Kappitulo Trilingó

1 Si antonse Rioso a lebandá a enú kú Kristo, bukeno má kusa ri riba, andi Kristo ta sendao ai mano rerecha ri Rioso. 2 Pensenó endi má kusa ri riba, nú endi lo ke ta endi tiela. 3 Pue enú a lunga i mbila ri enú ta kundilo kú Kristo endi Rioso. 4 Kuandi Kristo aparesé ai mbila, antosé enú tambié tan aparesé ké Éle endi ngloria 5 Lungueno antose a má miembro lo ke suto ten andi tiela, inmorarira sesual, impuresa, bangasunga, malo reseo i korisia lo ke sendá idolatría. 6 Sendá po e kusa ke ira ri Rioso miní andi má moná ri resoberiensia. 7 Endi e kusa ke enú tambié a jarriá kuandi enú a bibí kumo ané. 8 Poro enú ten ke rejá to e kusa, ira, enojo, mala intensió, ajamiento, mala palabra ri boka si. 9 Nú engaña uno kú uto, ya ke enú a rejá biejo ombe ku má debaneo, 10 i a kombetí endi nuebo ombe ke sendá icho nuebo endi kunosimiendo ri akueddo a imagen ri ake ka a krealo. 11 E sendá ni jurío,sirkusisió ni insirkusisio, barbaro, Essita, eclabo, suetto, si nú ke Kristo sendá to endi to 12 Bitino kumo ekogío ri Rioso, sando i amaro, miserikordioso endi to tiembo, amable, umilde, manso i pasiente. 13 Sopotando uno kú uto. Sendá gueno unó kú uto, peddoná ri memo foma ke ño peddona a enú. 14 Pó to andi e kusa, tené gongorokó, ke sendá binkulo ri perfessió. 15 rejeno ke pá ri Kristo gobená endi kolasó si, sendá po e pá ke enú jueba ñamao endi un kuepo, sendá agraresío. 16 Rejá palabra ri Kristo bibí endi enú rikamende, kú to sabirruría insiñá má uno kú uto kú salmo i imnos i kando epiritual. Kandeno kú agraresimiendo endi kolasó si a Rioso. 17 Kuakié kusa ke enú asé, ri palabra i ri icho, asé to endi nombe ri ño Jesús, nda nglasia a Rioso tatá po merio ri Éle. 18 Mujé, someté a mailo si, kumo sendá kú jusio endi Ño. 19 Mailo, amá a mujé si, i nú sendá amago kondla ri éle. 20 Moná, oberesé a má tatá si endi to ma kusa pokke sendá gueno endi Ño. 21 Má tatá, nú proboká a má moná si pa enú nú sendá desalentao. 22 Eklabo, oberesé suamo sí endi to má kusa, nú makaniando pa má jende guatiá bo si nú kú kolasó sinsero, ten miero a Ño. 23 Kuakié kusa ke bo a asé, makania kumo pa ño i nú pa má jende. 24 Enú sabé ke ri Ño tan miní má rekompensa ri erensia, sendá pa Kristo Ño pa kien enú tá makania. 25 Pokke kuakié lo ke se asé injutisia tan resibí pena po injutisia lo ke e asé pokke senda pa to gende.