¹ Mumatangua aye, kuakele Sezale Angustu uatumine mashiko nguendi vatande vantu voshe vakala muchifuti. ² Oku kukeko kuakele kutanda kuaku livanga mua kele Kilinyu Nguvulu ua Asilya. ³ Keho nkala umo uayile ku chifuti chendi vaka muthoneneko. ⁴ Yosefe nendi ua yile ku Ngalileya, kuimbo lya kama lya Nazaleta, ku Yundeya kuimbo lya kama lya Ndaviti, livatumbula Mbetelema, mukonda nendi ua kele muka limbo na vushoko vua Ndaviti. ⁵ Nendi ua yile kumathona na Maliya, uye yiva mu lamenene na yikeye te nakulitha. ⁶ Vyakele ngechi avo te nolo kanda vachili kuje vene, ntcimbu yendi yakumona mbututu ya puilemo. ⁷ Ua lilelukile mona ua lyala, mona ua mbeli, ua mudhengelele hantanga ya laha ua mulangekele mu lingola, mukonda ku kuakele njivo yahi yova tulila. ⁸ Kuakele tunyungi, mu chifuti chiye vaye vakele mu muthenge, vanyungile vimuna vyavo kuvutciki. ⁹ Kangelu ua Kalunga ua va yombolokelele, na vumpahu vua Muene vua vatuililile, Vakele na lyova-lyova. ¹⁰ Keho kangelu ua va lekele nguendi, "Keti muvue lyova, mukonda njina minehela mudhimbu ua ungulu ou uminehela kuyolela kuakama kuvantu voshe. ¹¹ Lelo vana mi themena muovole muimbo lya Ndaviti! Yikeye Kilistu Muene! ¹² Echi chikecho chileketho chova ka mihana: Muka uana mbututu yova na dhengela hantanga na ndanda mulingola lya dhingombe.'' ¹³ Haye vene vakele hamo na kangelu nambunga yakama ya muilu, vashangalele Kalunga na kukuanya nguavo, ¹⁴ "Vumpahu kuli Kalunga ua kuilu kuilu, na chivovo chikale hantci hakati kavantu vaye vamuya kumbunge." ¹⁵ Hantcimbu yiye te tungelu vanayi muilu, tunyungi va liyonguele nguavo, "Tuyeni kuMbetelema tuka tale evi vina keleko, vyana tu leketha Muene." ¹⁶ Vadhambuile va ka uanene Maliya, Josefe, na mbututu, uye ua ndandele mu lingola lya dhingombe. ¹⁷ Munima ya kumumona, va vambuluile viye vi va valekele vyou mbututu. ¹⁸ Voshe va viuvuile vakomokele kulyevi viva kuanyene tunyungi. ¹⁹ Keho Maliya ua kele navithinganyeka kulyevi vyoshe vyovuile, ua vihakele kumbunge. ²⁰ Tunyungi va hilukilemo, Vadhumbokele na kushangala Kalunga kulyevi vyo vovuile na kuvimona, ngue muva vi handekele. ²¹ Mukuhua kua matangua atanu na atatu, mova mu lovuele, vamulukile Yesu, lidhina lya mulukile kangelu munthimbu kanda auile muimo. ²² Mua hitele matangua ava hakeleho a kuliyeletha, kutuala ha mashiko a Mosesa, va munehele ku tembele mu Yelusalema vaku mulekethe kuli Muene. ²³ Ngue muva thona mumashiko a Muene, ''Nkala mumala ou ashokolola ntjivu vaka mukundika kuli Muene''. ²⁴ Mukemo vanehele vikombelo kutuala kuli viye viva handekele mumashiko a muene, ''Mavembe avali nambe vana va vinkuti vavali''. ²⁵ Taleni, kuakele lyala mu Jelusalema ua lidhina Simiyone, lyala ou ua kele muka kuli kundika mu vuchili. Ua yonguele kudhembeleka kua Yisaleli, na mpundhi ya chili ya kele hali yikeye. ²⁶ Mpundhi yakujela yamulekele nguayo ka kamono kutca