¹ Aima walria jiapodan, Absalon inaitja jlieco carrofiape njite aima caballo tsakja lrirsowao njite cincoenta atsianai jiecocaope lripeyajle. ² Absalón icafiawa mana piyompinacotoa njite lriemawa lricodapi jliaji inipo yaacadawa yacaalre ipananoma ikjaolre. Niini cádanaco mana njaji inoacacapewa naapiyawaca njite naamanawa talricanaati iderse lricaite-carro nanaco coanca, Absalón iwana manana lrikjaolrewa, lriaco narso: ''¿Coandalri jliaji piyacalre?'' Njite jliaji atsia jliepani: ''Jliaji pirsodalri nayacalre rikjoité-dalrica njaji Iraelnai.'' ³ Njite Absalón iaco mana lrirso: ''Ajádalri, corrin pacapa pada maatsidalri pinaco, mitsa corrim pacapa pada astia talricanaati icadanda jimicadantja pirso cayoji nocayosho.'' ⁴ Absalón icaite pja lrirso: ''Nooma tja icadaaca njoa talricanaatiwa icapacada jliaji fepaite, njoácarrontja icaite nanaco njaji inoacacapewa nano cádanaco noderse njitena nonaitja lrirso matsia.'' ⁵ Niini naacádanaco manawa Absalón iderse, coandalricatsa atsia, Absalón ipiajleta mana lricaapi lrikjaolre jlipá-carro, njite lritsootso lricaapi naco. ⁶ Caimitsa Absalón inaitjaca pjiomi njaji Iraelnai yaacape manawa talricanaati iderse lricaité-carro coanca namatsicanaa nacó. Niini pjiomi njaji inaiki Iraelnai matsiá nacapaca Absalón irso. ⁷ Njite coatro walria iwayacacawa, Absalón iaco talricanaati irso: ''Pinaitja matsiacalri piocadaa noawa noá-carro nocaoña pada nocaitenda wa-MInalri irso norsolritsa nonaitjaca Hebrón lrico. ⁸ Ima jliaji pirsodalri lrinaitja pada nonaitjaoda nofá caojli piatoa Gesur lrico, Aram lricoda. Nocaite pia cayoji: ''No-Minalri icada cadaa nodiaca tsenakja Jerosalén lrico noá pedacaotsa matsiadalri wa-Minalri irso.'' ⁹ Niini talricanaati iaco lrirso: ''Pienawa, pimaodacatsa.'' Ikena Absalón iawa Hebrón lricojle. ¹⁰ Mitsa Absalón imeenaca atsianai dawacalritsa ideecaperri iacoti lrinakjoite narso pjiomi njaji Irael poco naofacawa lrico, cayoji: ''Jimi cádanacoatsa trompeta imaolre icaiteotsa cayoji: ''Absalón-ca jliaji talricanaati Hebrón lrico.'' ¹¹ Dociento atsianai iawa Jerosalén lrikjoite Absalón iinai, njaji lrinaijitsa. Naawa lriinai corri-cadanatsa naají cocaca jliaji Absalón iwaopialri inaitjaca. ¹² Absalón iino cadanatoa maaficalri, lrimeenaca naacarro naoma Ahitofel lriyacalre rikjoite Gilo. Pada icaitecada David. Matsinaalri piá jliaji Absalón inaitjalri jlinirri ikjoete ima njaji inaiki yaacapewa Absalón iinai paa aimacana. ¹³ Pada ideecada iacoti iawa David iderse, lriaco lrirso cayoji: ''Njaji atsianai Irael lricoperri naacawa Absalón iinai.'' ¹⁴ Niini David iaco narso njaji lrirsoperri lriinaiperri Jerosalén lrico: ''Warsa waawa ajaiteji, ima corriotsa Absaló icadaa carroca caafi pada wanakjoite. Imatsietacawa kjeya waacarroa, corricadaa jliawatsa ino kjeya waikjaolre niiniotsa lriinoca fa, njite lrinoatsa njaji inaiki wayacalre ricope matseeta sho.'' ¹⁵ Niini naaco njaji lrirsoperri: ''Njaji pirsoperri, nawapaketsa nanaitjá-carro cayoji pinaa capisho nanaitjaca, pjia talricanaati. picaitena coajica.'' ¹⁶ Ikena lriacawa jliaji talricanaati njite pjiomi lriipaneta lriinai, mitsa lrimaca diema inaitjepe lrinaiperri pia nawapá-carro jliaji talricanaati-dapana. ¹⁷ Talricanaati imoto cayamiwa njite pjiomi njaji inaiki naawa jliapodam, naocatoa nemawa piketem dapana lrico. ¹⁸ Pjiomi njaji lritsolrodaonai naawa lriinai, lripeyajle naawa njaji cereteonai, peleteonai, njite pjiomi njaji geteonai. Seiciento atsianai iawa lriinai Gat lrikjoite. ¹⁹ Njite David iaco Itai irso pada geteo-tairri: ''Piofenawa, coadantja pinojica