¹ Ame anu mono shiyivito shashinene mu liwiru: Mukadi kuna dwata vyuma vyaku vembera vyaku fana yira liyuva, ntani ka kwedi kuna kara kuntji ya mpandi dendi ntani kuna dwata nkata ya mbungururu murongo-na-mbiri ku mutwe wendi. ² Ghuno mukadi kwa kalire na marutu maviri, kuna ku lira naku takuma ghunene mukonda shi lira lyendi lina kuru ntani kuna ku kora ghunene, ghuye kuna shana ku shampuruka mukeke. ³ Ntani nka ame anu mono shiyivito sha ghuviri kuna kara mu liwiru: Kenga! Ame kuna ku mona likongoro lya linene lya ligeha lyaku twera yira mundiro lyalyo kuna kara na dimutwe ntano-na-mbiri ntani na mbinga murongo, ntani kwa kehe ghuno mutwe kuna karako kuna dwata nkata. ⁴ Mushira wa likongoro kwa toghona naku ganda shighutatu sha mbungururu daku liwiru kumwe naku divhukumina diwere pa livhu. Makura likongoro aliya papepi na mukadi ali yimana kumeho yendi litaterere mukadi nga shampuruke mukeke, tupu nga rupuka mukeke mulira lyava wina, makura likongoro ngali mine ghuno mukeke. ⁵ Makura ghuno mukadi kwa shampuruka mukeke, wa mumati, akara mumati wa nkondo, ogho nga karo na nkondo daku pangera dimuhoko nadintje na mburo ya shikugho. Makura Karunga aghupu ghuno mukeke atundeko ku vawina ava mutwara mu liwiru kwa Karunga aka shungira ku shipundi sha ghuHompa kumwe na Karunga, ⁶ makura ghuno mukadi aduka naku tjwayuka ayende ku shirongo shamu mburundu, ku livhango oko vamu wapayikira Karunga oko ngaka vanda, oko ngaka kara naku murera ghure wa mayuva liyovi na mafere maviri na mayuva dimurongo ntano-na-yimwe (1260). ⁷ Pa weno mu liwiru kwa shapuka mo vita vya vinene: Mu Engeli Michael nava Engeli vendi kwa rwanita likongoro, makura likongoro nava Engeli valyo navo ava vyuta va rwanite mu Engeli Michael kumwe nava Engeli vendi. ⁸ Lino likongoro kapi lya kalire na nkondo daku rwana lifunde vino vita. Makura likongoro kwa kombanita livhango, kapi nka lya vhulire ku kara naku wana livega mu liwiru kumwe nava Engeli valyo. ⁹ Makura Karunga avhukuma lino limukongoro lyalinene - olyo lya kaliro liyoka pa kuhova pakare olyo kava twenyanga ashi mudjonaghuli ndi Satana, waku pukita vantu navantje vamu ghudjuni - kwamu vhukuma mo kumwe nava Engeli vendi, vatunde mo mu liwiru ava ku gandere pa livhu. ¹⁰ Makura ame anu yuvhu liywi kuna kutunda mu liwiru lyaku dameka kuna ku ghamba ashi: "Weno Karunga kuna yoghora vantu vendi na nkondo dendi dadinene daku pangera mu ghuntungi wendi, ntani weno kuna tapa nkondo kwa Kirisitus daku pangera ghuno ghudjuni. Mukonda shi muna vimpempa waku rundira vantu vaku pura mwa Hompa ntani na vakareli vaghunyetu, ghuye ku rundira vapuli matiku na mwi ku shipara sha Karunga, weno kuna muvhukuma mbyo ana tundumo mu liwiru. ¹¹ Vapuli na vakareli Karunga kwa funda Satana na Honde ya Ndjwighona oyo ya vafero ntani naku yuvita nkango da ghushili da ghumbangi wa viruwna vyavo ku vantu, vavo kapi va hokwire naku kwama liparu lyapa rutu, vavo kwa tapire monyo davo muku yuvita mbudi ya ghushili dogoro ku mfa davo. ¹² Anwe mwa tungo mu liwiru, weno karenu na ruhafo ntani namu mpora! Maghudito na vita na lihudi lya linene ku kwenu anwe vantu mwa tungo pa livhu ntani namu lifuta, mukonda shi mudjonauli Satana kuna mu vhukumini pa livhu ku kwenu! Ghuye kuna kara na lishandu ntani na ghugara wa ghunene, mukonda shi ghuye kuna yiva ashi kuna kara tupu na shirugho shendi sha shifupi shina hupoko. ¹³ Likongoro opo lya dimburura naku yiva ashi kuna livhukumini pa ntunda ya livhu, makura ali tjida-tjida naku kwama-kwama mukadi ogho ashampurukiro mukeke wa mumati. ¹⁴ Ano ngoli makadi kwamu pire mavava maviri gha likangakodi ghaku tuka ayambuke muwiru ayende mu mburundu ku livhango oko vamu wapayikira. Mukadi kwaka kara nkoko ntani Karunga kwamu pakera mbili naku murera nawa naku mukunga dogoro ruvede rwaku tika ku virugho viviri, na shirugho shimwe tupu ntani na ghukahe wa shirugho - mukadi kwaka kara ghure na liyoka, limukongoro. ¹⁵ Makura limuyoka aliruku mema ghatunde mu kanwa kalyo gha mayingi yira mukuro, mposhi ghano mema gha ruhandjo gha piture naku dipaya ghuno mukadi. ¹⁶ Makura livhu kwa popera ghuno mukadi. Livhu kwa yashama kanwa limine ghuno mukuro wa mema ogho lya rukire lino limukongoro waku tunda mukanwa kalyo. ¹⁷ Makura limukongoro ali garapa nka ghunene kwa mukadi, makura ali yendi lika rwanite ruvharo rwa mukadi, vantu vaku limburuka naku tikitamo nkango da Karunga ntani nava vaku yuvita Mbudi ya Ruhafo ya Yesus naku tapa ghumbangi wa ghushili waku hamena ku kwendi. ¹⁸ Makura limukongoro kwaka yimana kuntere ya lifuta pa musheke wamu lifuta.