¹ Yuda, mukareli waYesusi Kristusi ntani mughunya Yakopu, kovanya vayita, vakuhora mwaKarunga She, vapungukwira Yesusi Kristusi: ² Ndi nkenda nampora nashihoro yiyure kwenu. ³ Vakuhora, Ame nayulire nkondo dakutjanga vyakuhamena liyovoro lyayuviko,anongoli nakona kutjanga nimukorangede mukondjere mapuliro vatuhuguvarera mukukarashi atwe natuvandje tuvantu vakuponoka vaKarunga. ⁴ Morwashi mpovali vantu vamwe vancumpukiro mo mumwenu mukaholya-holye.Vano vantu vavadidilika lindjonaghuko.Kapi vakara mughuKarunga vantjindja nkondo daKarunga muruntjo,ovo vashwena Mukalikuto ndje Hompa, Yesusi Kristusi. ⁵ Weno nashana kumuvhurukita-nampili momo mwaliyivire -ashi Hompa ayovolire vantu mushirongo shaEgiyipite, anongoli kuruku andjonaghulire ovo vapiliro kupura. ⁶ Nampili, vaengeli ovo vapiliro kukwatilikida livango lyavo lyaghupangeli ,vashuviro livango lyakutunga mughuhunga-Karunga avatura mughunkwati mumaghuketanga ghanaruntje nanaruntje,mulikurudema,nampanguro ngayikakaro muliyuva lyalinene. ⁷ Sodomu naGomora nambara dava kundurukido kwakutapire vavene kuviruwanadona vyarushonda nakuruwanena wina viruwana vyaruntjo. Vavo kuna kara shihonena shavanya vanakuhepo matengekero ghamundiro wanaruntje. ⁸ mundjira yakukufana ngoli, vano varoti nka navo vakunyateka marutu ghavo. Vavo kushwena mapangero, nakusharura kalifumano. ⁹ Mongoli nampindi Mayikeli muengelikurona, opo ghatangilire namudiyaboli nakuku kanana naye kuhamena vyarutu rwaMosesi, kapi ghavi shetekire kuyitapo lipanguro lyakukusharawita kwendi. Mulivango lyavyo, aghamba, '' Ndi Hompa akukutunune!'' ¹⁰ Anongoli vantu vano kushwaghura kehe vino vapiranga kukwata lighano;ovyo vakwata lighano pantjitwe, kuteda yira vikorama vyakupira kughamb, ovino mbyo vyava djonaghuro. ¹¹ Lihudi lyavo! Vavo kwayenda mundjira yaKayini ntani vavo kwadivira mulipuko lyaBalamu morwa yaviwanenamo. Vakombana mughudinakaro waKora. ¹² Vantu vano ndambo yashiponga pa vilika, kulya kumwe nanwe mughuhunga-vashita vakukulita vavene.Maremo ghakupira murokwa ghana kupepumuna mpepo; vitondo vyamangenyina,kwato nyango kwafa paviri,vyaduruka. ¹³ Vavo mankupi a ghugara mulifuta, kufulira ntjoni davo;ntungwedi dakurenda-renda,ovo mudema wakumanomo vawapayika nanaruntje. ¹⁴ Enoke, waghuntambiri kutunda kwaAdamu,kwaporofitire vyakuhamena kwavo, aghambashi, "Kengenu! Hompa ogho anakuya namayovi namayovi ghavapongoki vendi. ¹⁵ Ghuye kuna kuya ayapangure kehe ghuno. Ghuye kuna kuyashorora ghundjoni navantje vanya vapiro Karunga kuvirughana navintje ovyo varughana mundjira yakupira ghuKarunga, ntani kunkango nadintje dadidona odivaghamba vandjoni vapiro Karunga." ¹⁶ Vavo vakakuvhunguta,kushivana,vakakukwama madova ghavo. Kudameka kughamba mafumano ghavo,kushwaghura vaghunyavo vawanene po. ¹⁷ Angoli anwe,vakuhoro, vhurukenu nkango dinya vaghambire pakare vaapostoli vaHompa wetu Yesusi Kristusi. ¹⁸ Vavo kwamutantelire ashi "Muruvede rwakuhulilira ngakukakara vakakumbokaghuka vantu ovo ngavaka kwamo madova ghavo." ¹⁹ Vav mbovo vayitangopo likutavaghano; vavo kaghudjuni ntani vavo kapi vakara naMpepo. ²⁰ Anongoli anwe, vakuhora, kutungenu naghumwenu mumapuliro ghakupongoka, ntani muraperere muMpepo yakuPongoka. ²¹ Karenu mushihoro shaKarunga, nakutaterera nkenda yaHompa wetu Yesusi Kristusi yakumu yitira liparu lyanaruntje. ²² Ferenu nkenda ovo vashinganyekango. ²³ Yovorenu vaghunyenu mukuva yokora mumundiro; neghedenu nkenda naghoma, nyengenu nampiri vyuma rwanyateka rutu. ²⁴ Kwagho wakuvhura kukupopera kukupunduka ngaghuka yimane kughuto washikoda shendi kwahana nyata naruhafo rwarunene, ²⁵ ahuru Karunga Muyovoli wetu mwaYesusi Krisitusi Hompa wetu,vamupande,kundaha-ndaha,kupangera namapangero ,kuto wendi maruvede naghantje,pano nanaruntje. Ameni.