¹ Njite Ahitofel iaco Absalón irso: Panaya picadaa noniwanaca doce mil atsianai noá-carro nopineta David jliadebatsa deepica jliaji. ² Noocaotsa lrikjaolre panaya mjaida cádanconi, nomotoatsa lrikjaolre kjeyanadatsa nofietá carroni. Njaji inaiki lriinaiperri napitocaotsa lrioya niini jlia tsaotsa noino jliaji talricanaati. ³ Nodietaotsa pirso tsenakja njaji inaiki, cayoatsa nodeeca pirsona aapama iáa capisho roomanda iderse, njite namaodacaotsa naofaacawa pjiomi njaji inaiki pjiá cádanaco natalricanaa.'' ⁴ Njite matsia Absalón jimica njaji ahitofel icaiterri, cayo tsakja pjiomi njaji pekipenai talricanaati inaiperri. ⁵ Njite Absalón inaa naaca nawana Husai, arquita tairri lrikjaolre, jlimi-carro coanca lricaiteca. ⁶ Husai ioca cádanaco lriderse, Absalón icaite jlimi coanca Ahitofel iwaopia lrinaitaca, njite lriaco Husai irso: ''¿Capja matsiatsa wanaitjaca cayoji Ahitofel iwaopia capisho?'' Corricadaa, picaite femi coanca picaiteca.'' ⁷ Niini Husai iaco Absalón irso: ''Cotsa matsialrica cayoji Ahitofel icaite capisho panaya.'' ⁸ Niini Husaiicaite cayoji: ''Pianjintsa oowi kjaidadalrica jliaji pjinirri njite njaji lriinaiperri, kerroaperricana cayoji kerroa capisho taarro nadee cádanaco roenipe rooya awacadalrico. Oowi jliaji pjinirri, corriotsa lrimaa-carroca naapiya njaji lrinaikite aimadan jliadaa deepica jliaji. ⁹ Panaya-pa jliaji, oopina lridawaacawa coancawa lrico capa irrirriapji corricawatsa waaji. Niiniotsa naita cadanacoatsa nainoca njaji pinaikite, lriinita cádanacotoa nainoacawa, cocacadaotsa jimi narso, jlimiotsa cayoji: ''Aima nainoca nanakjoite njaji Absalón inaikite.'' ¹⁰ Njiteotsa njaji tsolrodaonai mafiocaperri, njaji kjaidaperri yaawi sho, nafió watsa ima pjiomi njaji Iraelnai najíi oowi kjaidádalrica jliaji pjinirri, njite cayo tsakja njaji atsianai lriinaiperri. ¹¹ Niini nocaiteca pjia piwakeetá-carro pjiomi njaji Iraelnai piinaiwa, Dan nakjoite Beersebá nacojle, njaji aimadan cayoji caida macapawa lricoda sho, pia-carro oowi lrico pjiwaacatsa. ¹² Njiteotsa faa, waotsa lrikjaolre akjerre cawajle catsa, wainoatsa pjiomi njaji David inaikite ima wawapacaotsa pjiomi lri-ricoda jliaji jiiai. Corriotsa wacadaa caafi pada nanakjoite, atee waino tsakjaotsa David. ¹³ Mitsa lripito cadawa yacaalre lricojle, niniotsa pjiomi njaji Iraelnai nadee caotsa jinorrotikja wapeeco carroatsa jliwao jliaji yacaalre iwai njite watsoeta caotsa wapeeco ooni lricojle pjiomi njaji jiipada, corriotsa wamaca pada jiipadada nini.'' Niini Absalón njite njaji lrinaikite naaco: ¹⁴ Matsia pjatoa jliaji Husai, arquita-tairri icaiterri lrioya jliaji Ahitofel icaiterri.'' Dio tsa jliaji icadaa corri-carro njeepaca jliaji Ahitofel icaiterri tja, niini maatsidalri jiwacaotsa Absalón naco. ¹⁵ Njite Husai iaco narso njaji sacerdotenai Sadoc njite Abiatar: ''Ahitofel icaite piatja lriwaopiakje Absalón irso njite narso njaji pekipenai Irael lricoperri, mitsa njoá nocaite lrirso tjecojle nakja. ¹⁶ Niini panaya, warsa iawa kjeya David iderse icaite-carro jlimi coanca; icaite