¹ Mu Engeli atapa ku kwande rughu rwaku metita livhango. Karunga aghamba ku kwande ashi, ''Shapuka yenda muntembeli ghuka mete ghunene wa livhango lyamu Ntembeli ya Karunga na shidjambero sha munda ntani na shivaro sha vantu ovo vana kuraperero mo pa weno munda. ² Ntani kapi shi ghuka mete naku turako livhango lya pandje ya ntembeli, ghuna hepa ku lishuva ko, mukonda shi kwa litapa ku vantu vaku pira kupura mwa Hompa ntani naku va pagani. Vavo ngava djonaghura naku lyatangera shino shitata shaku pongoka ghure wa makwedi dimurongo ne-na-maviri. ³ Ame nganu tapa nkondo daku porofeta kuva mbangi vande vano vaviri ngava yuvite Mbudi ya Karunga ghure wa mayuva ghaku tika ku liyovi limwe na mafere maviri na mayuva dimurongo ntano-na-limwe (1260), vavo ngava dwata ntjako na vikoverero vyaku tavaghuka ngava kare mu liguvo namu malira-nkali.'' ⁴ Vano va mbangi vaviri ku tanta ashi mbo vitondo vino viviri vya maghuywe ntani na vitondo viviri vya maghuyweko gharamba mu ntembeli ovyo vya yimano kumeho ya Hompa Karunga mupangeli wa pa livhu. ⁵ Kehe ghuno waku shana ku dipaya vano va mbangi vaviri, mundiro ku tunda mu kanwa kavo waku vashora naku veveka vana nkore vavo. Kehe ghuno waku shana kuva dipaya vavo kumu dipaya na mundiro waku tunda mu kanwa kavo. ⁶ Vano vambangi vaviri kwa kara na nkondo daku pata liwiru yipire kuroka mvhura mu mayuva ogho ngava porofeta naku yuvita ya Mbudi ya Karunga. Vavo kwa kara na nkondo daku tjindja mema ghamu mukuro ghakare honde ntani nka kwa kara na nkondo daku yita lihamba lyamu kaghu mu ghudjuni ntani na mahepeko ghaku ku shuva-shuva kehe ghano vana shana. ⁷ Opo ngava mana ku yuvita naku tikitamo viruwana vyaghu mbangi wavo, makura shikashama shaku tunda mushirongo shava fe shakuntji mu likwina lyaku pira shinko nga shiya ku kwavo naku varwanita. Makura shikashama ngashi vahomokera naku va funda kumwe naku vadipaya. ⁸ Vimpu vya vano va mbangi vaviri ngavi rara mundjira yamu shitata sha shinene (ku tanta ashi shitata sha varunde shamu Sodomu ntani namu Egipite) oku vaka pampalire Hompa wetu ku shilivindakano. ⁹ Ghure wa mayuva matatu naghu kahe vantu vaku dimuhoko nadintje, na marudi naghantje, na maraka na ghantje ntani na vantu vaku virongo navintje ngavaya ngava mone marutu gha vimpu vya vano va mbangi vaviri vavo kuna rara mundjira pa livhu. Vavo kapi ngava pulitira kehe ghuno ashi nga vhumbike marutu ghavo mu mbira. ¹⁰ Vantu ovo vatungo pano pa livhu opo ngava mona vano va mbangi vaviri kuna fu, ngava kara na ruhafo rwa runene rwaku dana naku djombwana. Vavo ngava tapa maghushwi na vitapa ku vantu mukonda shi vano va Porofete kwa hepeka ghunene vantu va pano pa livhu. ¹¹ Kuruku rwa mayuva matatu na ghukahe monyo na Mpepo ya Karunga ngayi vyukira murutu rwavo, makura ngava rambuka ngava kara na monyo ngava twikire ku paruka. Vantu ngava kara na ghoma wa ghunene paku vamona. ¹² Ovano vaporofete vaviri ngava yuvha liywi lya linene kuna kutunda mu liwiru kuna ku ghamba ku kwavo ashi, ''Rondenu muye kuno!'' Vavo ngava ronda vayende mu liwiru ntani namu maremo, okuno vana nkore vavo kuna kuva mona omo vana karonda. ¹³ Pa shirugho opo ngavi shoroka vya weno, mu ghudjuni ngamu kara likankamo na likinko livhu lya lidito, ntani shighu-murongo sha matungo ghamu shitata ngagha djonaghuka naku bomaghuka. Vantu mayovi matano-na-maviri ngava fa ku likankamo naku likinko lya livhu, ntani vantu ovo ngava huparopo ngava kara na ghoma wa ghunene makura ngava tanga naku panda naku lira naku raperera va kuye lidina lya Karunga mushiti namu pangeli wamu liwiru. ¹⁴ Shishoroka shashidito sha mahepeko gha ghuviri shina kapita. Kengenu! Shishoroka shashidito sha ghutatu kuna ku kwangura kuya weno pa pepi shina kara. ¹⁵ Mu Engeli wa ghutano-na-ghuviri kuna ku shiva naku veta rumbendo rwendi, mkaura liywi lya linene kuna ku tunda mu liwiru naku ghamba ashi, '' GhuHompa na ghuntungi wamu ghudjuni weno ghuna kara ngoli ghuntungi na lipangero lya Hompa wetu ntani na Kristus wendi, ogho vapa nkondo nadintje daku pangera vantu vamu ghudjuni naghuntje ku naruntje naku naruntje.'' ¹⁶ Ntani ghano matimbi dimurongo mbiri-na-vane ovo vashungiro ku vipundi vyavo vyaghu Hompa ku shipara sha Karunga, kwaku gandera pa livhu va tongamene kwa Karunga. ¹⁷ Vavo kwa ghamba ashi, ''Atwe ku kupandura ove, Hompa Karunga wa nkondo nadintje, ove ghuna karoko ntani ove wa karoko naruntje naku naruntje, mukonda shi ove kwa funda vana nkore voye navantje ntani weno ove mbyo ghuna ku pangera vantu vamu ghudjuni naghuntje. ¹⁸ Vantu vaku virongo vya peke vaku pira kupura mu moye kuna garapa ghunene, makura ove mbyo ghuna tuma ghugara ghoye na lishandu lyoye papavo. Shirugho shina tikimo shaku pangura va fe ntani naku tapa mfuto ku vantu vaku limburuka naku tikitamo veta doye ntani nava Porofete voye kumwe na vantu vaku pongoka va Karunga, vaka makuto ntani nava hepwe. Shirugho shina tikimo weno shaku djonaghurapo vantu ovo va djonaghuro vino virongo vyapa ntunda ya livhu.'' ¹⁹ Makura Karunga agharura livero lya ntembeli yendi yamu liwiru yikare kuna gharuka ntani ame anu mono limbangu lyama gwanekero kuna kara munda ya ntembeli ya Karunga. Makura ame anu mono maruvadi ghaku vema, anu yuvhu maywi ghaku ndundumo, na livhu lyaku kankama ntani na mvhura yaku roka ya mawe.