¹ Makura ame anu mono liwiru lya lipe na livhu lya lipe, mukonda shi liwiru lyaku hova na livhu lyaku hova kwa tundapo naku dongonokapo, ntani lifuta kwa tundapo. ² Ame kwa mona shitata shaku pongoka, sha Yerusalemu ya yipe, kuna ku sheghumuka shitunde mu liwiru kwa Karunga, kuna wapa naku fughura yira momu vadwatekanga mukamali waku kwara liwiwili pa shilika shendi sha nkwara vamu tape kwamu kafumu wendi. ³ Ame kwa yuvha liywi lyaku dameka kuna ku tunda mu liwiru ku shipundi sha ghuHompa kuna ku ghamba ashi, ''Kengenu! Mbara ya Karunga kuna kara mukatji ka vantu vendi, ntani ghuye nga tunga kumwe na vantu vendi. Vano vantu ngava kara muhoko wa Karunga, ntani Karunga nga tunga kumwe na vantu vendi ntani ghuye nga kara Karunga wavo. ⁴ Karunga nga kokota maruntjodi ghatunde ku shipara shavo, vavo kapi nka ngava vhura fa, ntani kapi ngava kara na liguvo, ntani kwato malira nkali, ntani kwato tjutju naku kora. Mukonda shi ghukaro waku hova ngaghu shaya ntani ngaghu dongonokapo. ⁵ Oghu ashungiro ku shipundi sha ghuHompa aghamba ashi, ''Kengenu! Ame kuna ku ruwana vininke navintje vikare vya vipe.'' Ghuye aghamba nka ashi, ''Tjanga dino nkango naku ghamba mukonda shi dado nkango da ghushili ntani da lihuguvaro.'' ⁶ Ntani ghuye aghamba nka ku kwande ashi, ''Ame na mana kuruwana navintje vinapu ntani vina tikilirimo! Ame waku tameka waku hoverera ntani ame waku ka hulilira. Kehe ghuno waku fa linota nga kanwa mema ghama ghoko-ghoko ghaku pupa mu mukuro waku tapa liparu lya monyo wa naruntje. ⁷ Kehe ghuno waku funda vino vita ngaka wana ghupingwa naghuntje, ntani Ame nganu ka kara Karunga wendi, ntani ghuye ngaka kara monande. ⁸ Ano ngoli kuhamena kwa vantu va magova, na vantu vaku pira lipuro, na vantu vaku nyata, na vantu vaku dipaya vantu, na vantu va rushonda, na vantu va vapure, na vantu vaku karera vaKarunga va vimpempa navantje, ntani na vantu vaku ghamba vimpempa, vantu va weno navantje ngava kava vhukumina mu likurudiva lyaku twera mundiro wa mawe waku pire kuveva. Ku tanta ashi dino mfa da ghuviri. ⁹ Mu Engeli ghumwe wamu katji kava Engeli vatano-na-vaviri kwaya ku kwande, ghuye kuna kwaterere shisha sha kadukuru sha kuyura mahepeko ghaku tika ku matano-na-maviri ghaku hulilira, aya ku kwande naku ghamba ashi, ''Yakuno ku kwande. Ame nuku neyede mugholikadi, wa likwareko ogho nga kwara na Ndjwighona.'' ¹⁰ Makura Mpepo ya Karunga ayi ntwara kuwiru anu ka yimana pawiru ya ndundu yayinene yayire makura mu Engeli a neyeda shitata shaku pongoka sha Yerusalemu kuna ku sheghumuka kuna ku tunda muliwiru kwa Karunga. ¹¹ Mu Yerusalemu kwa yuramo ghuyerere wa Karunga, ntani na shite shaku tema naku payima ghunene yira liwe lya diyamande ya ndiro, lyaku vembera yira shitarero ndi mungwa wa ghukenu wa Yasipasi, waku vembera yira likende. ¹² Shitata kwa kara na likuma lya lire, ntani na mavero murongo-na-maviri, ntani nava Engeli murongo-na-vaviri vaku kunga pa mavero. Pa mavero naghantje kwa tjangapo madina murongo-na-maviri ghadi muhoko dava Isirayeli. Kehe pano pa livero kwa tjangapo lidina lya muhoko wa Isirayeli. ¹³ Ku ghupumeyuva kwa karako mavero matatu, ntani ku ghucuma kwa karako mavero matatu, ntani ku ghutokero kwa karako mavero matatu ntani ku ghumboyera kwa karako mavero matatu. ¹⁴ Likuma lya shitata kwali tatekera naku litungira pa mawe murongo na maviri ghakuntji ghaku kwata likuma likore, ntani pa mawe ghano ghakuntji murongo-na-maviri pa kehe liwe kwa tjangapo madina ghava Apositoli murongo-na-vaviri va Ndjwighona. ¹⁵ Mu Engeli oghu aghambiro name ghuye kuna kwa terere shifanikito na shimetito sha ngorodo kuna kuyenda aka mete ghunene wa shitata, na mavero, ntani na likuma. ¹⁶ Shitata kwa shidika kwa kara na huka ne; kehe yino huka kwa kara na maruha matatu gha vinema; muna ghure ntani namu mpati ntani naku yeruka kuwiru. Mu Engeli kwa meta ghunene wa shitata na shimetito shendi, kwa wana shinema sha kutika ku kilometa mayovi maviri na mafere maviri (shinema sha maruha naghantje matatu: munaghure, na mumpati ntani namu mutika waku yeruka kuwiru). ¹⁷ Ntani mu Engeli kwa meta ndopi na ghunene wa mpu ya likuma, kwa wana metera dimurongo ntano-yimwe-na-ntano-na-yimwe (shimetito shamu Engeli kwa shetakana na shimetito sha vantu). ¹⁸ Likuma lya shitata kwali tunga na mawe gha diyande gha ndiro gha Yasipasi ntani shitata ko shene kwashi tunga na ngorodo yene-yene yaka huroko, yaku moneka yira likende lyaku vembera. ¹⁹ Likuma lya shitata kwali tateka naku litunga naku lilimbaghura na mawe gha ndiro ghaku kora gha mawa gha ghufughuli ghaku ku shuva-shuva. Liwe lyaku hova lyaku tateka lya diyamende ya Yasipasi, lya ghuviri liwe lya Safira, lya ghutatu lya Agate, lya ghune lya Simaradi, ²⁰ lya ghutano lya Serenedonisiki, lya ghutano-na-ghumwe lya Sarediyoni, lya ghutano-na-ghuviri lya Kilisonalite, lya ghutano-na-ghutatu lya Bereli, lya ghutano-na-ghune lya Topasi, lya murongo lya Kilisoparasusi, lya murongo na limwe lya Hiyasinte, ntani lya murongo-na-ghuviri lya Ametusite. ²¹ Mavero murongo-na-maviri ghamu shitata kwagha ruwana na makwarara gha ndiro murongo-na-maviri; kehe livero kwali ruwana na likwarara limwe tupu. Ndjira damu shitata kwadi ruwana na ngorodo yene-yene ya ndiro, yaku moneka yira likende. ²² Ntani ame kapi na monine mo Ntembeli mu shitata, mukonda shi Hompa Karunga wa nkondo nadintje ntani na Ndjwighona mbo vakaro Ntembeli yamo. ²³ Shitata kapi mwa hepa ku kara liyuva ndi ka kwedi kaku tema naku tapa shite na ghukenu mukonda shi ghuyerere wa Karunga ngo waku tema naku payima, ntani Ndjwighona kwa kara ramba yamu shitata. ²⁴ Dimuhoko damu ghudjuni kuyenda mu shite namu ghukenu wamu shitata. Ntani vahompa vamu ghudjuni ngava yita mo limona mushitata ngava fumadeke Karunga na Ndjwighona. ²⁵ Mavero ghamu shitata ngagha paturuka shirugho na shintje, mukonda shi kapi ngaku kara matiku. ²⁶ Vahompa vamu ghudjuni ngava yita maghushwi na limona mu shitata ngava fumadeke naku yita mo ghuyerere, ²⁷ kwato vantu vaku nyata ngava ngeno mo, ntani kwato vantu vaku ruwana vya ntjoni ndi vaku ghamba vimpempa ngava karo mo, nkwandi vantu vaku hungama tupu ovo vatjanga madina ghavo mu mbapira ya Monyo ya Ndjwighona.