noho namono Kilistu Muene. ²⁷ Mukutuamenena kua mpundhi, Simiyone ua kovelele mutembele. Vakuluntu va nehele mbututu Yesu, vamupangele kutuala kuchilika cha mashiko, ²⁸ mukemo mua mukakuile nakumu haka hamavoko endi na kushangala Kalunga, na kuhandeka nguendi, ²⁹ "Ntcimbu yino tavetha ngamba yove aye muchivovo, Muene, ngue kulijui lyove. ³⁰ Mukonda mesho ange anamono vuovoke vuove, ³¹ vuye vuna vuahethela kumesho a vantu voshe. ³² Cheke cha kuyomboluela vakavifuti na vumpahu kuvantu vove va Isaleli." ³³ Yishe na vayina va komokele viva kuanyene vya kutuala kuli yikeye. ³⁴ Simiyone ua vavuavuethele na kukuanya na vayina Maliya nguendi, "Tala, munike ou yivana hangula muka kuuitha na kuhindula vantu vavengi mu Yisaleli na vileketho viova na vyana. ³⁵ Na muele ukatuva muono uove linga vithinganyeka vya vya vimbunge vyavingi viyomboloke. ³⁶ Kapolofeto ua lidhina Anna nendi hakele. Muna ua Fanuele ua mushovo ua Ashele. Yikeye te nakulupa. Uakele na lyala uendi myaka yitanu na yivali tunde kuvumbanda vuendi, ³⁷ nayikeye uakele ntuulue myaka makumi atanu na atatu na myaka yiuana. Ka tundile mutembele ua pangele na kudhiliya na kulomba, vutciki na mutanya. ³⁸ Hantcimbu yiye vene mukentu uedhile hamuhyehi navo ua shangumukile kuhana chishangala kuli Kalunga, na mukentu ua kuanyene vya kutyama ku munike ku nkala umo uye ua tumamenene kukula kua Yelusalema. ³⁹ Mova manene vyoshe vyova va tumine kusuama ku mashiko a Muene, va hilukile ku Ngalileya, kuimbo lya Nazaleta. ⁴⁰ Munike ua kulile ua kele na ndhili, na mana a engi, na kavumbi ka Kalunga kakele hali yikeye. ⁴¹ Nkala muaka vakuluntu vendi vayile ku Yelusalema ku chiuano cha pasovala. ⁴² Muakele na myaka likumi na yivali, vayile lalo kuchilika cha chithemua . ⁴³ Muva puithilemo matangua achilika, va shangumukile kuhiluka kuimbo. Keho mukuendje Yesu ua thalele kunima mu Jelusalema na vakuluntu vendi kuva vidhivukile. ⁴⁴ Va thinganyekele nguavo nendi muakele mu mbunga yovendele nayo, vendele litangua lyoshe. Mukemo vashangumukile kumuthetela hakati kava vushoko na vavuthamba. ⁴⁵ Muva yenekele kumu uana, vahilukile ku Yelusalema keho vaka shangumukile kumuthetela. ⁴⁶ Muahitile matangua atatu vamu uanene mutembele, na tumama mukati kavalongishi, atolilila na kuvehula vihula. ⁴⁷ Voshe va muvuile vakomokele kulimbulula kuendi. ⁴⁸ Muva mu muene, va komokele. Vayina va handekele nendi nguavo, "Munange, vika vyo una tupangela ngechi? Tala, Yisho nange una tuhonetha ku kuthetela. ⁴⁹ Mukemo mua va tavele nguendi, ''Vika muna njithetelela? Kumu dhivuka ngueni ange njipanga vipanga vya tata ndi? ⁵⁰ Vuno kuvovuithile vuino vika ua tumbuile mu majui aye. ⁵¹ Keho ua hilukile navo kuimbo ku Nazaleta uava thingimikile. Vayina va vihakele kumbunge vyoshe vya kuanyene. ⁵² Vuno Yesu nolo ua kulile mu mana na muchitco, na kulivuethelela mukavumbi na Kalunga na vantu.