¹ Jnuakatsa liaji atsia iikapakada nukjenakariku liirua liaji numinali. ² jlitanua nite likada nuemaniu kadaukaweriku kurintja jalamiwerikuleka. ³ Ajadali likabukueta liaji likapi nukuemawa kaidalitsa, padaa jaledauka. ⁴ Likadaka nuipe nite nuyapa iñawa; nite jlitukuaka naji nuapi. ⁵ Linaita nukuema yakuti matsidali, nite likabukua kaku nunakun yakuti jipitidalitsu. ⁶ Likada nufau kadaukaweriku, kaiji nakatsu naji mayanli uupi. ⁷ Likurarataka nua kurim nutaitaka nupitukau. Likada jawiña naji nupapji ⁸ nintatsa nutjatjaka linai likitsindatakarunua, limakuta liaji nutjatjali. ⁹ Lidanata liaji nuapuwa likuraratakani jipadatsu; litsikeretaka nuapuwa. ¹⁰ kaiji aatetsu yapakada iiñanua, makani mafikali keruani iidawakakadawa; ¹¹ likada tekujle liaji nuapuwa, nite likada nufau nuwakatsa. ¹² Liiraka liaji liyawitatsupa nite likanetakanua litsu. ¹³ Jliinu julum nutjepen liyawitatsupanatsu. ¹⁴ Nupadamau nakakapalim naji nuyakaleta, nakanika nuikau jaledaukakuam. ¹⁵ Lipakantanua jipitidalitsu nite linaka nuiraka jaiku yaana jipitidali. ¹⁶ Libititaka nuetsa kaiji jipadatsu; liduita nuwau jipairikule. ¹⁷ Liaji nukaule kurim matsiaka liufakau; liñaka nuya liaji kuamka katimakanua. ¹⁸ Nini nukaite: "¡ Numinali! Jnuida nite liaji nuapaka uupi mayanni. ¹⁹ Iwaupia nukuyuleka nite kuaji nuanikau, nuiraka liaji jaiku jipitidali nite jipitidalika nuwaupiake. ²⁰ kaidalitsa nuwaupiakan nite nutatjaka nukauleriku. ²¹ Nuwaupikadanaku liaji nukaite nuwapensautsani. ²² Lipeyuketi liaji waminali kurim kuankauli liwayakau nite liaji limatsiaka kaidaliwetsa, ²³ walipekana jaledaukakuan; makadali liaji pimatsiaka." ²⁴ kantsa nukadandaka nukaulenaku liaji numinali", nini kantsa nuapalika. ²⁵ Liaji waminali matsiakan napiya naji yapakapen, naji yumakapen. ²⁶ Makukatsa wapaka liukau waikaule liaji waminali. ²⁷ Matsiatsa lirapiitaka liaji atsia liyenpetikasrikutua. ²⁸ Ikada liufaka lifakatsa makudawanakawa, Dios katsa ikada liyapaka matsiu. ²⁹ iikada likadaka linuma kapaleweriku, litaitakaru liapaka matsiadali. ³⁰ Pikada likajñeta peema likakuda lisru liaji iñakadam, pikada liyapakau matsi. ³¹ Liaji waminali kuriutsa kuankauli limenatakafa,

³² nintatsa likuyuletakatsa, makadalipautsa liaji lipeyukjeti. ³³ kuritsa limatsiketenka nite lifietenka naji nenipe jaledaurikuperi. ³⁴ Lipatuetakaru liipa yapjite piumi naji naitanipe iikau jaledaukariku, ³⁵ kurikaru fanaita matsidali lisru liaji aape atsia liekjuete liaji waminali yenunitedali, ³⁶ kurikaru fanaita matsidali aape naiki isru,¡ liaji waminali kurinta lipeyukakai! ³⁷ ¿kuaka kaakuli nite iimenakali kurikadan jlia iimenaka liaji waminali? ³⁸ ¿kapja linumarikuiteka liaji waminali, limutuetaka yakuti matsidali nite yakuti matsiadali? ³⁹ ¿kuada liaji naiki kafidali lipeyutua kakupekani? ¿kuada liaji naiki lipeyu kakupekan limatsikana iima? ⁴⁰ Pikada waumaka wapuwau wanikasru, wadiakau waminali iikaujle. ⁴¹ Pikada faretaka wakaule nite wakapi waminali iisru. ⁴² "Fanaitaka matsi pisru nite kakupefa, nite pjia kurim pinaitaka matsi wasru. ⁴³ Piñanpakakau piruatsu pjia fapjudam, piinuka naiki nite kurim pinaitaka matsi wasru. ⁴⁴ Piñanpakakau iiyadaukatsu kurikaru pjimi jnatatjaka piinai. ⁴⁵ Pikadaka wafau kamukuperitsu nite nadupetsu naji paana yakale. ⁴⁶ kalaimi naji wakjuema nakuitaka waakuna, ⁴⁷ iifiukjeti nite iitsati inuka wanakule, kenakjeti nite mayankali. ⁴⁸ Jnutiafia tsekua likapakapua liwayakakau liaji nuyakale. ⁴⁹ kaidalitsa katiafiakanua; kurim metakani, ⁵⁰ likapakaruatsa tewakale liaji numinali liuwakarudete. ⁵¹ Kaika liaji jnuti jlitunaipe iima liaji nuyakajle. ⁵² Nainupjia jnua kaiji wipiarutsu, jnapia naji nukuema; nainupia jnua kurinuanika kuamtsupaka. ⁵³ Napeku jnua iririku nite nakada nunaku jipada, ⁵⁴ nite uuni jiyapa nuwidanaku. Nukaiteka: " ¡ uupi liukau liaji jnunana!" ⁵⁵ Jnuwana pipitana, numinali, iririkuite. ⁵⁶ Pimika nuakuami nukaitekadanaku." Maitatsa pinakuriku nuiyakadanaku nutatakadanaku pinai." ⁵⁷ Pitsumitaka jnua nuwanakadanaku pjia; Pikaiteka jnua: "Mafiutsau." ⁵⁸ ¡Numinali, pinuaka numatsikana iima, pimanakuta nua! ⁵⁹ Numinali, pikapenina nanaitali nusru matsi; kakupjia numatsikananaku. ⁶⁰ Pikapa kuanka nakuitaka jnua, kalaimi jnakaitepeka nunaku, ⁶¹ Pjiminina kaunka kakuna nunaku , numinali, nite kuanka nawaupiake nunaku. ⁶² Naji ikaitekape nunaku, nakuitaka, jaledaukakuam nukuemakana. ⁶³ Pikapa kuanka naufakau nite nenkukau; nakanika nuikau nakantakadanaku. ⁶⁴ Pidiata nasru, numinali, nakuada naji nanaitanipe. ⁶⁵ ¡Pikada kapaimankana nakaulerikuite! ¡ pimatsikana jiiwa nanaku! ⁶⁶ ¡Piaka napudan piruariku pinukana jaledaukariku, numinali!