¹ Shino shitata kwa yulire mbunga ya vantu pakare ano ngoli pa weno kuna kara muporongwa maghoko-ghoko. Shitata kwa fumanine ghunene pakare, ano ngoli pa weno kuna fana yira mukadi waku fita vyendi ana karo mughudike. Shino shitata kwa kalire na mfumwa yayinene yira mona Hompa wa mukadona wa muwa, ano ngoli pa weno mbyo ana kara yira mupika. ² Shino shitata kuna kulira naku kema naku gogoma maruntjodi kushipara matiku naghantje, kuna kara muliguvo ntani kuna yura maruntjodi kumatama naghantje. Vavo kapi vavhulire romba naku shungida kwa Hompa Karunga ava kwafe ano ngoli pa weno kwato ghumwe wa vaholi vendi waku va shengawida. Vaholi navantje kwamu shuva muliyome. Vantu navantje vamu shirongo kuna dimuvyuka, pa weno navantje vana kara vana nkore vendi. ³ Makura ruhepo na runyando aruya mushirongo, muhoko wava Yuda ava tjwayuka vatunde mo vayende ku virongo vya peke. Vavo ava katunga mu virongo vya peke ano ngoli kapi vaka tungire mu mpora kwa ka hepire ghunene. Vavo kapi vavhulire ku ku popera kuva na nkore vavo makura ava va fundu ava kutapa va va kwate vakare vapika. ⁴ Ndjira yaku yenda ku Ndundu ya Siyoni yina kara muporongwa kwato vaku pita mo vayende vaka dane mayuva gha vipito. Mavero ghavitata kuna yashama kuna kara muporongwa. Vapiristeli vamu shitata kuna kulira naku kema ntani kuna kara mu liguvo ghunene. Vakadona vamu Yerusalemu kuna ku lira naku kema mukonda shi vavo kuna kara muruhepo na runyando na liguvo. ⁵ Vana nkore vavo mbo vana karo vampititi va shitata shavo; ntani vana nkore vavo kuna kara muruviya mbyo va weka limona lya liyingi. Hompa Karunga kwa tapa matengeko ku vantu vamu Yerusalemu mukonda ya ndjo davo dadi yingi ku shipara sha Hompa Karunga. Makura vana nkore mbyo va twara vana vavo mu ghupika vayende ku virongo vya peke. ⁶ Shitata sha Yerusalemu kwa kalire na mfumwa na ghufuuli ano ngoli pa weno kwato mfumwa na ghufuuli. Vampiti va shitata kuna fana yira vikorama vya vamenye vamu wiya vaku fa ndjara mukonda shi kwato manyero, ntani vavo kapi nka vana kara na nkondo daku duka va tjire vana nkore vavo. ⁷ Weno vantu vamu Yerusalemu kuna kara muruhepo na runyando ntani nka vavo kwato mandi na mavhango ghaku tunga pa weno, makura vavo kehe pano kughayara ghunene virugho vya viwa vyaka pito opo va tungire mu ruviya. Ano ngoli pa weno vana nkore vavo vana ghupu naku shakana shitata shavo ku nkondo, kwato ghumwe waku vhura kuva popera. Vana nkore vavo kwa djonaghura shitata shavo ntani vavo ku shepa ghunene paku kenga omo vana guvu. ⁸ Vantu vamu Yerusalemu kwa kara mu ndjo dadinene kwa Hompa, shitata shetu kuna kara yira mukadi waku shampuruka mukeke wa kupita honde waku nyata pa rutu. Vantu va vayingi kwa fumadekire shitata shetu pa kare, pa weno kwato ogho ana kutu fumadeko, kuna kara tupu yira mukadi wa muhere-here kwato mfumwa. Vantu vamu shitata kuna kuhepa naku lira ghunene, kuna fana tupu yira mukadi wa muhere-here. ⁹ Shitata kuna nyata ghunene mukonda ya ndjo da vantu da diyingi. Kapi twa taterera ashi Hompa Karunga ngatu tengeka ku mayuva ghaku meho. Atwe kuna kara mu shiponga shashinene. Kwato oko tuna ku vhura kuwana mbatero ntani kwato waku tu shengawida. Weno atwe kuna kulira naku ghamba ashi, "Hompa Karunga wetu tufere nkenda, kenga vana voye omo vana kuhepa mukonda shi tuna kara nava na nkore va vayingi. ¹⁰ Vana nkore venu kwatu shakana limona lyetu na ghungagho wetu ntani na ghushwi wetu naghuntje wamu shirongo. Vantunda virongo vaku raperera kuva Karunga vavi mpempa vaku nyata, ovo wapira kupulitira kungena mu Ntembeli ya Hompa Karunga wa Kupongoka, weno navo kuna ku ngena mu Ntembeli yoye yaku pongoka vaka raperera ku koye. ¹¹ Vantu