¹ Ame anu mono nka mu Engeli ghumwe wa nkondo kuna ku tunda mu liwiru kuna ku ghurumuka. Ghuye kuna mukundurukida liremo, ntani pa mutwe wendi kuna karapo likongoro lya maruvara. Ku shipara shendi kuna ku twera naku vembera yira shite sha liyuva ntani ku maghuru ghendi kuna fana yira ngundi yaku twera mundiro. ² Ghuye kuna kwa terere mu lighoko lyendi mbapira ya yididi, oyo vana fikura. Ghuye kuna yimana ndjikiti ntani lighuru lya mpadi yendi yaku rulyo kuna lyata mu mema mu lifuta ntani lighuru lya mpadi yendi yaku kamontjo kuna lyata pa palivhu pa ghurundu. ³ Ghuye ayiyiri na liywi lyaku dameka ghunene yira nyime waku nunga. Opo aghambire naku dameka, ame anu yuvhu marughadi kuna kutaghuka naku ndunduma rukando rutano-na-ruviri ntani muno mu liywi kwa tundiremo mbudi oyo na pilire kuyiva ovyo yina ku tanta. ⁴ Opo gha ndunduma ghano marughadi rukando rutano-na-ruviri, ame kwa tameka kutjanga ovyo na yuvire, makura liywi ali tundu mu liwiru kuna ku ghamba ku kwande ashi, ''Horeka yino mbudi ya maruvadi ghana ghambo rukando rutano-na-ruviri yikare kuna horama. Kapi shi ghuyi tjange.'' ⁵ Ghuno mu Engeli na monine kuna yimana ghuye kuna lyata mulifuta napa ghurundu, ghuye kuna yerura lighoko lyendi lyaku kalyo muliwiru. ⁶ Ghuno mu Engeli kwa ghana mughano mu lidina lyaghu akaropo virugho navintje naku naruntje, mushiti wa liwiru kumwe na navintje ovo vya karamo, ntani mushiti wa livhu kumwe na navintje ovyo vya karopo, ntani mushiti wa lifuta kumwe na navintje ovyo vya karomo, makura mu Engeli kwa ghamba ashi, ''Oyino mbudi naku ghamba ya ghushili ntani kuna kara mu nkwangu kwato nka maranga. ⁷ Lino liyuva opo ngali tikamo ghuno mu Engeli wa ghutano-na-ghuviri nga shiva naku fuda rumbendo rwendi, yino mbudi ya Karunga ya horamo ngayi tikiliramo, ngava yitapa naku yi yuvita, yira momu tupu vayi pumbire va Porofete vakare, naku yuvita mbudi ya ghuntungi wa Karunga. ⁸ Ame anu yuvhu nka liywi kuna ku tunda mu liwiru kuna ku ghamba ku kwande ashi: ''Yenda, ka ghupe mbapira mu lighoko lyamu Engeli ogho ana yimano mu lifuta napa ghurundu.'' ⁹ Makura ame anu yendi kwa mu Engeli anu mu tantere ayite ku kwande yino mbapira ya yididi. Makura ghuye aghamba ku kwande ashi, ''Ghupa yino mbapira ya yididi ghulye. Paku lya yino mbapira ku tovara ghunene mu kanwa yira ghushi wa mpuka, ntani mu lipumba ku kora na tjutju.'' ¹⁰ Ame anu ghupu yino mbapira ya yididi mu lighoko lyamu Engeli anu yilipo. Paku yilya kwa tovara mukanwa kande yira ghushi wa mpuka, ano ngoli paku mana kulya, mu lipumba lyande kwa tameka ku kora na tjutju ya yinene. ¹¹ Makura ghumwe aghamba ku kwande ashi, ''Weno ghuna hepa ku Porofeta naku pumba vyaku hamena ku dimuhoko dadiyingi, na virongo, na maraka ntani na vaHompa.''