¹ David jirra cadanaco pjawa lrinaco jliaji jiipana, Siba, Mefiboset irsodalri lrimoto David ikjoete njite lridee yaamana borro irsocapena naofacarrona nanaco; nacadaa nanaco njaji borro docientoita pan, cien poco ova namerritaji, cien poco tsakja higo iinaca, njite apana jaicotjedaa yaana maafialriya lrico nanaitjanda lriarrodao. ² Talricanaati iaco Siba irso: ''¿Coada pidee njaji?'' Njite siba sheepani, lriaco: ''Njaji borro, njaa-carro iawa nanaco njaji talricanaati ikitsiñape, njite njaji pan, njaji higo naijaope njaji pinaikite, njite jliaji jaicotjedaa yaana nairrá-carro njaji inaiki mjaida cádanacoena-na jalrapocolri ricó.'' ³ Talricanaati iaco Siba irso: ''¿Akjerreo jliaji piminalri idakerri?'' Siba iaco talricanaati irso: ''Atsa lriofawa Jerosalén lrico, ima lriaco cayoji: Jliadaotsa jalredaoca-ca jliaji, njaji Iraelnai nadieta caotsa njonirri italricanaaca norsowao.'' ⁴ Niini talricanaati iaco Siba irso: ''Pjiomi njaji Mefiboset iyaarro piyape nakjaotsana panaya.'' Njite Siba iaco lrirso: ''Pirsodalri caotsa njoa nocaolre kjenadalri iapiya, pjia no-minalri talricanaati. Noma catiimaca pjia nokjoete nasho njaji nonaitjalri pirso.'' ⁵ David ioca cádanacoaBahurim lricojle, ape atsia imoto njiteo Saul inakjoité-dalri, lriipitana pia Simei, Gera irri. Maatsi caacocani lriá-cádanacoa. ⁶ Lrioca jiipada sho David ikjaolre, njite naikjaolre njaji caconaperri talricanaati irsoperri, naoyatsa njaji tsolrodaonai aimadan, njaji iwapacape tsoomi jliaji talricanaati yaacapewa patojliemajle njite atsiajliemajle. ⁷ Simei iwana kjaida maatsikjaitsa ricó iacoti: ''¡Warsa piawa ajaiteji, pjia mayacalredalrimi, pjiainocaita inaiki! ⁸ Wa-Minalri icadaaca irso nacoadao njaji Saul ikitsiñape pinoji, jliaji pjitalri ioya italricanaaca. Wa-Minalri icadaaca jliaji talricanaatiapani pirri Absalón irso. Mikjapanitsa pjia, ima inocaitaca inaiki pjia.'' ⁹ Njite jliaji Abisai, Sarvia irri, iaco talricanaati irso: ''Jliaji tsiino mayamni corrin lritaita caacoca maatsi no-minalri talricanaati irso cayoji. Picadaa Noá noyoá jliwida waoyao.'' ¹⁰ Mitsa talricanaati iaco lrirso: Corrin nooma noajica coanca iwaopiaca shaa Sarvia ienipe. Corrin wajíi Dio cadaatsa jliaji inaalri caacoca norso maatsi. Niini cayo cadaa, cocantja itaita icaitecani: ¿Coada caaco pjia maatsi talricanaati nacó?'' ¹¹ Niini David iaco Abisai irso njite narso pjiomi njaji lrirsoperri, cayoji: ''Picapa coanca, jliatsa jliaji noenipe, jliaji nonakjoité-dalri lrioma lriinoca njoa. Omamikena jliaji Benjamín tairri, icaamitsa lriomaca maatsica njoa. Ikcadeena jliwaacatsan, picadena caacó-carro maatsi. Wa-Minalritsa icadaa caacócarro maatsi. ¹² Wadetsantja wa-Minalri icapa coanca njorrapitaca, njiteotsa lrioma lricaoñaca njoa maatsi capoa caacoca nonaco oopica.'' ¹³ David iawa naapiya njaji lrinaikite inipolrico, njite Simei iawa malritsicoa lricotsa, paa caacoca maatsini, lripeeco jiipada, jiipai nanaco lriacayawa. ¹⁴ Mitsa David njite njaji iacaperri lriinai mjaidetsana, niini nawafetacawa deepi cádanacoenatsa naicao. ¹⁵ Njite Absalón njite pjiomi njaji Iraelnai lrinaiperri, naocawa Jerosalén lrico. Njite nainai Ahitofel. ¹⁶ Njite Husai, arquita-tairri, David ikitsindaji, lriawa Absalón iderse, Husai iaco Absalón irsoi: ''¡Wiáa watsa caafica jliaji talticanaati! ¡Wiáa watsa caafica jliaji talticanaati! ¹⁷ Niini Absalón iaco Husai irso: ''¿Icatsa matsiaca pjia cayoji pikitsindaji irso?'' ¹⁸ Husai iaco Absalón irso: ''¡Corrina! Lriinai watsa noawa liaji wa-Minalri iniwananda njite njaji Iraelnai tsakja. Lriinai watsa nofawa. ¹⁹ Njite, ¿Coca irso nosotsa nodejica? ¿Capja corrica matsiaca nodejica lrirso jliaji lrirritsa? Cayotsa nodeji capisho piatsa pjinirri irso lripeyajle, cayo tsakjaotsa nodejica pirso panaya.'' ²⁰ Njite Absalón iaco Ahitofel irso: ''Picaite femi cocacaotsa njaji warsolritsa wanaitjaca panaya.'' ²¹ Ahitofel sheepa Absalón, lriaco lrirso: ''Warsa pia pimaa naapiya njaji inaitjepe pjinirri irsoperri, njaji lrimacaji nawapá-carro talricanaati dapana, niniotsa pjiomi njaji iraelitanai njemiotsa ipoati shodalrica pjia pjinirri irso. Niiniotsa kjaida pjacaotsa nakitsindataca pjia njaji piinaiperri. ²² Niini njaji Absalón irsoperri nanaitja lripanapocoa talricanaati dapana nacó, ikena Absalón imaaca naapiya njaji inaitjepe jlinirri irsoperri njite pjiomi njaji iraelitanai nacapa jliaji lrinaitjalri. ²³ Njaji Ahitofel icaitenialre natrso nacoadata matsia jliawajli, njemica lrirso Dio capisho jliaji caacolri narso. Cayo pia njemica njaji yaacoti Ahitofel icaiteji narso njaji yamadade, David njite Absalón.