na vantje vamu shirongo kuna kara muruhepo mbyo vana kuyuvha ku kora na kulira, ntani shirongo na shintje kuna kara mu lirumbu na ndjara. Vavo kwa tapa limona lyavo na lintje mposhi va vhure kuwana ndya va paruke ntani va manguruke naku shutuka va tunde mughupika. Hompa Karunga wande, ame kuna ku shungida ku koye mpopere, ame kwato nkondo daku kupopera na ghumwande. ¹² Vantu na vantje vaku pita mundjira ku kwande vana ku kenga, ano ngoli kwato waku mfera nkenda waku mpopera? Kenga mu virongo na vintje, kwato vantu vana kuhepo yira momu tuna kuhepa atwe, Hompa Karunga kuna kuneyeda lishandu lyendi na ghugara na matengeko ghendi ku kwetu mukonda ya ndjo na ghurunde wetu. ¹³ Ame kuna ku yuvha murutu rwande yira kuna kupya mu mundiro waku tunda mu liwiru, ntani Hompa Karunga kuna teye shiraha mundjira nulyatemo mpadi dande shinkwate, makura nuvyuke ku kwendi. Ghuye kwa ntapa mu maghoko ghava nankore vande, ame kuna kara pa pentjande ntani kwato nkondo. Hompa Karunga kuna tura naku mangerera mudigho wa ndjo dande da ghudito pa ntingo napa mapepe ghande. ¹⁴ Ghuye kwa mangerera mudigho wa ndjo dande ghukare pa ntingo napa mapepe ghande. Paku hova na kalire na nkondo daku damuna mudigho ano ngoli pa weno kapi na kara nka na nkonda daku damuna mudigho, kuna bwakama tupu. Hompa Karunga kwa ntapa mu maghoko ghava na nkore vande, ame kwato nkondo daku kupopera. ¹⁵ Hompa Karunga kwa hanaghura vakavita vande va nkondo vaku kunga rutu rwande. Ghuye kwa yita mbunga ya vakavita va nkondo vaye ku kwande va homokere naku myona vakavita vande. Hompa Karunga kwa funda naku lyatanga muhoko wa va Yuda yira mandjembere ghaku yaveka vana tura muntjako vaghakame vaghupeko marovhu. ¹⁶ Atwe kwa lira ghunene, ntani kwa yura maruntjodi mu mantjo; ame kwato mupopeli; mupopeli wande kuna kara ghure name. Vana nkore vetu kwa kwata vakurona vetu kumwe na vana vavo mbyo va vatura navantje mughupika. Vantu ovo vatungo mu shitata sha Siyoni mu Yerusalemu kuna yandja maghoko vaku tape; vavo kwato waku va popera. ¹⁷ Hompa Karunga kwa tuma virongo vyama parambo ghavo vikare vana nkore va ruvharo rwa Yakopu. Mukonda shi shitata sha Yerusalemu kwa nyata. ¹⁸ Hompa Karunga kwa hungama, atwe kapi twa limburuka ku veta naku nkango dendi odo atapa ku kwetu. Tererenu ku kwande, namu vantje, kengenu omo naku hepa. Vana vande va vakadona kumwe na vakavita vande vankondo kwava kwata kwava twara mughupika. ¹⁹ Ame kwa shana mbatero kuva ghunyande ovo na huguvara, vavo kwa shwena, kwa konga vaghambe vimpempa ntani vavo kwato shinka shavo ku kwande. Va Pirisiteli nava mpititi vetu kwa fera momo mu shitata, muku shana ndya daku lya ndi va paruke. ²⁰ Hompa Karunga, kenga, omo naku hepa; murutu rwande kuna kukora ghunene, ame kuna guvu ghunene munda ya mutjima wande, ghushili ame kapi na limburuka ku nkango doye mbyo na yita lishwaghu kukoye. Vana nkore vetu kuna kutu dipaya na lighonga nkene tupu kuna rupuka pandje ya mundi, ntani munda ya mandi ghetu mo muna karo yira mayendo ghaku vhumbika vantu vakufa. ²¹ Vantu kuna ku yuvha omo naku lira kumwe naku shanda, ano ngoli kwato wakuya ampo pere. Vana nkore vande na vantje kwa yiva maghudito ghande, vavo mbyo va kara na ruhafo paku yuvha ashi Hompa Karunga kwa tapa matengeko ku kwetu. Hompa Karunga wande kwangura ku ruwana ovyo wa ghamba ashi mbyo ngavi shoroko ku meho; mposhi vana nkore vetu navo ngava hepe yira momu tuna kuhepa atwe. Hompa Karunga yita vantu vaku ruwana ghurunde ku shipara shoye vaye ku koye. ²² Tapa matengeko ku kwavo yira momu wa tapa matengeko ku kwetu mukonda ya ndjo detu. Ame kuna ku lira naku shanda ghunene ntani kapi na kara na nkondo murutu rwande.