¹ Vuno kunima yevi muene ua hanguile vavo makumi atanu na avali, keho ua vatumine vavali na vavali kulutue luendi kumembo oshe nakumihela yoshe kuje kuayonguele kuya vavenya. ² Keho ua valekele nguendi, '' Mbuto yayingi, Vuno vaka kutya vakevo va vandende. keho lombeni kuli muene ua vimbuto, linga atume vaka kutya mbuto. ³ Yeni mungila yeni. Taleni, ange njimituma ngue vana vadhinjui mukati kaminguli. ⁴ Keti muambate nkombe ya vimbongo, nambe nkombe yavidhala nambe vinkuaku, nambe keti mulikunde naumo yomu uana mungila. ⁵ Nkala mu njivo yomu kovela, hambangelo ngueni, 'Chivovo chikale munjivo yino!' ⁶ Nga muntu ua chivovo muali omo, na chivovo cheni chika kala hali yikeye, vuno honi nga uahi, chika hiluka kuli yeni. ⁷ Kaleni munjivo oyo vene, nakulya na kunua viye vyoshe viva mi hana, mukonda muka kupanga nafuila ku uana fueto yendi. keti muendangane tunda njivo ya njivo. ⁸ Nkala mbongi yimu ka kovela, keho va mi tambula, lyeni viye vyo va mi hana. ⁹ keho kanguitheni vaka kuvavala vaye vali oho. Valekeni ngueni, 'Vumuene vua Kalunga vuneja vuli hamuhyehi neni.' ¹⁰ Nkala mbongi yoshe yomu kovela vaye kova mi tambuile, tuhukeni yeni kudhi ngila dhadho naku kuanya ngueni, ¹¹ 'Nambe likungu lyamu mbongi yeni lina kakatela kumyanja yetu tu mi kukumuina lyo! vuno dhivukeni ngueni: vumuene vua Kalunga vuneja ha muhyehi.' ¹² Njimileka nguange hali tangua olyo lyakupangula mbongi yiye yikavihya muakama kutuvakana Sandoma. ¹³ Ngongo yove, Kolazine! Ngongo yove Mbetesainda! Vipanga vya kama viye viva mi pangelele nga vavi pangele kuTile na Sindone, nga va tenguluka laya, na kutumama muvidhala vya vi nshako na mu lito. ¹⁴ Keho hakupangula vaka tolilila muakama vaka Tile na Sindone kumi tuvakana yeni. ¹⁵ Nove, Kapenama, uthinganyeka nguove namuilu vaka kushangala ndi? Kuahi, vakaku neha muchimbongo chakutca. ¹⁶ Uoshe uye ami tolilila anji tolilila yange, na uye ami vyana anji vyana yange, nga anji vyana yange avyana uye ua njituma.'' ¹⁷ Vaye makumi atanu na avali vahilukile nakuyolela, na kukuanya nguavo, ''Muene, nambe vimpundhi vya kuvihya vina tuononoka mulidhina lyove.'' ¹⁸ Yesu uava lekele nguendi, njina kamuene Satana aua muilu ngue muhyato. ¹⁹ Taleni, njina mihana mpoko yakulyatangela manoka navinye, na ndhili yoshe yachitodhi, keho navimo vyahi vika mi vetuetha. ²⁰ Nambe ngocho keti muyolele muli yevi lika, mukonda vimpundhi vina myononoka, vuno yoleleni muakama kama muomu madhina eni vana athono muilu.'' ²¹ Ku ntcimbu yiye vene ua yolelele mumpundhi yakuyela, naku kuanya nguendi, ''Njiku shangala, Tata, Muene ua muilu na hano hantci, Mukonda vyuma evi uavi shuekethele kuva ka mana muku jeneka kuvyuvuithitha Keho vi nayombolola kuli vaye vayenekele kulongetha, ngue vanike va vandende. Mukemo, Tata, mukonda cha kele cha chingulu kumesho ove. ²² Vyuma vyoshe na vitcelela muli yange Tata, naumo uahi adhivuka Mona kuvanga Yishe, naumo uahi