1
Aora kuandi ané a pasá pó suirá ri Anfípolis y Apolonia, ané a yegá endi suira ri Tesalónika, andi a tá un masiruma ri Judíos.
2
Pablo teneba kostumbre ri bae pa andi ané, i pó trilingó ría ri leposo éle a chigotía kú ané má ekritura.
3
Éle a tá abrindo má ekritura i chitiando ké jüeba nesesario pa Kristo sufrí i repué sé lebandao ri má muetto. Éle a chitía: " Ete Jesús ri lo ke i tá preriká a enú sendá Kristo".
4
Agguno ri má Judíos a kreé i a jundá kú Pablo i Silas, kú un chochá ri griegos revotos i un chochá ri mujé kambimbante.
5
Poro má Judíos ke a kreé nú, a sendí selos i ané a kujé a ombe mabbao ri mekkao, i a jundá un chochá pa alborotá suirá. Lendrando aí posá ri Jasón, ané keleba ndá a Pablo i Silas a teruño.
6
Poro kumo nú a topetá, ané a kujé a Jasón kú agguno ri má numano í a trelo lande ri má chechelo ri suirá, kú un jarana: "E má ombe lo ke tá gobbé mundo kú boka abajo á miní tambié pa akí.
7
E má ombe lo ke Jasón a ndá biebenía a tá miní kondlá má rekreto ri Sésar; ané a chitía ri uto takurimbo ñamao Jesús."
8
Chochá ri jende i má chechelo ri suirá a enbejuká kuandí ané a kuchá é kusa.
9
Poro repué má chechelo asé pa Jasón kú uto pagá burú kumo fiansa repué ané a rejá e bae.
10
Pó okurana má numano a mandá a Pablo i Silas a Berea. Kuandi ané a yegá aí, a bae pa masiruma ri má Judíos.
11
Aora e jende sendá má kaiko ke má jende ri Tesalónika, pokke ané a lesibí palabra kú mende abietto, guatiando má Ekritura tó má ría pa guatía si asina güe.
12
Pó tanto un chochá ri ané a kreé, un chochá ri mujé kambimbante i kú un chohá ri ombe.
13
Poro kuandí má Judíos ri Tesalónika a kuchá ke Pablo tambié a tá preriká palabra ri Rioso endi Berea, ané a bae pa ayá i alborotá má jende.
14
Ri un bé, má numano a mandá a Pablo pa Mar, poro Silas i Timoteo a kelá aí.
15
Aké lo ke a guía a Pablo a yebalo gurilembo kumo suira ri Atenas. I apena ané a rejalo aí, éle a mandá rekao pa Silas i Timoteo pa ke a miní ri un bé.
16
Aora miendla Pablo a tá eperá pó ané aí Atenas, epiritu á embejuká lendro ri éle kuandi á guatía suirá yena ri irolos.
17
Asina ke éle a chigotiá aí masiruma kú má Judíos a ke lo ke aroraba a Rioso i tambié aí mekaó kú lo ke a tá aí.
18
Poro aggú ri ma filósofos Epikúreos i Estoikos a topetá kú éle. Aggú a chitiá: "¿Éle tá chitiá inbá inbá?" Má uto chitiando : "Éle a pesé un ri lo ke a sé ñamá a má jende a siguí riose raro," pokke éle taba preriká ri Jesús i lesurresió
19
Ané a yebá Pablo pa Areopago, chitiando, "¿Suto a kelé sabé ri é insiñansa ke enú tá chitiá?
20
Pokke bo tá trée un chochá ri kusa rara a má a joiro. pó tando, suto a kelé sabé ke jüe tó é kusa"
21
(Aora tó má Atenienses i má guarumá ke a bibí aí, peleba tiembo kombesando o kuchando aggú kusa nueba
22
Antonse Pablo a palá aí mitá ri Aereopago i a chiitiá, " Enú ombe ri Atenas, i tá guatiá ke enú sendá religioso ri tó fomma.
23
Pué miendla i a pasá, i a guatiá má kusa ri arorasió, i a topetá kú attá kú é fecha: "A RIOSO KE É KÚ KUNOSÉ NÚ". Pó tando lo ke enú tá arorá sin sabé, i tán jaraná.
24
Rioso ke asé tiela i tó lo ke aí endi éle, ya ke éle sendá Ño ri nsulú i tiela, ní bibí endi masiruma ke ninggú ombe asé.
25
Ni éle sendá sébió pó mano ri ombe, kumo si éle tén neserirá ri aggú kusa ya ke é memo pe lo ke asendá mbila a tó má jende i a tó kusa.
26
Pó un ombe éle asé tó má nasió ri tó jende pa bibí akí tiela, abiendo trasao tiembo señalao i má limite ri tó paraje aonde bibí,
27
pa ané bulá a Rioso, asina ke enú polé buká a Rioso i topetalo, anke éle nú tá kurilembo ri suto
28
Pokke kú éle suto a bibí i asé mobé i a sendá sé ri suto, asina kumo lingó ri mpa chakero ri éle a chitiá, pokke suto tambié sendá ri éle.
29
Asina, ke suto sendá ri Rioso, pó é kusa nú pensá le má kualirá ri má deidad ri éle sendá kumo rungusú i burú o piegra tatada - o imagé kreao pó ombe
30
Asina ke Rioso a pasá pó kopito má tiembo ri innoransia, poro aora éle tá mandá pa tó má ombe endi tó paraje a arrepentirse,
31
Pó é kusa éle a fijá ria, kuandi éle tán juggá mundo kú justisia pó merio ri ombe ke éle a kujé. Rioso a ndá fecha ri ombe a tó, palando a éle ri muetto".
32
Aora kuandi má ombe ri Atenas a kuchá ri lesureresió ri muetto, agguno a mofá ri Pablo poro má uto a chitiá: "Suto tén ke kuchá asékka ri é fecha".
33
Repué ri é kusa, Pablo a rejá ané.
34
Poro agguno a jundá kú éle i a krée, tambié Areopagita a krée, un muhé ñamao Damaris, i má uto kú ané.