7 ¹ Pikinini meri bilong king! Lek bilong yu i naispela tru taim yu werim sendal bilong yu na mak long lek bilong yu i olsem bis i dia tumas , olsem man i gat bikpela save long katim ston wantaim han long kamapim ol piksa bilong ol samting. ² Namel long bel bilong yu i olsem raunpela plet na em i no save sot long gutpela wain. Bel bilong yu i olsem mauten bilong wit wantaim ol gutpela plaua i raunim. ³ Tupela susu bilong yu i naispela tru olsem tupela bebi bilong meme. ⁴ Nek bilong yu i longpela olsem taua ol i mekim long bun na ai bilong yu i olsem raun wara i stap long Hesbon arere long bikpela dua bilong Bat Rabim. Nus bilong yu i longpela olsem taua bilong Lebanon i lukluk i go olsem long Damaskas. ⁵ Het bilong yu i bikpela na i go antap olsem maunten Kamel na gras long het bilong yu i blakpela tru. Longpela bilong en i mekim king i hat long lusim tingting long yu. ⁶ Yu luk gutpela na naispela tru na mi gat bikpela amamas long yu, meri husait mi laikim tumas! ⁷ Longpela bilong yu i olsem pam diwai na susu bilong yu i stap wankain olsem prut bilong dispela diwai. ⁸ Na mi tok, "Mi laik i go antap long dispela pam diwai na mi bai holim ol han bilong en." Inap susu bilong yu i stap olsem prut bilong diwai wain na gutpela smel i ken kamap long nus bilong yu olsem switpela prut bilong diwai. ⁹ Na inap maus bilong yu i swit olsem gutpela wain na ron isi long meri husait mi laikim na salim i go long maus bilong husait ol i slip. ¹⁰ Mi bilong dispela man husait i laikim mi, olsem na em i gat bikpela laik na tingting long mi. ¹¹ Kam, meri husait mi laikim na yumi go long ples i stap longwe long taun na slip long sampela hap ples. ¹² Bai yumi kirap long moning taim tru na go long wain gaden na lukim ol wain i gat bel i stat long op o nogat na ol plaua bilong ol i op o nogat na ol liklik prut i kamap pinis long plaua i op pinis o nogat. Long dispela hap bai mi givim yu dispela laikim mi gat long yu. ¹³ Diwai mendrek i givim ol gutpela smel bilong em long dua hap mitupela i stap long en, i gat planti gutpela kain nupela na olpela prut i stap na mi lukautim long givim yu, man husait i laikim mi.