¹ Nitse panaya lriaji Sarvia irri lriajisha coanca tsalricanatsi icaolrerrico lriomakena lricapaca Absalon shenacja. ² Nini lriaji Joab imenaca apada idecaoda iacotsi Tecoalrico lricaitecarro lriomaca apama inarro cajikjedaroo lridecarrono lriso. Nini licaiteca lrirso: ''Pinaitja mashia picadanoo caiji mayamicapisho rokishinda nitse pjietaca roshayanio itsani. corrin piñjetaca aceite ronaco, misha picadano cjaiji apama inarro sho oopidarroena mayamica ikishinda. ³ Nitse pjiaa lricaojlee lriaji tsalricanatsi nitse picaite cayojii nocaitecapisho.''Nini Joab icaiteca coamicaosha rocaiteca tsalricanatsi irso. ⁴ Nitse rjoaji Tecoa lricodarro inarro cacocano tsalricanatsi irsono nitse rotoda rorjipadao jipairico roaco: ''Pikindata noa tsalricanatsi.'' ⁵ Nitse lriaji tsalricanatsi lricaite rorso: ''¿coanca pjiaa?'' Nini rjoepacani: ''Ajadalri mayoidoancja njoaa oopica mayamica lriaji noinirri. ⁶ Njoaa pirsodaro norsopiatja yamada noenipe nitse nainoacao acajii teeco nitse corrin pacapa apada jienitacaodana naoyawaca. Nini neñacacao icamisha nainoacacao nitse mayamicani ⁷ Nini panaya njapoca inaiki pjiomi oopina njrretacao rocoetse rjoaji pirsodarro nini nacaiteca: 'piaa warso lriaji ahsia incadan lriaji lriwerri wainocarroshacja lriajiwa lricoadao lriaji lriwerri lrinolri.' Nini panaya naomashacja nawayaketaca lriaji jipacaoda pjiomi njaji nayarro. Nitse naoma nayalrintaca lriaji jamodalrina iofacadena norso nitse corrisha naoma nacadaca nocaoda noinirrincaolre iyarro nitse corrishca norso lrienipeca nofacadanacotsowa ajii jalredaocalrico.''' ⁸ Nini lriaji tralricanatsi lricaite rorso: ''Pidiawa pipanalricojlee nitse njoasha icapaa lrinaco lriaji picaiterri,'' ⁹ Nitse rjoaji inarro Tecoalricoitedarro roaco tsalricanatsi irso: Pjia tsalricanatsi nominalri apada imashicanatsi iocacadao picadaosha nanacon njaji nokiñape, ima pjiaa tsalricanatsi mamashicadalri casha pjiaa.'' ¹⁰ Nitse lriaji tsalricanatsi: ''Cocadaa icaitepe coandalricasha pirso iacotsi mashidalri picaite lriacona norso wadee lrima picaoca.'' ¹¹ Nitse roaco lrirso: ''Mashia pinaitjaca, pitsatja Dio ipitananaco Wadeesha lriaji ahsia iomari inocalriwerri icoada corricasha lrino padaa wanacoitse, corricarroesha naino njaji noenipe.'' Nitse tsalricanatsi jiepacano: Aja caiwasha nonaitjaca, Dio ipitananaco, lriawasha lriaji pienipee manacoashani.'' ¹² Nitse, roaco; ''Pinaitjapjaa mashia rorso rjoaji pirsodarro picadapja nocaite lrirso lriaji nominalri tsalricanatsi. nini lriaco: ''Cacopjiaa.'' ¹³ Nini rocaiteca: ''¿Coadashacja piwaopia nacjoetse cayo njaji Dio ienepe picañjata mashiteca pjia? Ima lriaji tsalricanatsi lricañjatacacao caiji camashicanadalrisho ima corrica lridieta lriaji jirrapjitsacada lrienipe lripanalricojlee. ¹⁴ Ima faa pjiomiosha mayamica caiji parrocapisho ooni jiipairrico corri papieta pjetacani shenacja. Mini lriaji Dio lricada mayamica faa, misha lriaji Dio lripieta lricada faa caiji walriperrisho ninii pjia pirsosha pinaitjca cayo lriapiya lriaji pienipe. ¹⁵ Nini panaya, nocapacadanaco nonoca nocaite pirso lriaji nominalr pjiaa tsalricanatsi, ima njaji inaki nafioca piwana. Misha rjoaji pirsodarro cayo rocaiteca: Nini panaya cacocaosha njoa tsalricanatsi irso.Capjantjapa lriaji tsalricanatsi ideca lriaji rotsatjalri lrinai rjoaji lirsordarro. ¹⁶ Capjaoshapa lrimi norso lriaji tsalricanatsi, caiji nodietacapisho lrirso lriajicarro lrinaco lriaji ashia imashiketacada njoa nitse njaji noenipe pacoaca, imalri nacao njaji wakiñape lrioya lriaji jipai lrcadanda warso lriaji Dio. ¹⁷ Nini rjoaji pirsodarro rotsatjaca lrinai, ''Dio, pinaitja mashia picadaa njaji lriaco lriaji tsalricanatsi nominalri lricada metsami noajiacacao ima lriaji tsalricanatsi