¹ Galaad rȩjȩttö̧ Tisba tö̧ja̧'i̧sa̧ Elías pä'inö Acab'rö: "Chu̧ru̧hua̧ kö̧" Israel ttö̧ja̧ ttu̧ru̧hua̧ Dios ttö hue'ö jȩchä̧cu̧ i̧mi̧nä̧ pädömä, pi̧yȩ du'onämä ajiya isäte itete'inä, ja̧'hua̧ta̧'a̧nö̧ ajiya'inä ichoca'a jä̧cua̧'a̧, ttötä pädome jubu. ² Ja̧'hua̧nö̧ ja̧'a̧ tu̧ru̧hua̧ pä'inö Eliarö: ³ "Porö rö'äpächi täí kä̧hua̧ räopa'acu päte'ö; Jua'a dajahuächi Querit a̧jȩsä̧rä̧ ko̧mȩ, jua'amä Jordán ajettömä kä̧hua̧ räopa'acu ja̧'a̧. ⁴ Cua̧bhuä̧cua̧jä̧ juä̧rä̧ ajé i̧sä̧rä̧ttö̧tä̧, ttötä huȩdä̧cua̧sä̧ ppi̧yu̧ru̧ cucua ttiyacu pä'ö." ^{5 7} Ja̧'hua̧nö̧ ja̧'a̧ Eliasmä TTÖ̧Ä̧NÄ̧HUA̧ huäji ta'anö jȩpi̧nö̧. Juorö rä'opö 'chi̧nö Querit aje i̧sä̧rä̧ jäyä ö̧ja̧ pä'ö, Jordán ajettömä kä̧hua̧ räopa'acu päte'ö ji̧na̧'a̧. ⁶ Ppi̧yu̧mä̧ yo̧ä̧sa̧ ja̧'a̧nä̧ i'chächinätö̧ pan'inä de'ä'inä jä̧'hua̧ta̧'anö ni̧pä̧ro̧mȩcu̧'i̧nä̧ i'chächinätö̧ pan ja̧'hua̧ta̧'a̧nö̧ de'ä'inä, ja̧u̧mä̧ au ki̧nö̧ aje i̧sä̧rä̧ttö̧tä̧. Recuo mo̧ro̧ 'cuäopinö o'ca'a, aje i̧sä̧rä̧mä̧ joipächina'a ajiya ju'tojuttu pi̧jä̧ra̧'a̧ ichoca'attö. ⁸ Ja̧'hua̧nö̧ ja̧'a̧ TTÖ̧Ä̧NÄ̧HUA̧ ucuocu pä'inö: ⁹ Ä̧rä̧mi̧'ö̧ tä'i Sereptara̧'a̧, SIdón ti̧rȩjä̧cu̧, huȩnȩtä̧ cu̧jä̧. Ttöta hue'äjisä yajute recuarö ucuru ppäjädäcuajuru. ¹⁰ Ja̧'hua̧nö̧ ja̧'a̧ttö̧ juorö rä'opö 'chi̧nö̧ Serepta ötahuiya ra̧'a̧cu̧, juhua'a ötrahuiyä do'ächäcuähuome ö̧rä̧bȩhuo̧mȩnä̧, yajute recua kö̧to̧mi̧ ca̧ca̧tö̧ kö̧ja̧'a̧ toipinö. Ja̧'hua̧nö̧ ja̧'a̧ jahuäjuru huopö pä'inö: "Ppä'ädipittö i̧so̧ttä̧nä̧ ajiya i'chächö chahua." ¹¹ Ja̧'hua̧nö̧ päcua ajiya ȩmo̧po̧'ö̧ ki̧'cha̧'a̧ pä'äji ta'anö huopö päinäcua̧: Pan'inä cu̧mu̧nä̧ a̧'u̧cu̧nä̧ i'cächiyittö chucuá." ¹² Jahuäju ädätinäju̧: TTÖ̧Ä̧NÄ̧HUA̧ Dios kö̧ i̧mi̧nä̧ pädömä, jui'ajusä pan'mä, ja̧hua̧nö̧ jo̧ca̧'a̧ a̧u̧cu̧nä̧tä̧ ka̧'a̧ Harinä i̧sa̧ppȩtä̧ ȩnä̧huä̧yu̧nä̧mä̧, jua'a jö̧ ta̧'a̧nö̧ a̧dȩ isoya 'carähuäbanämä a̧u̧cu̧nä̧tä̧ acua'a. Topäjijä ttömä mi o̧'quȩ ca̧ca̧tä̧ju̧sä̧ do'ädö chi̧tti̧mu̧cu̧ dä'ö chucua pä'ö, hua'ö chicuäcua'a ä'canä chi̧tti̧mu̧cu̧ chucua pä'ö." ¹³ Elias pä'inö jahuäjuru: "Yecuecuä, jȩcu̧'a̧ päcuäji ta'anö jȩpi̧, ja̧'hua̧nö̧ ja̧'a̧nä̧ ttö chu̧cua̧ panttö̧ ȩttö̧po̧'i̧ cuiyattö, ja̧u̧nu̧ o'ca'a cuȩttä̧cua̧ju̧jä̧ cui̧tti̧mu̧cu̧ cucua pä'ömä. ¹⁴ Ja̧'hua̧nö̧ ja̧'a̧ TTÖ̧Ä̧NÄ̧HUA̧ Israel tto̧ja̧'i̧nä̧ TTÖ̧Ä̧NÄ̧HUA̧ Dios pinö, pa̧'a̧nö̧ pä'ö: Harinä i̧sa̧ppȩ ȩnä̧huä̧yu̧nä̧mä̧, beipächö juiyäcua'a, ja̧'hua̧nö̧ jö̧ ta'anö a̧dȩ 'carähuäba jacuättö'inä ppu'epö kä̧cua̧'a̧, TTÖ̧Ä̧NÄ̧HUA̧ Dios u'tojuttu pi̧jä̧ra̧'a̧ ajiya huome jubu." ¹⁵ Jahuäjumä Elias jiähuinö ta'anötä̧ jȩpi̧nä̧ju̧, Ja̧'hua̧nö̧ ja̧'a̧ttö̧ jahuätö huä̧mȩtucuä huotömä recuo mo̧ro̧ cuä̧nö̧ ko̧cui̧nä̧tö̧. ¹⁶ Harina i̧sa̧ppȩ ȩcä̧yu̧ttu̧mä̧ beipächö juiyönä jina'a, a̧dȩja̧ acuäba'inä beipächä juiyönä ppu'epö ki̧na̧'a̧, TTÖ̧Ä̧NÄ̧HUA̧ pä'inö ji̧nö̧ ta'anö, ja̧u̧tä̧ ihueye Elianä kä̧nö̧ ucuocuina'attö. ¹⁷ Ja̧'hua̧nö̧ ji̧nö̧ o'ca'a, isode uruhuaju ki̧tti̧ rö̧'ä̧nä̧ na̧'a̧chi̧nö̧. Ja̧u̧ u̧mä̧richeimä juiyo juruhuinäcu̧ jua'a jabocu ä̧jö̧ juiyö'anötä. ¹⁸ Ja̧'hua̧nö̧ ja̧'a̧ ji̧'qui̧cha̧hua̧ ja̧ju̧mä̧ pä'inäju̧ Eliasrö: "¿Däje jȩchä̧jä̧tö̧ ucuru tömä, TTÖ̧Ä̧NÄ̧HUA̧ ä'cajometömä? ¿Ttö suronä jȩchi̧nö̧ amucuädö chi̧tti̧rö̧ cuä'ö cuicua pä'öjä?" ¹⁹ Ja̧'hua̧nö̧ päjäcu, Elias ädätinö: "Cui̧tti̧rö̧ iyittö." Ja̧'hua̧nö̧ pä'opo'ö ja̧u̧ ji̧'qui̧cha̧hua̧rö̧ cä'epö ȩpi̧nö̧ ju̧'to̧ju̧ i̧sä̧jä̧ra̧'a̧ ihueye chutä ä'äijo̧ca̧ra̧'a̧, ja̧'hua̧nö̧tä̧ cä'epö rätinä ä̧'ä̧huä̧ppä̧nä̧. ²⁰ TTÖ̧Ä̧NÄ̧HUA̧ Diosrö pä̧i̧cu̧nä̧ huopö jä'epö pa'inö: "CHÖ̧Ä̧NÄ̧HUA̧ Dios, paju recua kojusodenä chö̧ja̧ pä'ö huecuinäcua̧ ka̧'cua̧ ttä̧jȩcu̧nä̧ jȩpö̧jä̧ tä̧ji̧, ki̧tti̧rö̧'i̧nä̧ cuä'ö icu?" ²¹ Ja̧'hua̧nö̧ pä'öpo'ö Eliasmä ji̧'qui̧cha̧hua̧ u̧huä̧mȩ ja̧'a̧nä̧ huäbodäcuänä jo̧mȩ huä̧mä̧di̧nö̧, jä'epinö TÖ̧Ä̧NÄ̧HUA̧RÖ̧ Diosrö, pä'inö: " TTÖ̧Ä̧NÄ̧HUA̧ Dios ucuotönö jädepäcujä ppä'ädittö pide ji̧'qui̧cha̧hua̧ a̧'cua̧ro̧ppa idepänä ppa̧huä̧chö̧nä̧." ²² TTÖ̧Ä̧NÄ̧HUA̧MÄ ä̧ju̧cui̧nö̧ Elias jäepajimä; Ji̧'qui̧cha̧hua̧ a'cuaröppa ppa̧huä̧chi̧nä̧cu̧, ja̧'hua̧nö̧tä̧ tto'ächinö. ²³ Eliasmä ä̧'o̧ca̧ra̧'a̧ttö̧ ji̧'qui̧cha̧hua̧rö̧ cä'epö mȩyȩdö̧ a̧ju̧ru̧ iyökä̧nö̧ pä'inö: "Topi cui̧tti̧mä̧ a̧'cua̧rö̧." ²⁴ Ja̧'hua̧nö̧ päcua isajumä Eliasrö pä'inäju̧: "Jitämä huo̧juä̧ju̧sä̧ isopäi'önä ucumä Dios u̧mu̧huä̧yä̧jä̧, isopäi'önä ucu cuänä ucuocu TTÖ̧Ä̧NÄ̧HUA̧MÄ.