga, ua yile vungendhi ku chifuti chacho ua keshualeleko nthimbu yakama. ¹⁰ Omo nthimbu ya kutya vushuka ya hetele, ua tumine ngamba yendi kuli vaye vaka kupanga muku katambula mutambela uye uva tyeko laja. vuno vaka kupanga vamu kuatele vamupupile, vamu hiluithile mavoko-voko. ¹¹ Ua tumine ngamba mukuavo na yikeye lalo va mupupile, vamupangele muakuviha, vamu hiluithile mavoko-voko. ¹² Ua tumine lalo ngamba uamu chitatu vamu lemekele, vamu mbilile hanja lya lihya. ¹³ Keho vavenya muene muka lihya ua handekele nguendi, 'Vika njatha kupanga ko? Nji katuma munange ua lyala uonja yongola muakama. Halumo vaka muthingimika.' ¹⁴ "Vuno omuo vaka kupanga vamu muene, valihandekethele yavo vavenya, nguavo, 'Ou yikeye mona. Tumu tciheni, linga vufuko vuka kale vuetu.' ¹⁵ Vamumbilile hanja lya lihya na kumutciha. Vika muene vya kupangele navo vaye vaka kupanga mulihya? ¹⁶ Akeja akashandola vaye vaka kupanga, na kuhana lihya lije kuli vakuavo. "Omo mova vyu vuile, vakuanyene nguavo, "havue titityo vyalyovyo!" ¹⁷ Vuno Yesu ua va talele, ua kuanyene navo nguendi, "Vika vyana handeka aa mathona: 'Livue liye lyova vyanene vaka kutunga linapu livue lyamu mbango'? ¹⁸ Uoshe aka uila halivue eli aka pokodhoka hahandende -handende, na uoshe uye uli kauila aka thanyoka." ¹⁹ Keho valongisi vamajui alishiko na vakuluntu vava sasendote vayonguele kumukuata haye vene, mukonda vadhivukile nguavo chithimo echi yetu nachitela. Vuno vakele nalyova lya vantu. ²⁰ Vamutalelele nthimbu yachili, vatumine vantu vamo vapue ngue vaka vuchili, nguavo halumo kuatha vaka mu uanene mulonga kuli evi vyana kuanya, va hanene mpoko ya kutumina kuli nguvulu. ²¹ Vamuihuile, va handekele nguavo, "Mulongisi, tuna vidhiva ovyo vi ulongetha vucili vua vuchili, omo ku ue kutala kumuntu nambe uakathingimiko, vuno ueku longetha vuchili vya ngila ya Kalunga. ²² Kumashiko etucho vanavindika kufueta lishimu kuli Sezale ndi kuahi?" ²³ Vuno Yesu ua dhivukile vi thinganyeka vyavo, naku kuanya nguendi, ²⁴ "Njileketheni vimbongo vya shiliva, chihanga cheya na lidhina lyeya liliho?" Va kuanyene nguavo, " Cha Sezale." ²⁵ Ua kuanyene navo nguendi, " Haneni kuli Sezale viye vya Sezale, vya Kalunga vi haneni kuli Kalunga." ²⁶ Kova mu uanenene mulonga kumajui aa kumesho a vantu, vuno vaholokele kulu vakomokele ku ku kuanya kuendi. ²⁷ Vamo va vaSandusehu vedhile kulyendi, vaje veku mukuanya nguevo kakuethi kushituka kutca, ²⁸ va muihuile, nguavo, "Mulongisi, Mosesa ua tuthonenene lishiko eli nguendi nga munaina ua lyala atca, ua kala na mukentu uendi, kathemenene ho munike, ou munayina ua lyala kuatha ahinge mukentu ua munayina, ahake ho munike ua munayina. ²⁹ Kuakele vamala vatanu na vavali na uye ua kulivanga ua mbatele mukentu, uatcile kahakele ho munike, ³⁰ Nou ua muchivali nendi. ³¹ Ua muchitatu nendi lalo ua kuambatako, noho ua muchitanu navavali voshe vatcile kova hakeleho munike. ³² Kumima mukentu nendi lalo uatcile. ³³ keho hakushituka, kukutca mukentu ou honi akakala uaya? Mukonda voshe yendi lika va mbatele." ³⁴ Yesu uavalekele nguendi, "vana vetu vantcimbu yino valiambata naku hangetha malo. ³⁵ Vuno vamala navakentu vaje vana livuahethela kushituka kukutca na kuyoya munthimbu ije ikeja kulutue kuva kaliambata nambe ku hangela. ³⁶ Mukonda avo lalo naumo uahi akatca, vakafua tungelu vana vaKalunga, vana vachishitukilo. ³⁷ Vuno va ka kutca va ka shituka, nambe Mosesa ua vijomboluele, muchihumbu, muje muatumbuile muene Kalunga ua Avilahama na Kalunga ua Isaka na Kalunga ua Yakomba. ³⁸ Ngeci keti Kalunga ua vakakutca, vuno ua vaka muono, mukonda voshe vakakala mulyendi ." ³⁹ Vamo vaka kuthona vakumbuluile, "Mulongisi, una tukuanya muamungulu." ⁴⁰ Ngoco naumo uahi lalo uamuihuile vihula. ⁴¹ Yesu ua kuanyene navo nguendi, "Vati mukuanya ngueni Kilisitu muna Ndaviti? ⁴² Nga Ndaviti vavenya ua kuanyene mumathona aVisamo, Na Muene ua kuanyene kuli Muene uange nguendi, tumama kulivoko lyange lya chilyo, ⁴³ noho njikapuitha vitodhi vakale vilyatelo vya myanja yove.' ⁴⁴ Ndaviti muye vene uathanene Kilisitu 'Muene; ngocho vati akala muna Ndaviti?" ⁴⁵ Mukutolilila na mbunga ya vantu voshe ua kuanyene na vandonge vendi nguendi, ⁴⁶ "Takametheni ku vaka kuthona mathona, ava vayongola kudhala vikovelo vyalaha va menekela haku landethela naku mihela ya chili naha vithinangonga naha mihela ya vaka vukama havilika. ⁴⁷ Navakevo lalo valya vufuko muvi njivo vyava kakutcitha, nakuleketha muye mova pangetha na kulomba mua laha. Vantu vakufua ngechi vakatambula mulonga ua kama."