¹ Ano Ezra ghuye ana kurumana a raperere kumeho ya ntembeli, ghuye kunakulira okuno kuna kughamba odo vatulire vantu va Israel. Makura mbunga yayinene yava Israel vakafumu, vakamali, navanuke avamupongere okuno vavo kunakulira unene. ² Shekeniah mona Jahiel wamukafumu wa lira lya Elam atantera Ezra ashi: "Atwe tuna tjora po lipuro lyetu na Karunga wetu mukukwara vakamali vantunda virongo. Ene ngoli, litaterero lya Israel shimpe mpolili. ³ Ngoli ntantani atwe kughana mughano walitwenyidiro kwa Karunga wetu ashi vakamali vano tuvavyute ko kwavo kumwe navana vavo kutwara mu mapukururo gha Hompa ntani namapukururo ghovo vafumadeko dimuragho da Karunga wetu,ntani tuviruwane kutwara mu veta. ⁴ Oshino shinka shoye ngoli, ghuviruwane, ntani atwe kutu kukwama. Vitware kumeho naku vitikitamo." ⁵ Ezra makura arenke vayenditi va vapristeri, na va Levi, ntani novo vahupiro kumbunga ashi vaghane mughano ashi ngava katikitamo ovyo ana ghamba Shekeniah. ⁶ Makura Ezra ayimana a yende kumeho ya ntembeli ya Karunga mundjuwo ya Jehohanan mona Eliashib wamukafumu. Kapi alire ndi ashi a nwe kehe shi, morwa ghuye kwaguvire mukudira kulimburukwa kwavo vo vakaliro muupika. ⁷ Mbudi kwayitumine ku Jerusalem namudoropa dimwe damu Judah ashi; navantje ovo vakatundo kuupika vaponge mu Jerusalem. ⁸ Kehe uno owo ngadiro kumoneka mu mayuva matatu kutwara mumapukururo gha kutunda kuvayendi vambunga namatimbi - ugawo wendi nauntje ngavaumu wupa, ntani nka ngaka kombanita likuto lyendi lya mu mbunga yovo yakatundo muupika. ⁹ Mumayuva wo matatu vakafumu navantje vamu Judah na Benjamin avaya mu Jerusalem. Mumayuva dimurongo mbiri gha mwedi waghu nta ne. Vantu navantje ava yapongo muliharango lya kumeho ya ntembeli. Ava kankama morwa mvhura kwarokire unene ntani va kalire nashinka shi pamwe kuvavapa kashitiko ka vininke ovyo varuwana. ¹⁰ Mupristeri Ezra ashapuka nakughamba ashi: "Anwe kapi mwa limburukwa mbyo mwayitira Israel undjoni pakukwara vakamali vantunda virongo. ¹¹ Weno tongononenu ndjo denu kwa Hompa, Karunga wavakurona venu, nakuruwana ovyo vya muwapero. Kugaunukenu navantu vamuvirongo vyapepi nakushuva vakamali venu vantunda virongo" ¹² Mbunga ayi yiyiri kulimburura ashi: "Ngatu viruwana navintje ovyo unaghamba. ¹³ Ngoli ava twikiriko nka ashi: "Mbunga yinene unene, ntani mvhura nayo kuna kuroka unene. Kapi tuvhura kuyimana ngoli parukenu rwa ngoli, ntani vino vininke kapishi vya kuruwana liyuva limwe ndi maviri, morwa shingi shetu mpotuli mo mu ndjo yino. ¹⁴ Marenga ghetu ghakare momu mu Jerusalem ayendite shinke shino. Ano kehe uno a kwaro mukamali wantunda virongo ngaye pashiruwo osho vapanga kumwe navayenditi navapangeli vamu nkurumbara yendi dogoro nange ugara wa Karunga wetu ngautunde mo mu mwetu." ¹⁵ Jonathan mona Asahel wamukafumu na Jahzeiah mona Tikvah a vavi kananitapo vino, Meshullam na Shabbethai va mu lira lya Levi a va va kwatitako. ¹⁶ Ovo vatundiro kuupika avalitambura lighano lino lya Ezra. Makura mupristeri Ezra a horoghora mo vakafumu, matimbi gha mumalira ghona nakutjanga madina ghavo, likonakono lyavo a litameke muliyuva lya kuhova lya mwedi wa murongo. ¹⁷ Ano muliyuva lyakuhova lyamwedi wakuhova avamana kukonakona vininke navintje vya vakafumu ovo vakwaliro vakamali vantunda virongo. ¹⁸ Mukatji kalira lyaVapriseri mwakalire ovo vakwaliro vakamali vantunda virongo. Mu lira lya Jeshua mona Jozadak navauni vendi avakara Maaseiah, Eliezer, Jarib, na Gedaliah. ¹⁹ Vavo kwatumbwidire kukugaunuka navakamali vavo. Mukure nka shi vanandjo, avadjamba ndjo davo nashikungwe. ²⁰ Mu lira lya Immer: Hanani na Zebadiah. ²¹ Mu lira lya Harim: Maaseiah, Elijah, Shemaiah, Jehiel,na Uzziah. ²² Mu lira lya Pashhur: Elioenai, Maaseiah, Ishmael, Nethanel, Jozabad, na Elasah. ²³ Mu vaLevi: Jozabad, Shimei, Kelaiah-ghuye ndje nka Kelita, Pethahiah, Juda, na Eliezer. ²⁴ Mu vayimbi: Eliashib. Muvakungi ntembeli: Shallum, Telem, na Uri. ²⁵ Mukatji kava Israeli vakuhupako-mu lira lya Parosh: Ramiah, Izziah, Malkijah, Mijamin, Eleazar, Hashabiah, na Benaiah. ²⁶ Mu lira lya Elam: Mattaniah, Zechariah, Jehiel, Abdi, Jeremoth, and Elijah. ²⁷ Mu lira lya Zattu: Elioenai, Eliashib, Mattaniah, Jeremoth, Zabad, na Aziza. ²⁸ Mu lira lya Bebai: Jehohanan, Hananiah, Zabbai, na Athlai. ²⁹ Mu lira lya Bani: Meshullam, Malluk, Adaiah, Jashub, Sheal, na Jeremoth. ³⁰ Mu lira lya Pahath-Moab: Adna, Kelal, Benaiah, Maaseiah, Mattaniah, Bezalel, Binnui, Manasseh. ³¹ Mu lira lya Harim: Eliezer, Ishijah, Malkijah,Shemaiah, Shimeon, ³² Benjamin, Malluk, na Shemariah. ³³ Mu lira lya Hashum: Mattenai, Mattattah, Zabad, Eliphelet,Jeremai, Manasseh, na Shimei. ³⁴ Mu lira lya Bani: Maadai, Amram, Uel, ³⁵ Benaiah, Bedeiah, Keluhi, ³⁶ Vaniah, Meremoth, Eliashib, ³⁷ Mattaniah, Mattenai, na Jaasu. ³⁸ Mu lira lya Binnui: Shimei, ³⁹ Shelemiah, Nathan, Adaiah, ⁴⁰ Maknadebai, Shaahai, Sharai, ⁴¹ Azarel, Shelemiah, Shemariah, ⁴² Shallum, Amariah, na Joseph. ⁴³ Mu lira lya Nebo: Jeiel, Mattithiah,Zabad, Zebina, Jaddai, Joel, na Benaiah. ⁴⁴ Navantje vano kwakwalire vakamali vantunda virongo nka vamwe vavayititire vanuke vakamali vano.