¹ Ndjwighona opo ya tjora naku paturura likumba lya ghutano-na-ghuviri, muliwiru kwa mwena teyete ghure wa shirugho shaku tika ku ghukahe wa viri. ² Makura ame anu mono va Engeli vatano-na-vaviri kuna yimana kumeho ya Karunga, kuna kughupa naku tambura marumbendo matano-na-maviri. ³ Ame anu mono mu Engeli ghumwe kuna kuya, kuna kwaterere shisha sha ngorodo shavi tutumukita vyaku nuka lidumba lya liwa, kuna yimana ku shidjambero shaku tutumukita muti waku nuka lidumba lya liwa. Karunga kwa tapire kwamu Engeli vitutumukita vya muti wa lidumba lya liwa vyavi yingi ghunene adjambe ndjambo naku tapa ndapero ku vantu vaku pongoka pa shidjambero sha ngorodo shaku meho ya shipundi sha ghu Hompa. ⁴ Makura muti wa lidumba lya liwa - ntani na ndapero da vantu vaku pongoka - adi tundu mu lighoko lyendi di kanduke mu liwiru kwa Karunga. ⁵ Makura mu Engeli aghupu makara ghamu ndiro pa shidjambero atura pa shisha shaku yura. Makura avhukuma ghano makara pa ntunda ya livhu, makura mushirongo amu kara marughadi ghaku vema, naku ndunduma, na mawe ghaku vema yira mundiro ntani na livhu lyaku kankama. ⁶ Va Engeli vatano-na-vaviri kuna kwaterere marumbendo matano-na-maviri kuna ku wapayiki muku veta naku shiva. ⁷ Mu Engeli wa kuhova afudu naku shiva rumbendo rwendi, mpopo tupu mvhura ya mawe ntani na mundiro waku kuvhonga na honde ku tameka kuroka. Makura yino mvhura ayi roko naku wera pa ntunda ya livhu kumwe naku djonaghura, shighutatu sha livhu lyamu ghudjuni alirokota naku djonaghuka, ntani shighutatu sha vimenwa na vitondo avi rokota na kupya ku mundiro, ntani mushoni wa ghuteke wamu ghudjuni kwapya na ghuntje. ⁸ Mu Engeli wa ghuviri kwa shiva rumbendo rwendi, mpopo tupu ndundu ya yinene yaku twera mundiro kwayi vhukumina mu lifuta. Shighutatu sha mema ghamu lifuta kwaku tjindja akare honde, ⁹ ntani shighutatu shavi na monyo vyamu lifuta kwafa, ntani shighutatu sha vikepa kwa djonaghuka naku dama. ¹⁰ Mu Engeli wa ghutatu kwa shiva rumbendo rwendi, ntungwedi yaku wiru ya yinene kwa wera pa livhu, yaku twera naku tema ghunene yira ramba, kwa wera pa shighutatu sha dimukuro ntani namu madiva gha mema. ¹¹ Lidina lya yino ntungwedi kuyi twenya ashi ghushungu. Shighutatu sha mema agha ku tjindji ghakare ghushungu, ntani vantu va vayingi kwafa paku nwa mema gha ghushungu. ¹² Mu Engeli wa ghune kwa shiva rumbendo rwendi, liyuva kwa kombanita shighutatu sha nkondo daku tweda liyuva, ntani ka kwedi kwa kombanita shighutatu sha nkondo daku tweda ka kwedi ntani ntungwedi kwa kombanita shighutatu sha ntunguru daku wiru kwa tundako. Vino vitatu kwa kombanita shighutatu ku nkondo daku tapa ghukenu makura aku kara mundema waghunene; liyuva, na ka kwedi ntani na ntunguru navintje kwa kombanita nkondo daku tapa shite makura aku kara mundema wa ghunene. ¹³ Ame anu mono, naku yuvha likuvi kuna kutuka ku wiru kuna ku yiyira na liywi lyaku dameka ashi, ''Lihudi, Lihudi, Lihudi, ku kwenu mwa tungo pa ntunda ya livhu, mukonda shi ntantani ngava shive naku fuda marumbendo ghavano va Engeli vatatu vana hupopo.''