lrirso wadee lrimaacatoa toomo cawa lricotsa ooni jliada deepica jliaji, arabá lrico. Pinaotsa lriyoetá-carro jliaji ooni kjeeya, nayoeta cadaotsa jliaji ooni niniotsa njepá carroca jliaji talricanaati njite njaji lrinaikite,'' ¹⁷ Njite njaji sacerdotenai yenipe, Jonatan njite Ahimaas nawapaca ooni jiwidapa naco En-Rogel lrico wadee nacapacana. Apama narsodarro manatsa rsoaji yaa mana icaite njemi coanca lrinaco jliaji naomalri najíica. Nacaite cádanco njemi lrinaco jliaji yaacoti, ikena naacawa talricanaati David iderse nacaité-carro jlimi. ¹⁸ Mitsa pada yempetitoa icapa njaji yamadade, nini lriaca lricaite Absalón jimi, mitsa Jonatan njite Ahimaas nakjeyapita naaca njiteo. Naocawa ape atsia iipana lrico Bahurim lrico, jliaji atsia lrirsopiaca papji ooni jlicaniapjitsa lriyacalrecoa lricotsa, icatsa naaca nadawaacawa lriricoda. ¹⁹ Lriino jliaji atsia, rsopa lriipana jliaji jlicaniapji roitá carroni njite ropeeco lrinaco comaana, Niini corrin coca yajíi niinica Jonatan njite Ahimaas jiewa lri-ricoda. ²⁰ Njite njaji Absalón inaikite naocawa rokjaolre rsoaji iinarro, njite naaco rorso: ''¿Kjerreo njaji Jonatan njite Ahimaas?'' Njite roaco rsoepaca: ''Opi nayoeta jliaji ooni'' Njite naji cayamitja naomana, njite corrin naokrtana icaamitsa nadiacawa Jerosalén lricojle. ²¹ Njite nadia cayamiwa njaji yajicape iomana, icaamitsa Jonatan njite Ahimaas namotocawa nadawaacalriwa njiteo. Naawa njite nacaite talricanaati David irso: ''Warsa piyoeta kjeya jliaji ooni ima Ahitofel icaiteca pinaco Absalón irso coancaotsa nanaitjaca.'' ²² Ikena David iyoetaca jliaji ooni Jordán naapiya njaji inaiki lrinaiperri pjiomi, njite corri cadana toa jaalre matsia naicawa opina nawayaca nayietaca pjiomiwa jliaji ooni Jordán. ²³ Ahitofel icapa cádanaco corrica njeepa cayoji lricaite capisho, icaamitsa lrimatsieta lriborron lriácarro njiteo. Lridiawa lriipana lricojle, lriyacalre ricojle. Limatsieta cayami matsia naapiya njaji lriipaneta, icaamitsa mayamicani. Lripapiacawa jliwaacatsa. Nadawani jlinirri i-irrirriapjirre lricotsa. ²⁴ David iocawa Mahanaim lricojle. Mitsa Absalón iyoeta jliaji ooni Jordán naapiya pjiomi njaji Iraelnai lriinaiperri. ²⁵ Absalón icadeenakja Amasa-caro naapiyawalreo njaji tsolronaonai aimadan Joab iarromtacao. Itra, ismaelita-tairri yeenipeca jliaji Amasa. Amasa imaapiaca Abigail iapiya, rsoaji Nahas iito, Sarvia iwedoa, Joab jidoa. ²⁶ Absalón njite njaji iraelitanai nemaaca Galaad jipaite ricó. ²⁷ David ioca cádanacoa Mahanaim lricojle, Sobi, Nahas irri, Rabá lricoda, nanakjoite njaji amonitanai, njite Maquir, Amiel irri, Lodebar lricoda, njite Barzilai, Galadita-tairri Rogelim lricoda. ²⁸ Nadee naorsoacarroita nemaa-carro, napajlewa, taazapipe, yaaropetida, trigo, harina cebadape, paniati yeekje nameerritaji, comaana, lenteja, ²⁹ mapaa, mantequilla, oveja, vaaca inia nacadanda potocó-carro, David iñjaope naapiya njaji lriinaiperri. Ima naaco njaji atsianai: ''Njaji inaiki aimadan naomenatsa naiñjawa, maapjicana njite naometsa nairrao oooni.''