adhivuka yiya Yishe kuvanga Mona na vaye voshe vana hangula Mona linga mu kulekethe yendi.'' ²³ Keho ua tengulukile kuli vandonge vendi muvu shueke nguendi,'' Vavedhuka vaye va mona vyuma viye vi muli nakumona yeni. ²⁴ Ange njimileka nguange, vapolofete va vengi na vimyene va kele nachidhango linga vamone evi vi mumona yeni, keho ko vavi muene, keho muku vua vyuma evi vi muli nakuvhua yeni, keho kova vyuvuile vakevo.'' ²⁵ Taleni, umo mulongisi ua majui alishiko ua katukile naku muetheka, nguendi, ''Mulongisi, vika njika panga linga njika hinge muono ua kumyaka yoshe?'' ²⁶ Yesu ua mulekele nguendi,'' vika vana thono mumeji ali shiko?vati ue ku atanda ?'' ²⁷ Yikeye ua mu limbuluile na ku kuanya nguendi, uka yongola muene Kalunga kove nambunge yove yoshe, na muono uove uoshe, na ndhili yove yoshe, na mana ove oshe, nava vo ua lihata navo ngue yove vavenya.'' ²⁸ Yesu ua mulekele nguendi,'' una kuanya mua chili. panga evi, keho ukovoka.'' ²⁹ Vuno yikeye, ua yonguele kuli thambuetha yendi vavenya, ua kuanyene kuli Yesu nguendi, Lihalembo lyange motua lihatela yiya?'' ³⁰ Yesu ua mulimbuluile naku kuanya nguendi, ''Lyala umo ua tundile ku Yelusalema ua shelelele ku Yeliko. Kundhimba yendi ua kovelele muvidhi, vaye vamu vutuile vithala vyendi, na kumupupa, keho vamu thile lyilenge lenge. ³¹ Mu kantcimbu vene mulongisi ua shelelele mungila yiye vene, Keho mua mumuene, ua muongo lokele. ³² Haye vene lalo Kalevi umo, mua hetele kumuhela uye nendi ua mumuene, ua muo ngolokele. ³³ Vuno kaSamalia umo, muye muvu ngendhi muendele, muedhile kuye kuakele, Omo uamu muene, uamu vuililile ngodhi. ³⁴ Ua mushuenene naku kukuta ha vimbandu vyendi, naku hakako madhi, na vinyu. Ua mulondekele hachi ndongi chendi vavena, ua mutualele kunjivo yava ngendhi, naku munyunga. ³⁵ Litangua lya ku shuamako ua nonene vimbongo vivali vyapalata, naku vahana vakua kunyunga, naku veshika nguendi, 'mutaka metheni, Keho vyoshe vimuka vihitha, muye monjika hiluka njaku mifuetavyo.' ³⁶ Yiya munathinganyeka ha kati ka vatatu ua kele lihale mbo lya uye uali uanene nava kua ku puandja. ³⁷ Yikeye ua kuanyene nguendi,'' uye ua muvuilile ngodhi, keho Jesu ua mulekele nguendi, Kaye uka pange ngachiye vene. ³⁸ Omuo mova yile mungila yavo, yikeye ua kovelele mulimbo limo, na umo mukentu ua kuluka mata ua mutambuile kundjivo yendi. ³⁹ Na yikeye ua kele namu nayina uendi ua mukentu, lidhina lyendi Maliya, yikeye ua tumamene kumianja ya Muene naku tolilila liji lyendi. ⁴⁰ Vuno mata ua kele nachi shoti ntcimbu yoshe chaku panga vyakulya. keho uedhile kuli Yesu na kukuanya nguendi , '' muene, ko ua kele nachi shoti mukuenje uange na njethelela nji pange lika lyange? ngocho muleke anji kuatheko. ⁴¹ Vuno muene ua mulimbuluile na kuanyene nendi nguendi, mata, mata, uli na kuli yandetha navyuma vyavingi. ⁴² Vuno chuma chimo lika chachingulu ho, chana hangula Maliya, naumo uahi aka mutambula cho.