¹ Vuno vaka kutambula milambu nava ka milonga lalo vedhile kuli Yesu mukumu tolilila. ² Keho vaFaliseu nava ka kuthona vali ninguithile umo namu kuavo, nguavo, "Ou lyala aka tambula vaka milonga nakulya hamo navo." ³ Yesu uava tililile chithimo, chaku kuanya nguendi, ⁴ "Yiya umo ueni, nga ali nachihita ca vinjui keho hadhimbale yimo, katha kutha makumi atanu na auana a vinjui mu mpambo, naku ya muku kathetela yinjui umo noho a ka mu uana ndi? ⁵ Keho mua mu uana, a mu haka ha chitcili naku jolela. ⁶ Mua kuheta kuimbo, a thana vakuavo na vaka mashangembo vendi, nguendi 'Njiyoletheniko, yinjui yange ya dhimbalele njina yi uana.' ⁷ Njimileka nguange nambe ngocho, muilu muka kala kujolela nga muka mulonga nambe umo lika a tenguluka, kutuvakana makumi atanu na auana na vantu vatanu na vauana vaje vaka kusungama jeneka kuyongola kutenguluka. ⁸ Ndi mukentu yiya ali na vimbongo likumi, nga yimo yidhimbala, kuma ka tangeka mutangeko, a kombe munjivo, na kuthetela muachili noho na yi uana? ⁹ Nga na yi uana, a thana vakuavo na vaka mashangembo vendi, nguendi, 'Njijoletheniko, njina uana mbongo yange yije yo njina dhimbalethele.' ¹⁰ Mukemo lalo, nji mi leka nguange, kuli kujolela kumesho a tungelu tua Kalunga kuli muka mulonga uoshe uje na tenguluka." ¹¹ Keho Yesu nguendi, "Lyala umo uasungama ua kele na vana vendi vavali va vamala, ¹² keho ua munike ua lekele yishe nguendi, 'Tata, nji haneko vufuko vuange.' Keho yishe mukemo muavavelele. ¹³ Ko hahitile matangua a engi, munike ua kungile vufuko vuendi vuoshe ua yile kuchifuti cha hale, kuje kukeko kua ka viyithilile vufuko vuendi na kuviyitha ku vuyoye vua muono uendi. ¹⁴ Keho mua manene kuviyitha vyoshe, njala ya kama yedhile muchifuti chije, keho ua shangumukile kuhutua. ¹⁵ Keho uali hanene ku umo mundambo ua chifuti chije, ou aka mutume kulitha aka lithe vingulu. ¹⁶ Nendi uayonguele kuikutitha limo lyendi vi nkuekue viye vyova lile vingulu, mukonda uahi ua mu haneneko vimo vyakulya. ¹⁷ Vuno mua lithinganyekele, ua lihandekethele nguendi, 'dhindungo vangahi dhili kuli tata valya muachili vapuithamo, keho ange yange uno, njitca kunjala! ¹⁸ Ange njikakatuka njikaya kuli tata, njika muleka nguange, "Tata, njina vihitha kuli Kalunga na kuli yove. ¹⁹ Keti lalo unjithane munove; nange njipuithe ngue umo ua dhindungo dhove.''' ²⁰ Keho munike ua katukile uayile kuli yishe. Te kanda a chili hale, yishe ua mu muene ua muvuilile ngodhi, mukemo mua mu shatukilile na kukamudhengeya mavoko na kukamutcemba. ²¹ Munendi nguendi, 'Tata, njina vihitha kumesho a Kalunga na kuli yove. Keti lalo unjithane munove.' ²² "Yishe ua lekele vindungo vyendi nguendi, 'Neheni vuathi vidhala vyachili mu mudhaleke, na kumuhaka mununga kumunye uendi, na vinkaku kumyanja yendi. ²³ Keho neheni muna ntueyi ua kuhindala mu yi tcihye. Lingeni tujolele ku chilika echi! ²⁴ Mukonda munange uatcile, ngechi na hinduka. Ua dhimbalele, vuno na jomboloka.' Keho va shangumukile kujolela. ²⁵ ''Haje mona ua mukuluntu uachikele mulihya. Muedhile a hete hamuhyehi na limbo, uovuile madhina na vantu va kina. ²⁶ Ua thanene ndungo umo ua kumuihuile nguendi vyuma vika vyakama vilimo. ²⁷ Ndungo ua mulekele nguendi, 'Munanoko neja keho yisho ngechi na mu tcihila muna ntueyi mukonda nahiluka nakuheta muachili.' ²⁸ "Mona uje ua mukuluntu ua vavalethele mbunge yendi keho ka kovelelemo muimbo, keho yishe ua tuhukileko na kuka mu dhembeleka. ²⁹ Vuno mona ua limbuluile yishe nguendi, 'Tala, myaka yoshe eyi njina kupangela, nahamo hahi honja jeneka kukuononoka, vuno koua nji hanene nambe muna mpembe njilithambe navavu thamba, ³⁰ vuno muaneja munove, ou navihitha muono uove na vukuidhi, una mu tcihila muna ntueyi ua kuhindala. ³¹ "Yishe ua mu lekele nguendi, 'Munange, ove nange uakala vintcimbu vyoshe, na vyange vikevyo vyove. ³² Cha chili tulithambe na kujolela, mukonda ou munanoko ua tcile, vuno na hinduka, ua dhimbalele, vuno na tuna mu uana.'''