¹ Kuakié ke kreé ke Jesús sendá ma krito, sendá nasió rí Rioso. I kuakié ké keleba a ma Tatá, tanbié keleba a kiene jue nasió rí Éle. ² Pó e kusa suto tá sabé ké suto keleba a ma monasito rí Rioso, kuandi suto kelé i suto asé kaso a Rioso. ³ Pokke é a sendá gongoroko rí rioso; ke suto ten ke gualá palabra rí Éle. I palabra rí éle sendá pesaó nú. ⁴ Pokke to aké ké sendá nasio rí Rioso ta pattí ma mundo. I a sendá bittoria ke a pattí ma mundo, fe rí suto. ⁵ ¿Kiene sendá aké ke a pattí ma mundo?sendá kiene tá kreé ke Jesús sendá moná rí Rioso. ⁶ Ete a sendá kiene a miní pó apú ku pola, Jesukrito memo, éle a miní pó apú numa nú, sinú pó apú i pó pola. ⁷ Pue a abé trinlingó ke tá nda tetimonio: ⁸ Ma epiríti, ma apú i ma pola. É trilingo a tá rí akueddo. ⁹ Si suto a kojé ma tetimonio rí má ngandea ombe, ma tetimonio rí Rioso sendá ma ngande. Pokke ete sendá tetimonio ri Rioso, ké éle a nda tetimonio kompinchao ku moná sí. ¹⁰ Kuakkié ke tá kreé endi ma moná rí Rioso a tené tetimonio rí sí memo. Kuakkie ke kreé nú a Rioso ase lo trochimán, pokke a kreé nú endi tetimonio ke Rioso a ndá rí moná sí ¹¹ I ete a sendá ma tetimonio: ke Rioso a ndá suto mbila po tó tiembo i e mbila sendá endi Moná rí Éle. ¹² Kiene ten ma moná ten mbila; kiene ten ma moná rí Rioso ten mbila nú. ¹³ I á katriá e kusa a enú, pa enú sabé ke enú ten mbila po tó tiembo, enú ke kreé endi moná ri Rioso. ¹⁴ É sendá konfiansa ke suto ten lande ri Éle, ké, si suto tan pirí kuakié kusa ri akueddo ku bolunta ri Éle, Éle tan kuchá a suto. ¹⁵ Si suto sabé ke Éle tá kuchá suto, kuakié kusa ke suto tan pirí, suto a sabé ke suto a tene to kusa ke suto a pirí ¹⁶ Si aggún a guatiá numano si asé pekaro ke tá ndá muette nú, Éle ten ke orá, i Rioso tan ndá mbila a éle, i tá chitiá namá po kiene pekaro si sendá muette nú. A abé un pekaro ke ta ndá muette, i tá chitiá ke teneba ke orá po e kusa nú. ¹⁷ To kusa ke jueba jutta nú sendá pekaro; Poro a abé pekaro ke ndá muette nú. ¹⁸ Suto sabé ke kuakie ke sendá nasío ri Rioso tá peka nú; poro kiene a nasé ri Rioso, Rioso ta gualalo, i má maligno poléba ase kusa mala nú. ¹⁹ Suto sabé ke suto sendá ri Rioso, i suto sabé ke to ma tiela tá bajo ri maligno. ²⁰ Poro suto sabé ke moná ri Rioso a miní i nda suto sabiruría, pa suto polé konosé a kiene sendá ri belá belá. Suto tá endi Éle ke sendá belá belá, endi moná si Jesukristo. Éle sendá Rioso i ma mbila pa to tiembo. ²¹ Monasito, guala ri ma oiro