¹ Nitse, lriapodan lriaca jiyapalrio, lriaji Amnon, David irri, nini lricapajica roaji lriwedoasha Tamar lrinirrinacoishe, Absalon iwedoacasha, pana David ienipe shaca. ² Nini lriaji Amnon lripeyocatjano mashinjaa roaji lriwedoa Tamar. ima rjoaa inarro mjeyapacadarrotsoa ashia inai, nini jirrapitsinaca Amnon irso lrinaitjacantja coandalrica rorso. ³ Misha Amnon irsopia apada likishindaji Jonadab lripitana lrirri lriaji Simea, David ipjerri shaca, lriaji Jonadab icapiasha apada ashiashodalri nitse cashadalri. ⁴ Nini Jonadab iaco Amnon irso: ''Coada, pjiaa tsalricanatsi irri, corri joiwi pjiaa jalredaocacoami? ¿Corri pioma pikaiteca norso?'' Nini Amnon jiepacani: ''lriaco nopeyoca roaji Tamar, lriwedoa lriaji nowerri.'' ⁵ Nitse Jonadab iaco lrirso: ''Panaya pinaitjacao caiji iyamicadasho piorsoawa picamanlrico. nitse washa pinirri inocadanacoena icapapjiaa, pitsatjawasha lrinai: '¿pjantja pitsaita pimenacaca roaji nokishidoa Tamar ronocarrontja roa noiñjawa nitse royanacarro lriaji iñjaodatsi norso nitse roasha iyaca noiñjao?'''' Nini lriaji Amnon lrinaitjacao caiji iyamicadasho. ⁶ Nitse lriaji tsalricanatsi lrinocadanacoena lricapani, Amnon iaco tsalricanatsi irso: ''Panaya noma pimenacaca roaji nokishidoa Tamar ronocarro royana noiñjawa ashaji nocodapi.'' ⁷ Nitse David imenaca apada iacaoda icaite roaji Tamar ajii rofalri nini, lriaco rorso: ''Panaya piacawa lripanalricojlee lriaji pipjerri Amnon piacarro pinaitja lriñjao.'' ⁸ Icamisha Tamar iacao rokishin Amnon ipanalricojlee lriorsoalrinini. nitse rocacadanacoenawa lricaolree icamisha ropashiaca lriaji ronaitaodao petjee lricodapi sha, nitse roetacani tsiyeerico. ⁹ Nitse pomacacadanacoena nii roaca lriaji petje lriñjacarron, misha corrin lrioma lriñjaca. Nitse Amnon iaco narso njaji lricodapiperrisha iemao: ''Imotsoetapjiomi njaji, teeco nooya,'' Nini nacadaca lriwakesha. ¹⁰ Nitse Amnon iaco Tamar irso: ''Pjieeta lriaji noiñjaoda ajii nomalri nini piacarro noiñjaoni. ''Nini roaji Tamar rjotaca lriaji petje ronaitjanda, nitse rjoetacani lrimalri nirse lriaji Amnon ropjerri. ¹¹ Roacadanacoena rjowa lriñjao, nini lripacano nitse lriaco rorso: ''Piino, piorsowa noinai, no wedoa.'' ¹² Nitse rjoepacani: ''Corrin decja, ima nopjerrica pjiaa, mjarjasha norjoa pinai, ima corricasha cai nanaitjaca ajii Israel-rico manaitjasha cafainadalri norso. ¹³ ¿A kjerrenta nopitowa lrioya lriaji ipaimantsi? ¿nitse pjiaa? ¡Cayontja pjiaji nacaisho njaji padapena majicaperri Israelnai! Misha, pitsaitacadecja cacoca pjiaa lriapiya lriaji tsalricanatsi, corrishapa lrifarrocarro njoa pioya''. ¹⁴ Nitse corrin Amnon jimica rorso, nitse cjaidapjaa Tamar ioyani, nini lripacaca roapiya cawilrecarroni roapilla. ¹⁵ Nitse mashi Amnon icapaa Tamar irso apjateje. Nitse mashi Amnon icapaca rorso mashipjatsoa lrioya lriaji lrikemicadanaco tsoano. Nini Amnon iaco rorso: ''pjinicoa pidiacarroa'' ¹⁶ Misha roepacani: ''¡Corrina! ima mashipjantja nonaitjaca noacadantja jaitseoji pawada mashipjatsoa pinaitjlri norso!'' Misha lriaji Amnon corrin lrimica rorso. ¹⁷ Teecojlee, nini lriwanaca njaji idejicape lrirso nitse lriaco: ''Idee rjoaji inarro tecoo noya, nitse naitaca lriaaji panshinoma taimi rodana ¹⁸ Nitse njaji lrirsoperri njetacano padanajiee nitse namotsoetacadanaco lrita taimi lriaji lripananoma wade rodiaca rjoewao. Rjoaji Tamar ronacaca roshayani mashaidalri ima njaji tsalricanatsi iitonaipe corripetsoa jiyapa ashianai inai njetaca nashayan mashiaperri nanaitjaca. ¹⁹ Nitse rjoaji Tamar rocada tsiye iwayolre rjofidanaco nitse ropataca lriaji roshayanalre rocañatacarro lriaji inonacano. Nitse rocada rocapii rjowidanaco rocañjatacarro caiwica lriaca