¹ Mu Engeli wa ghutano kwa veta naku shiva rumbendo rwendi makura anu mono ntunguru ya ku liwiru kuna wera pa livhu. Karunga atapa tjapi ku ntungwedi yaku likwina lyaku dama lyaku pira shinko lyaku shirongo sha vafe. ² Opo va paturura kuno ku likwina lyaku dama lyaku pira shinko lyaku shirongo shava fe shaku ntji, makura muti wa kuntji wa ghupyu waghu yingi kwa rupuka mo mu likwina. Makura mu liwiru namu mpepo kwa yura muti ntani liyuva kwa shovagana mukonda ya muti wa ghuyingi mu liwiru. ³ Limbonde kwa rupuka litunde kuntji kumwe na muti viyende pa ntunda ya livhu, ntani limbonde kwa lipire nkondo daku shuma vantu yira da vange vapa livhu va ghushungu. ⁴ Hompa Karunga kwa tantera limbonde ashi kwato ku djonaghura mushoni wa ghuteke ntani kwato ku djonaghura vitondo na vimenwa vya mahako gha mateke, nane ngoli Karunga kwa tapa nkondo daku hepeka vantu vaku pira viyivito vya Karunga ku vipara vyavo vyaku mutwe. ⁵ Karunga kapi atapire nkondo kwa limbonde daku dipaya vano vantu va fe, nane ngoli kwa tapa nkondo daku vahepeka shirugho shaku tika ku makwedi matano. Limbonde nkene kuna ku shumu ku yuvha ku kora ghunene yira nge wamu livhu ana ku shumo. ⁶ Pa ruvede runo vantu ku shana ashi ndi kuna fu tupu ndi hashako ano ngoli ruvede rwa kufa kapi rwa kalirepo. Kehe pano vantu vana ku shana ashi ndi kuna fu tupu, ani hawe ruvede rwa mfa pato ntani mfa kuna dongonokapo. ⁷ Lino limbonde kwa fanine yira nkambe dava kavita dina ku wapayikiro dikarwe vita. Ku mutwe wa limbonde kwa dwatire nkata ya kufana ya ngorodo, ntani vipara kwa fana yira vipara vya vantu. ⁸ Ntani kwa kara na huki dadire daku fana yira huki da mukadi, ntani mayegho gha limbonde kwa fana yira mayegho gha nyime. ⁹ Limbonde kwa dwata vikugho pa nturo vyaku kandura naku tjayira vikutji, ntani paku tuka liyende muwiru mavava kupupira ghunene yira nkambe daku duka ghunene daku koka matemba na vikoto na tukaru-kara twava kavita. ¹⁰ Limbonde kwa kalire na dimushira naku fana yira dava nge; nkondo daku shuma naku hepeka vantu shirugho shaku tika ku makwedi matano kwa kalire ku mushira. ¹¹ Lino limbonde kwa kalire na Hompa wavo wamu Engeli waku shirongo sha vafe sha kuntji shaku pira shinko. Lidina lyendi muliraka lya Ruhebeli Abadoni, ntani muliraka lya RuGereka ndje Apoliyoni, ku tanta ashi, mudjonaghuli. ¹² Runyando na lihudi lya kuhova vina kapita. Kenga! Weno shimpe kuna hupara vishoroka na mahudi maviri ana karo kumeho. ¹³ Mu Engeli wa ghutano-na-ghumwe kwa shiva naku veta rumbendo rwendi, makura ame anu yuvhu liywi kuna kutunda ku ruvinga mu huka ne dashidjambero sha ngorodo shaku meho ya Karunga, ¹⁴ ntani liywi kuna kughamba kwa mu Engeli wa ghutano-na-ghumwe ghuye kuna kwaterere rumbendo ashi, ''Shutura naku mangurura ovano va Engeli vane vakaro mu mango kuntji yamu mukuro wa Eufurati wa ghunene.'' ¹⁵ Vano va Engeli vane kwa taterera ngava va mangurure muvirugho vino, namu maliyuva ghano, namu kakwedi kano, ntani namu mwaka ghuno makura ava vashutura ava dipaya shighutatu sha vantu vamu ghudjuni. ¹⁶ Shivaro sha vakavita vaku ronda pa nkambe kwa tika ku mamiliyuna mafere maviri. Ame kwa yuvire muntu kuna ku tapa shivaro shava rondi va nkamba ku kwande ¹⁷ Ame kwa monine dino nkambe ntani na varondi va vayingi ku ndjodi: Vavo kwa dwatire vikugho vyaku tjayira vikutji pa nturo davo vya marudi ghaku ku shuva-shuva, vyavi geha vyaku twera yira mundiro, ntani vyaku shovagana yira liwe lya kupya ku mundiro ntani vya shina lihenga vyaku fana yira liwe lyaku twera mundiro. Ku mutwe wa nkambe kwa fana yira mutwe wa nyime, ntani paku duka ghunene dino nkambe mutunwa ku shetera naku ruka mundiro, na muti ntani na ntutu yaku fana yira mundiro. ¹⁸ Olino lihamba na ghushungu waku rupuka mu kanwa ka nkambe: lihamba lya mawe ghaku twera yira mundiro, na muti waku tunda mu mayuru, ntani na ntutu yaku rupuka munturo, kwa dipayire shighutatu pa vantu vamu ghudjuni. ¹⁹ Nkondo da nkambe kwa kalire mukanwa ntani naku mushira - mushira wa nkambe kwa fanine yira mutwe wa liyoka lya ghushungu, waku shuma naku remeka vantu vakare na vironda pa rutu. ²⁰ Vantu ovo vahupiropo, ovo vapiliro kufa kwa lino lihamba na mahepeko, vavo kapi vaku shighulire va shayeke naku tjindja ghukaro wavo waku ruwana ghurunde, ntani kapi va shayeka ku tapa mfumwa ku viruwana vya maghoko ghavo naku tongamena mpepo dadidona ntani naku karera va Karunga va ngorodo, na Sisiliveli, na ngoporo, na mawe, ntani na vitondo - vininke vyaku pira mulyo, kwato ku kenga, kwato ku yuvha ntani kwato kuyenda. ²¹ Na mpindi ngoli, vavo kapi vaku shighura naku tjindja ghukaro wavo va shayeke kudipaya vantu, naku ruwana ghupure na ghurodi, na rushonda rwa djanyi ntani na widi waku vaka.