¹ Eliseo profetanü junata kaenü profetawi pejjunato jumaitsi jaraponü jawabelia: "Nejjata waja viajabinejjabeje, nejjata pire nekobeta pa tsikiri aceitebüyoje ponáre Ramot de Galaad jawabelia. ² Pakujinae paremelia, jaitsianame Jehú pejjünato Josafat, Nimsi pejjunato, joneremelia nonota punaeya ejjanaename pe yanabiwitsi wekua, kaliamütsane tutuju camaara jawabelia. ³ Nejjata aceitebü pitsianame tsimataboko epanaename jumaitsimü tsane: "Dioso ra jumaitsi: "Jjanü ka unjibatsi reynümü kuenia Israel jawata." "Nejjata baupare kujinaeta bijiraware; pütsa demorabame." ⁴ Nejjata pewüjüato, profetanü, pona Ramot de Galaad jawabelia. ⁵ Pakujinae ajaraponü patajopa, ena ejército capitannuanü." Nejjata pewüjüato profetanü jumaitsi, "Jjanü najetarukajü tane itorobikuenia jjamü jawberena, capitán." Jehú jumaitsi: "¿Ipatsa pajjanü jawata? pewüjüato profetanü jume kanawiata: "Jjamu capitán". ⁶ Jehú nonotapuna joneya boyalia, profetanü tsimata epana aceitera yajawa jumaitsi Jehú jawabelia: "Dioso, Israel pija Diosonü, jumaitsi jjuaje." Jjanü ka ungibatsi reynümükuenia Dioso pija tomarata, Israel jawata. ⁷ Bayejebianame Acab pijamonae, neto nakuenebinü, ajarapakuenia tayamatamotsinejja pejána ta netó nakuenebiwi, pe beyajebiwitsi pekobeta Jezabel. ⁸ Acab dajjita pijamonae werewerekaena, jjanü wekua pitsianajü Acab dajjita pebi nakuetonü, esclavo o libre jiwi ata. ⁹ jjanü ejjanaenajü Acab pijabó be Jeroboam pija bó, Nabat pejjünato, yajawa be Baasa pija bó Ahias pejjünato. ¹⁰ Awirianü jjaenatsi Jezabel Jezreel jawatalia, ajibi pe mütjütsi jiwiyotsi tsane. Nejjata profetanü baupa jawalia kujinaeta bijirawa. ¹¹ Nejjata Jehú weyafuabelia pitsapalia peto nakuenebinü pija jiwi jawabelia, kaenü jumaitsi ajaraponü jawabelia, "¿Jjane pana dajjita?" ¿Itsa jjuajitsia rena ponü jjamü jawaberena be pe matajemabinütsi?" Jehú jumaitsi ajarapamonae: "Pajjamü pa jamatabükuene yapütaneme pebi yajawa jjua kuene jumaitsi." ¹² Ajarapamonae jumaitsi, "Ajara jjua saya najume tsünta. Pane jumaitsimüne." Jehú jume pita: "Ajaraponü ne jumaitsi jjuaje itsa jawanua, ajaraponü yajawa ne jumaitsi, "jjua ra maje Dioso jumaitsije: Janüra ka unjibatsi reynümükuenia Israel nakuata." ¹³ Nejjata Kaenu kanakujitsia bepijiyo na jona pe najjatabijawa jéba Jehú pe büjjüpanata atjübüyo escalonjawata. Ajarapamonae fiaba trompeta yjawa jumaitsi, "Jehú ra reynü." ¹⁴ Ma pakueniaje, Jehú Josafat pejjünato, Niimsi pejjünato, pebisiakuene siwa najamatabü jjainatsi. Akonojjae, Joram bajayajebi wü anaepana Ramot Galaad, ajaraponü yajawa dajjita Israel, Hazael pe jamatabükuenia Aram pija reynü, ¹⁵ Joram reynü nawialia kaewüalia Jezreel jawabelia pe nawaübinejja Arameos monae pe bijia paitsi jawatsi pakujinae barü nabía Hazael, Aram pija reynü. Jehúnjumaitsi Joram peto nakuenebiwi: Itsa pane jamatabü jüpame, nejjata kae jiwiata putsa pa panepae ejjaname yajawa putsa pa pitsapae ejjaname toma ra wekua, ta tsipaebirejja ajara pa iwaisi Jereel jawata. ¹⁶ Jehú carrota pona Jezreel jawabelia, tsipaji Joram ajara jota nakueronae ka ekojopa. Akonojjae, Ocozías reynü Judá jawata, runaika, pe taenejja Joram. ¹⁷ Alalayanü nuka torreta Jezreel jawatalía, ajaraponü tane tajüwerena Jehú pe yanábijawa pakujinae patanajetaruka; Ajaraponü jumairsi: "Jjanü taniji pebijiwibitsaüto pe najetarubenaejawa." Joram jumaitsi, "Pire jinete, itorobare weyafuabelia pe kajjitjarabinejja ajara pamonae, pakuenia jumaitsimütsane jamüre: "¿Pejjania jamatabükuenia panaje tarubename?" ¹⁸ Nejjata kaenü pebi itorobatsi caballota penakajjitajarabi nejjabeje, Ajara ponü jumaitsi: "Reynü ra jjua jumaitsije: "¿Pejjania jumatabükuenia najetarukame?" Jehú nejjata jumaitsi: "¿Itsa jjua jjamü jjainame pejjania jamatabükuene yabara? nawiare tapüta na ponáre. Nejjata atalaya