wainai. Inaikitsa pjia waoya inocada pada jiipai nakjoite. Piofena lriinai jliaji walridalri talricanaati piipana lricotsa. ²⁰ Meyamnaatoa piocawa waderse. Corritoa noaji kjerrecaotsa noawaji, niini corrin nooma piajicawa macadatsa wainai nokjaote. Niini matsiami pidiacawa nainai njaji pikitsiñape piipana lricojle. Piinai catsaotsa wa-Minalri, corriotsa lrimacá carroca pjia.'' ²¹ Mitsa Ita iaco talricanaati irso: ''Ajádalri caafica jliaji wa-Minalri, njite caafi cádanacotoa jliaji no-talricanaa, njite akjerre cadaotsa lriawa jliaji no-minalri talricanaati, nirse catsaotsa lriawa piinai jliaji pirsodalri, cotsa coadaca mayami cadaotsa njoa o caafi cada tsaotsa njoa.'' ²² Niini David iaco Itai irso: ''Matsiatsa, pino pedena wainai.'' Cayotsa Itai, geteo-tairri iawa talricanaati iinai, pjiomi njaji atsianai lrinaiperri njite njaji lrikitsiñape. ²³ Pjiomi njaji inaiki naawa naiyacayawa nayoeta cádanacoa jliaji jiipai pacoaca-dalri Cedrón dalri. Talricanaati iawa pacoacatsa nainai. Naawa pjiomi njaji inaiki inipolrico jalrapocolri lricojle. ²⁴ Sadoc tsakja iawa njite pjiomi njaji levitanai tsakja njite nawakje nadee nainaiwa jliaji arca Dio iacoam iarroda. Naorrocoeta nadee Dio iarcani njite Abiatar iawa nainai. Nawapa toa kjerrekena namotowa pjiomi njaji inaiki aimadan yacaalre ioya. ²⁵ Talricanaati iaco Sadoc irso: ''Piwakje pidieta tsenakja jliaji wa-Minalri iarcan yacaalre lricojle. Matsia cadatsa wa-Minalri icapaca njoa Lridieta tsenakjaotsa njoa ajerreji, njite Lricada tsenakjaotsa nocapá jliaji arca njite lriofacawa lrico. ²⁶ Mitsa, corricadetsa matsia Lricapaca norso, alriotsa njoaji. Lrinaitjenaotsa noinai coancatsa Lrioma Lrinaitjaca noapiya.'' ²⁷ Lriaco tsakja lriaji talricanaati sacerdote Sadoc irso: ''Icapacadaca pjia coanca piyejle. Pidiawa pimaodacatsa yacaalre ricojle naapiya njaji pienipe yamadan, pirri Ahimaas njite Jonatan, Abiatar irri. ²⁸ Nowapaotsa tomoitacawa lricotsa ooni Arabá lrico akjerrecaotsa pimeenaca iacoti norso picaité cawa norso coanca nirse. ²⁹ Niini Sadoc njite Abiatar nawaakje nadieta jliaji Dio iarcani Jerosalén lricojle tsenakja, nirsetsa naofawa. ³⁰ David jirrawa jliaji Awacada Olivo matsapatontsa njite lriitacatsa jliwida. Cayo tsakja njaji inaiki iacapewa lriinai, naita njewida njite naiya tsakja njerra cádanaco jliaji jiipana. ³¹ Pada iaco David irso: ''Ahitofel iaca nainai njaji yemacapewa pikjoete Absalón iinai.'' Niini David itatjaca Dio iinai cayoji: ''Pjia Dio matsiadalri, pinaitja matsiacalri macadaatsa lricaiteca yaacoti matsiadalri jliaji Ahitofel.'' ³² David ioca cadanacoenawa Awacada ípolrico nacojle, jliacarroji mana lria matsiadalri Dio irso, Husai, arquita tairri iocawa lriderse lritsyan tserrendalri-natsa iapiya njite jiipai pjiomi jliwida nacó. ³³ David iaco lrirso: ''Pinocadatsa noinai, jirrapitinaatsa nodee-carro pjia. ³⁴ Matsia pja pidiacawa yacaalre lricojle, Absalón iderse, njite picaite lrirso cayoji: ''Talricanaati, pirsodalri aotsa njoa cayoji pjinirri irsodalri capisho piatsa njoa, cayo tskjaotsa pirsodalrica njoa.'' Niiniotsa matsiaca pjia noro pimanalrietácarrocaotsa Ahitofel iaco.'' ³⁵ Sacerdot Sadoc njite Abiatar watsa nja pikitsiñape nini. Coca cadaotsa pjimi nacaiteca talricanaati dapana lrico, picaiteotsa narso njaji sacerdotenai Sadoc njite Abiatar. ³⁶ Narso nakitsiñape nirse yamada neenipe, Ahimas, Sadoc irri; Jonatan, Abiatar irri. Pimenacaotsa norso iacoti nanakjoite pjiomi njaji pjimirri nirse.'' ³⁷ Ikena Husai, David ikitsindaji idiawa yacaalre lricojle, Absalón iocampe cadanawa Jerosalén lricojle.