¹ Piwaada IMINALRITI, coajica feyapacawa, picapa matsia coajica ferrapitaca matsidalri naco. ² Pjiomi njaji wayaperri pia nja irsoni waoya njaji apanatsa inaiki waoya, cayo tsakja njaji waapana. ³ Maoñjerrinaipeca fa, mjanirriperritsa, ima madoiyoanaipe shoca njaji fadoanai. ⁴ Warsotsa wacaoñaca njaji ooni wairralri nhite cayo tsakja njaji tiyena wayanashopa. ⁵ Tsominatsa waoya njaji ipinetacaperri fa, njite mjaidakena fa njite corrinatsa coaji wawafetacawa. ⁶ Fawacatsa icadacawa narso njaji Egipto lricoperri njite njaji Asiria lricoperri wataitácarro warsoca waiñjao aima sho. ⁷ Opi mayami njaji fanirrinaipe inaitjalri njaji imatsicanati, njite fa nakja icaoña njaji namatsicana. ⁸ Njaji kjenaperritsa idejicape icatsa njaji italricanatalri nakja wanaco, njite corrin pacapa pada itaita cada imanacotaca fa njepaite ioya. ⁹ Waoketa waiñjao mayamicalri ipecolrico ima niinica njaji tsolrodaonai iwapacape jalrapocolri ricó. ¹⁰ Jamoca wadada cayoji tiyé sho ima wayamica mawitacai sho. ¹¹ Namatsiketaca nadada njaji inaitjepe Sión lrico, cayo tsakja njaji inaitjepe walridarrope Judá iyacalre lrico. ¹² Napapi nerroa njaji nanapa nakjoite njaji wapiyawanai, njite corrin nanaitja matsia narso njaji pekipenai. ¹³ Njaji atsianai walriapalripe nanaa nawititaca matsicalri ricó njaji paniati inaka jiipada macadalripe sho, Njite njaji yempetipe natetjecawa nawakje cádanaco jaico. ¹⁴ Njaji pekipenai caconaperri corrinatsa nawapaca wayacalre ipananoma. ¹⁵ Corrinatsa catimaca fa njite wajoitaaca carrojiwa icamitsa waiyaketsa niini. ¹⁶ Corrinatsa warsoca watalricanaa; ¡Kjenaperrica fa wamatsicana ima! ¹⁷ Niini carrenaca jliaji wacaolre, njite corrinatsa catjirraca fa, niini icamitsa naoyaca njaji watji. ¹⁸ Icamitsa matsipedaca shoca jliaji sión, icamitsa yamapoipoi njaji yajirrica niini. ¹⁹ Mitsa, Pjia IMINALRITI, pitalricanataca caidalriwetsa, njite piofa caotsa pitalricanatalri lrikjoite cayodalriwenatsa nanaco njaji walricomanai. ²⁰ ¿Coada yami piwadaca fa caidalrinatsa? ¿Coada pimaca fa aima calretsa jalredaoca? ²¹ Pimatsieta tsenakja fa Pirsowawatsa, IMINALRITI, njite wadia tsenakjaotsa matsiaca fa. Picada tsenakja fa cayoji oopi shotsa. ²² Pimenataca fa matsiape njite matsina kerroaca Pjia wakjoete.