caicanji apadaa angel Dio njitsedalri lriaji nominalri tsalricanatsi icasha jienitacada lriaji mashiadalri nitse lriaji mashidalri shacja. Lriasha piminalri Dio pina.'' ¹⁸ Nitse lriaji tsalricanatsi lriepacano nini lriaco rorso: ''Pinaitja mashiacalri picaite ajadalri nanaco pjiomi njaji notsatjalri inaco pinai.'' Nini rjoepacani: ''Pjiaa nomianalri tsalricanatsi panaya cacoenapjia.'' ¹⁹ Nitse lriaji tsalricanatsi lriaco: ''Corrisha Joab jiewa pinai pjiomi lrinaco lriaji?'' Nini rjoepacani roaco: Ajaa caiji picaitecapisho, nominalri pjiaa tsalricanatsi, corrin patsaitaca padawaca lriaji mashadalri lricaiterri lriaji nominalri. Ajaa lriasha pirsodalri Joab imenaca njoaa nocaitecarro pirso lriaji iacotsi ajadalri. ²⁰ Ima lriaji pirsodalri Joab lriasha inaitja lritejletacarro lriaji jiyapalrio. Misha cajikjedalrica lriaji nominalri, lriasha iajicada mashia, caiji Dio iangelensho, nini lriajisha pjiomi cocacasha jiyalrio lriofacadaco ajii jecoapirrico.'' ²¹ Nini lraiji tsalricanatsi lriwana Joab cacocarrini lriapiya: ''Pjimi panaya, lriaji piomari notaitjaca. Nini pienao, nitse pidietaca lriaji ienpetsi Absalon." ²² Nitse lriaji Joab lritoda lriorsirpadao jipairrico lrifiocapoa nini lriaca mashiadalri tsalricanatsi irso: Joab icaite: ''panaya lriaji pirsodalri lriajinsha lrioketaca mashiadalri lricapaa, lriaji nominalri, tsalricanatsi, ima lriaji tsalricanatsi lrinaitja lriaji nocaiterri lrinaitjca.'' ²³ Nini lriacao lriaji Joab, lriawa Gesur-lrico, nini lriaca lridieta Absalon lridiacarro Jerusalen-ricolre. ²⁴ Nitse lricaite lriaji tsalricanatsi: ''Lritsaita lridiacao lripanalricojlee, misha corrin lritsaita lricapaca njoa.'' Nini lriaji Absalon lridia lripanalricojlee, misha corrin lrialricapa tsalricanatsi icjaolree. ²⁵ Panaya pjiomi nanacoitse njaji inaiki corripia pacapa apada napeyonda lrimashiaca ima caiji Absalon icaisho. Ima corripica pacapa lrimashicana pjiomi ajii lridakenaco. ²⁶ Nitse lriyoapia mana njaji lrishicolree lriwayacacadanaco lriaji apada comoi, ima jamiyakena lriajina, nini lricaomanaca cosoapa njemiñaca njaji lrishicolree; nini lriaji njemiñaca icasha lriaji dos kilo y medio, lriwicana aji nawicarrodalrico. ²⁷ Nitse lraji Absalon lrirsopia madalrida lrienipe nitse apama lrito, rjoaji inarro roipitana Tamar, mashiadaroca rjoji inarro. ²⁸ Nini lriofaca yada camoi lriaji Absalon ajii Jerusalen-rico misha corrin lria lricapa tsalricanatsi iderse. ²⁹ Nitse Absalon imenaca apada idecaoda iacotsi Joab irso lrimenacacarro tsalricanatsi irso misha lriaji Joab corrisha lrino lricjaolree, Nitse Absalon ipiete imenacaca yamapiashoda lrimenacaca nitse corrin shencja lriepani. ³⁰ Nini Absalon icaite narso njaji lrirsoperri, coaji iaji, lriaji Joab jipaite capjaa shomicashan lrioya lriaji noyada, capjaa lrirso lripania. Nini iawa imjaitacarroni.'' Icamisha, njaji lrisorperri lriaji Absalon naca namjaita lriaji lripaite. ³¹ Nite lriaji Joab lrincoa lriacarro Absalon ipanalricojlee nini lriaco lrirso: ''¿Coada pirsoperri imjaita lriaji njopaite?'' ³² Nitse Absalon jiepacani lriaji Joab: 'Picapakje nomenca pjiaa picaojlee idecada iacotsi picaiterro: Misha pinoena nomenacacarro picaite tsalricanatsi noipitananaco: ¿ima nonoca Gesur-lricoitse? Mashiapja tsoantja norso acasha njoaca. Misha panaya, icadaa nocapani lriaji tsalricanatsi nitse njoacada lriaji inaitalri mashidalri icadaosha lrinocarro njoa. ³³ Nini Joab iaa icaite lriaji tsalricanatsi. Nitse tsalricanatsi iwanacadanaco lriaji Absalon, nini lriacao tsalricanatsi iderse nitse lriocacadanaco lritoda lriorjipadawa jipairrico tsalricanatsi irso, nitse lriaji tsalricanatsi lriemiaca Absalon ipolrico lricaiteshopa liyapetaca lrioya lriaji lrimashicana