ronaco lriima lriaji lrinaitjalri rorso. Nini roiyaca kjema rocayawa. ²⁰ Nitse lriaji ropjerri lritsatjano: ''¿Capjaa cawilre piapiya lriaji pipjerri Amnon? Nini panaya corriwasha coca irso picaite, pjiaa nowedoa. Ima pipjerricani. Mjetasha picaolrewa lrinaco lriaca jiyapalrio.'' Nini rjoaji Tamar rofacawa mainirrisha lripanalrico lriaji ropjerriAbsalon. ²¹ Misha tsalricanatsi David jimicadacoena lrinaco pjiomi lriaji jiyapalrio, nini kerroacani jorre. ²² Nitse lriaji Absalon corrin coca lricaite Amnon irso, ima mashica Absalon ipacapa lrirso lricaotse lriaji lrinaitjlri rorso ima lrimacoataca Tamar lriwedoa. ²³ Yamada camoi iapodan Absalon irsopia inocape ovejas idejicape ajii Baal Hazor lrico, ima shomidalricashan Efrain iyacalree ioya, nitse lriaji Absalon lriwana pjiomi njaji tsalricanatsi ienipe nacarro nacapa nirse. ²⁴ Nitse lriaji Absalon lriawa tsalricanatsi icaolree nini lricaiteca: ''Panaya picapa, njaji nonaikite nainoca no ovejani, nini noma piaca picapjaa noinai, nitse njashacja njaji pirsoperri.'' ²⁵ Nitse lriaji tsalricanatsi lriaco Absalon irso: ''Corrina, njaji noenipe, corrisha watsaita wacao pjiomi wamadaa picaoca.'' Mini lriaji Absalon lrifoitacasha lriaji tsalricanatsi, misha corrinlrioma lriacao, lriaa mashiada Absalon irso. ²⁶ Nitse, Absalon iaco lrirso: ''Corricada, picadaa nowerri Amnon iino wainai.'' Nitse tsalricanatsi iaco lrirso: ''¿Coadaa pioma Amnon iaca pinai?'' ²⁷ Nitse lriaji Absalon lripietapja lritsatjacana David inai, nitse lricadaa nawa pjiomi lrinai njaji lrienipe lriashacja lriaji Amnon. ²⁸ Nini Absalon icaitecayamina njaji lrirsoperi: ''jimi mashiaa norso. icapacadanacoasha Amnon idewanakena, nitseosha nokaitecadanacoasha irso: 'Jipani jipaosha lriaji Amnon,' Nitse washa iino lriajio. Misha mafiosha inoca lriaji tsalricanatsi irri. ¿Ima corrisha jiaca lriaji inolrin icamisha jiepaca noaco? Cjaidaa jiaa nitse joiwi icapaca.'' ²⁹ Nini njaji lrirsoperri lriaji Absalon nanaitja cayo lriaji Amnon lricaitecapisho narso. Nitse pjiomi njaji tsalricanatsi ienipee, pjiomi napitocawa na mulan-naco. ³⁰ Nitse acadanaco tsoanaji inipolrico apada icaite David irso nanaco lricaitecawa: ''Absalon inoca pjiomi njaji tsalricanatsi ienipe corrikesha cafii nanacoitse pada. ³¹ Nini lriaji tsalricanatsi lriemacao, lriopata lrishayan naco nitse lriorjoacawa jipairrico; caishacja pjiomi njaji lrirsoperri nanaitjaca naiyaca lrinai. ³² Nitse lriaji Simea irri Jonadab, David ipjerri, lricaite lrirso: ''Corrisha nocashataca pjia nominalri corrisha lrinoencana pjiomi njaji pienipe, icamisha lriaji Amnon mayamirrica. Ima oopipiena Absalon iwaopia inocarroni cawilree cjaojlee piani lriwedoa Tamar iapiya. ³³ Misha njoa corrin nocaite lrimi lriaji tsalricanatsi ajadalri lrinaco lriaji jiyapalrio, nini mawaopiasha mayamicana pjiomi, icamisha mayamirrica lriaji Amnon.'' ³⁴ Nitse Absalon ipitocawa: Misha lriaji iwapacada lriaji nadana lrirreta lricapacarro nini lricapa aima inaiki inoca inipolrico penjetse. ³⁵ Nitse lriaji Jonadab lriaco tsalricanatsi irso: ''Picapacapaa, njaji tsalricanatsi ienipe anaina nanocarra. Caisha jii lricaitecapisho pirso lriaji pinaikite.'' ³⁶ Nitse corricadanaco tsoa yami cacocani njaji tsalricanatsi naocao, nini njematjaca cjaida nitse naiyashcja coyolree. ³⁷ Misha lriajiAbsalon oopi lripitowa Talmai inai, lrirri lriaji Amiud, lriasha tsalricanatsi ajii Gesur-lrico. Nini lriaji David lriyaca caidalrisha inonacan lriapodan lriaca lrirrin coirri. ³⁸ Nitse lriaji Absalon lripitocawa madalrida comoi. ³⁹ Nitse lriwaopiakje lriaji tsalricanatsi David lriomena lriaca lricapa Absalon iderse ima corrikesha inonani Amnon jiapodan mayamicayamin.