jumaitsi reynü jawabelia, "Pitorobinütsi kajjitajaraba ajarapamonae, ajaraponü baitsijane apo nawiatsi." ¹⁹ Nejjata ajara ponü itsanü itoroba weya fuabelia caballota, ajara pamonae jawaberena pona jumaitsi, reynü jjua jumaitsije: "¿Pajjamü pejjania jamatabü kuenia pa najetarubename?" Jehú jumaitsi: "¿Itsajjua jjamü jjainame pejjania jamatabükuene yabara? nawiare ta püta na ponárre. ²⁰ Ikatsia atayanü tsipaeba: "Ajaraponü kajjitajaraba ajarapamonae, ajaraponü apo nawiatsi. Pakuenia carro najetaruka Jehú pina kanajetaruka, Nimsi pejjüato, tsipaji pebisiakuenia kapona pona." ²¹ Joram jumaits: "Neto jjaniawaere taja carro. Ajara pamonae pija carro to jjaniawaeta, Joram Israel pija reynü yajawa Ocozías, Judá pija reynü, ponabeje, kaenü kanakujitsia pija carrota, Jehú pe kajjitajarabinejja. Ajarapamonae kajjitajaraba Nabot pija nakuata jezreelitanü. ²² Pakujinae Joram jane Jehú, ajaraponü jumaitsi: "¿Jehú pejjania jamatabükuenia najetarukame?" ajaraponü jume pita:"¿Itsapakuenia pejjaniania tsipae, pakujinae idolowi jawabelia na jamatabü kanawiaba yajawa penajorobijawa nija mama, Jezabel, bitso ayaijawa?" ²³ Joram nejjata pija carrota yá napünüyorota najetabijirawa yajawa jumaitisi Ocozías jawabelia: "Nakayamujju jjaniababeje, Ocozías." ²⁴ Nejjata Jehú pita pija bitsabi dajjita sauta upajjuabe Joram pe wütakara jawalia; jjutabo yasipitsataba pe jamatabü ütjuto, ajaraponü jopa pija carrota. ²⁵ Nejjata Jehú jumaitsi Bidcar jawabelia, nija capitán, "matacore yajawa jjuare Nabot Jereelitanü pija weyafójawata. Najamatabünapire pakuenia, pakujinae wajjaibeje barajinatsibeje Acab, nija papa, Dioso baja ya bara kuaikuaijai ajaraponü yabara: ²⁶ Aja tsaenta, jjanü kaniwi tajini Naboth pejana yajawa pejji pejana, jai Dioso, yajawa jjanu ka matamotsianatsi pa irataje, "Jai Dioso. Akonojae nejjata, yajawa jjuare ajara jota, Dioso pe jume kowüya. ²⁷ Pakujinae Ocozías, Judá pija reynü tane jjuaje, najetabijirawa betsiaje, Bet Hagan pija namutuatsi, Jehú baitsijane barra pona, yajawa jumaitsi: "Ajarponüata pa beyajjuare pija carrota,"Gur pia ascenso jawata upajjuabatsi, ajarajjua eka Ibleam pemujjuneneta.Ocozías najetabijiraba Meguido jawabelia ajarajota tüpa. ²⁸ Peto nakuenebiwitsi kaponatsi carrota Jerusalén jawabelia mütjütatsi pija mutjüta pajja yajawa péna David pija tomarata. ²⁹ Akonojjae, itsi Joram pija once (11) waita, Acab pejjunato, Ocozías pina tajjujjuaba pe reynabijawa Judá jawata. ³⁰ Pakujinae Jehú rena Jezreel jawaberena, Jezabel jumetane ajarajjua yabara, naitajjuto pentaba, namatana jjaniawaeta yajawa ventana jawalia naükota. ³¹ Jehú joneya baupayalia, ajarapowa jumaitsi ajaraponü jawabelia, "¿Pejjania jamatabükuenia najetarukame, Jjamü be zimrimü jiwi neto benü neto nakuenebinü?" ³² Jehú naükotsia atjübüabetsia ventana jawabetsia yajawa jumaitsi, "¿Ipatsa jjanü neyajawa? ¿Ipatsa?" Nejjata dos (2) o tres (3) pa eunuconübeje naükoba weyafuabelia. ³³ Nejjata Jehú jumaitsi: "Pajjuabimika irrá betsika." Nejjata ajarapamonae Jezabel jjuabika irrábetsika, pejana rukajunua bó yenepanata caballonü jawabelia yajawa, Jehú tsapabatajjuana petajjuta. ³⁴ Pakujinae Jehú joneya palacioboyalia, ajaraponü jjane yajawa ápa. Nejjata ajaraponü jumaitsi, "Jjanébare akonojjae pa pibisia petiriwa yajawa mütjüre, tsipaji ajarapowa reynü pejjünatoyo." ³⁵ Ajarapamonae mütjütaotjopalia, ajarapamonae baitsijane ajarapowa ü pematabokoto kajjitájaraba, petajjübeje, yajawa pekobejapatobeje ³⁶ Nejjata nawiabarena Jehú jawabelia paeba. ajaraponü jumaitsi, jjua ramaje Dioso pija liwaisije jjua ajaraponü kuaikuaijai pija jiwitonüjawa Elías tisbitanü, jumaitsije: "Jereel irrata Jezabel awirianü wi jjaenatsi, ³⁷ Jezabel pija cuerpo be tasito tsne Jereel irrata, kae jiwiata pe jumaitsi yaniwa: "Jezabel ramaje."