¹ Veintitrés (23) waita Joás pejjunato Ocozías, rey Judá jáwata, tajja jjüaba pito robijáwa Joacaz pejjünato Jehú pitó robijawa Israel Samaria jawáta; itó roba diecisiete (17) páwai beje. ² Baja rá ponü saya piá béje jáwa itsi pitabü néjewa Dioso ná akuíjirru beje bé Jeroboam pejjünato Nabat, pemáta kaponaenü pena nawajükáe nejja penatsi kobe ejjanáe diosowi jawabelia; Joacaz nejjata apo kopatsi. ³ Bá rájane Dioso ba rá enáepana Israelwi, Dioso tó kanawiata pekobeta Hazael rey Aram pitó robinü pijinenia pekobeta Ben Hadad pejjunato Hazael. ⁴ Pakueniaje Joacaz wajüta Dioso jawabelia, nejjata Dioso júme tanetsi tsipaji baja rá ponü barrá jinatsi Israel, pakuenia rey Aram pijinü kéne tsiá jumaitsabia bitsi. ⁵ Baja rá pakuijinae Dioso rajútatsi pé kapánepáenü nejjatsi, baja ra juya pamónae wékua ponéka arameos mánae, Bá rajane Israel mónae tajjü jjüaba pé jina waná paejawa piajabo cana kuijitsia pakuenia jinawanapa bajáyata. ⁶ Itsiata baitsijáne, ápo kopáta wánapae pena wajü kabiábi jawa dioso nüjjita bóta penúbi jawa Jeroboam, ponü kuaja eruba pena wajukáe jawa, natsatsi áta ü pamónae nawajüka apo piaja dioso jawábelia Asera pé jumape katae nutsinü núka Samaria jawata. ⁷ Arameos mónae jjüabanütatsi Joacaz cincuenta (50) pá wajabitsi nüyobeje caballota pé jinawaná páe nüjji, diez (10) pá carroyo beje, y diezmil (10.000) pá pebi nüyábeje petájjüta, tsipáji rey Aram pijinü wérreba babatsi, bé pabi ejjatsi pábi. ⁸ Dajjita jjüa nakóbe tane Joacaz, piji nenia tó nakueneba pesaüta, ápo y akinae ¿má pá bajjütota itsa jota Israel mónae nató yakina biaba? ⁹ Baja rá pakuenia Joacaz nawiata mütütatsi itsa jota bobena, piaja monáemi Samaria jawata Joáz pejjünato rey tsánükae péko wüta . ¹⁰ Pá waita treinta y siete (37) rey Judá jawata, piaja irra Joás, pejjünato Joacaz, tajjü jjüaba pená itorrobi jawa Israel mónae Samaria jawáta; baja rá ponü ná itó roba dieciseis (16) pá waibeje. ¹¹ Baja rá ikatsiá, baja rá ponü ata ná akuéne beje Dioso pitabü nejewa, baja rá ponü ápo nakófünütsi áta kaejawa áta pekuja rubi jawatsi Jeroboam pejjüto Nadad, baja rá jjüa pejjanajjae Israel ná najjüaba pónapona, ü pamónae jume kowünüta pónapona. ¹² Jjüa itsa jawanü pena koyene itajütsi kuene Joacaz, dajjita pena kuenebi jawa, pé nasaü itajütsi jáwa pebarrü natseko náejawa Amasías rey Juda nü, "¿Jóta ápo yakina rubi libro jawáta peyakina pona bibijawata reye monae Israel pijiwi?" ¹³ Joacaz nawiáta piaja salinai wita bokéka, nejjata Jeroboam juya itó robeka pekowü bóta. Joás mütütatsi Samaria jawáta itsa jota bobena Israel piaja reyes mónae. ¹⁴ Baja rá jjüá kuijináe Eliseo domaebatsi baja pá domae janébaja peyajjüá biji tsiatsi, nejjata Joás rey Israel taeyójjo parreka táme máta nuéyaba. Baja rá ponü jumaitsi: "¡Jjamü tájjamü jjamü tajjamü, carros Israel piaja mónü niá jiwi caballota ká kaponaya!" ¹⁵ Eliseo jumaitsi: "Pirre bitsabi jjüáta yajawa," baja rá pakuenia Joás pita bitsabi jjüata yájawa. ¹⁶ Eliseo jumaitsi Israel piaja rey jawábelia: "Nakóbe yaürre bitsabi jawábelia baja rá, pakuenia nakóbe yaüta bitsábita.Nejjata Eliseo pekobe júma kataita rey pekobe juma werreka. ¹⁷ Eliseo itórroba: "Baupá re ventana itsa wetsina juámeto pitsapa biaba." jé jai baupáta.Nejjata Eliseo Jumaitsi "¡bijjana jjuárre!" nejjata júya bijjana jjuába Eliseo tsipáeba: "pá jjüatabo bijjanajjüa bame Dioso rábaja pékobe jjüátabo, baja rá pábota amonéyeba Aram jjamu rá tsipaji barrü natséko náename arameos Afec jawáta áta ü néwerretsi jawábelia. ¹⁸ Baja rá jjüa kuijináe Eliseo jumaitsi: "Pirre nija bitsabiánü," bá rájane Joás nóta, baja rá ponü jumaitsi Israel piaja rey jawábelia." irra koníta jjüárre baja rá jjüata," Nejjata baja rá ponü irra konita jjüaba tres (3) akueyabi jjüa béje, baja rá jjüakuijinae núka pónapona. ¹⁹ Nejjata ponü Dioso piiaja jiwitonü anayata matajunta jjuába jumaitsi: "jjámü konibabé pentsi páme cinco (5) o seis (6) jjüabeja. Nejjata tsekoná jitisipame kaenü áta ápo nakópatsipae, néjjata amonéya biáname Aram mónae a kueyábi jjüa béje." ²⁰ Nejjata baja Eliseo nawiáta, baja rá pamónae mütüta, moabitas piaja bitsáütoyo irranü tó nakobe tojjo tsaiya piaja bonü matokóba biába péjana wai kopiata. ²¹ Pakuíjináe abajjü kuijirru énatsi abajjü mütüka wanápa petú paenü baja rá pamónae táne moabita bitsáütoyo, nejjata baja rá pamónae jjüá reka petü paenü itsa jjüya Eliseo bókarreka. Pakuijináe Eliseo pesi jáya tájunua, petüpaenü naükota nonotapuna nukapona baja. ²² Hazael rey Aram pijinü bitsó barrajina Israel dajjita mata kábi jébi pitó róbi matakabiyó béje Joacaz. ²³ Jané baitsi Dioso Israel yá eweta biaba, tsita bijiobitsi piajiwi nejjata siwá jamatabü büájai baja rá pamónae yábarra, tsipáji Dioso péna jume kapáne páe jjáe Abraham jawábelia petáejjae, Isaac Jacob béje, baja rá jjüá jitsiá Dioso ápo wé rebiabi, pijinia bitsó ápo natsi pü jjüabi Dioso piá jiwi. ²⁴ Hazael rey Aram pijinü tüpa, júya Ben Adad, pejjünato rey tsapona ponae pékowüta. ²⁵ Joás, pejjünato Joacaz, wékua pita Ben Adad, pejjünato Hazael, pá tomárra beje má ponü pétseko náe kuenia wékua pita Joacaz pájjámi tres (3) akuéyabi jjüábeje amonéyaba Joás néjjata tó kanawiába Israel piaja tomarranü.