¹ Mu Engeli ghumwe wamu mbunga yava Engeli vatano-na-vaviri ovo vakwatiliro vino visha vya tudukuru vitano-na-viviri kwaya ku kwande naku ghamba ashi, ''Ronda ghuye kuno, nuku neyede mukadi wa rushonda akaro na ghurunde wa ghunene ntani Karunga ngamu pangura mukonda shi ghuye mukadi wa rukeshe ntani kwa shungira pa mema gha mayingi, ² va Hompa vamu ghudjuni kwa rara naye ntani kwa shondera naye, ntani vantu vamu ghudjuni kwa nwa mo mu vinyu ya rushonda rwendi mbyo va korwa.'' ³ Makura mu Engeli andamuna antwara mu Mpepo nuyende mu mburundu, makura anu kamona mukadi kuna shungiri pa mutwe wa shikashama shashigeha osho vatjanga madina gha mayingi ghaku shwaghura Karunga. Shino shikashama kwa kara na dimutwe ntano-na-mbiri ntani na mbinga murongo. ⁴ Ghuno mukadi kwa dwata vyuma vya vigeha vya ghufughuli na maghurenga, ntani ghuye kwa dwata viranda vya ngorodo, na mawe ghandiro ntani na makwarara ghandiro. Ghuye kwa kwaterera nkinda ya ngorodo mulighoko lyendi yaku yura vihuna vyendi na ghushungu wa rushonda rwendi. ⁵ Pa shipara shendi kwa tjangapo lidina lyaku horama, lino lidina kwa tanta ashi: ''Ame Babiloniya shitata shashinene, ghuye ndje nyokwa ogho ayito vakadi varushonda navantje ntani ghuye kwa ronga vakadi vayive viruwana vya rushonda na vihuna ntani na ghurunde wapa ntunda ya livhu.'' ⁶ Ame kwa mona mukadi kuna korwa honde ya vantu vaku pongoka va Karunga ntani na honde ya vantu vaku yuvita Mbudi Ya Ruhafo ya Jesus. Opo na monine ghuno mukadi, ame kwa tetuka. ⁷ Ano ngoli mu Engeli kwa mpura ashi, ''Vinke ghuna ku tetuka? Ame kunu ku tantera ashi vinke vya tanta kuhamena ghuno mukadi ntani navi sha tanta shino shikashama ana rondo ghuno mukadi, shikashama sha dimutwe ntano-na-mbiri ntani na mbinga murongo. ⁸ Shinya shikashama wa monine sha kaliroko pakare, kapi shina karapo weno, ntani kuna shana shi vhumbuke shitunde kuntji ya likwina lya lire lyamu shirongo shakuntji. Shino shikashama ngava shidjonaghurapo. Vantu ovo vatungo mu ghudjuni, ovo vapira kutjanga madina ghavo mu mbapira ya monyo ku tunda ku lishito lya ghudjuni - vavo ngava tetuka paku mona shikashama, mukonda shi shasho sha kaliroko pakare, weno kapi shina karapo, ntani shasho kuna shana ku vhumbuka. ⁹ Vantu kuna hepa ndunge na ghukonentu waku yiva vino. Dino dimutwe ntano-na-mbiri da shikashama opo ashungire ghuno mukadi kuna kara ndundu ntano-na-mbiri da vitata vya lipangero lyendi. ¹⁰ Ntani dimutwe ntano-na-mbiri kuna kara mbo vahompa vatano-na-vaviri. Va Hompa vatano vapwa kufa, ntani Hompa ghumwe ndje ana karopo kuna kupangera pa weno, ntani va Hompa vamwe shimpe kapi vamoneka, opo ngava moneka ngava karapo tupu shiruwo sha shifupi. ¹¹ Shikashama osho shakaliroko pakare, pa weno kapi shina karapo, shino shikashama kutanta ashi ndje Hompa wa ghutano-na-ghutatu. Naye ghumwe ahameno kwava Hompa vatano-na-vaviri ntani naye ngava kamu djonaghurapo. ¹² Dino mbinga murongo ghuna mono kuna kara vahompa ovo vapiro kuwana nkondo daku pangera virongo, vavo ngava kawana nkondo daku pangera shirugho shashifupi tupu kumwe na shikashama. ¹³ Vano va Hompa ntani na shikashama ngava kuyuvha ngava kare na maghano kumwe tupu ntani na mutjima ghumwe tupu, makura ngava tape nkondo na lipangero lyavo kwa shikashama. ¹⁴ Vavo ngava rwa vita na Ndjwighona. Ndjwighona ngayi funda vino vita mukonda shi Ndjwighona ndje Mushita wa vashita ntani na Hompa wava Hompa - vantu ovo va kaliro naye kuva twenya ashi, vapuli, mbovo vayita navo vatoghorora vaku limburuka vakare vantu vendi.'' ¹⁵ Makura mu Engeli aghamba ku kwande ashi, ''Mema gha mayingi ogho ghuna mono, opo ashungira ghuno mukadi wa rushonda, kuna kara mbunga ya marudi gha vantu, na mbunga ya dimuhoko, ntani na virongo vyaku ghamba maraka ghaku kushuva-shuva. ¹⁶ Odino mbinga murongo odi ghuna mono - na shikashama ku tanta ashi va Hompa murongo na shikashama ovo vanyengo ghuno mukadi wa rushonda. Vavo ngava mushutura nga kare muhere-here, ngava papaghura rutu rwendi, ntani ngava shora naku shwakerera rutu rwendi mu mundiro. ¹⁷ Mukonda shi Karunga kwa panga kare ashi vavo ngava tokora ngava kuyuvhe ngava kare dimutjima kumwe tupu makura ngava tape lipangero lyavo kwa shikashama nga shipangere dogoro nkango da Karunga ngadi tikiliremo nadintje. ¹⁸ Oghuno mukadi ghuna mono ku tanta ashi shitata shashinene oshi shakaro na nkondo daku pangera vaHompa navantje vapa livhu.''