5 ¹ Mi kam pinis long gaden bilong mi, meri mi laikim tumas. Mi bungim wel sanda na lip i gat gutpela smel. Mi kaikai gutpela hani na dring wain na susu bilong mi pinis. ² Mi slip i stap, tasol bel bilong mi i no slip. Mi harim nois bilong man mi laikim tumas i paitim dua na i tok, "Opim dua long mi, mi laikim yu. Yu nogat doti olsem waitpela balus pisin. Wara bilong nait i kam daun na i wasim het bilong mi na i pulap long het gras bilong mi." ³ "Mi rausim longpela klos bilong mi, bai mi putim gen? ⁴ Mi wasim pinis lek bilong mi, bai mi mekim doti long en?" Tasol man mi laikim tumas i putim han na opim handel bilong dua na bel bilong mi i kirap long em. ⁵ Mi kirap long opim dua long man mi laikim tumas, long han na pinga bilong mi i gat wel sanda na i pas long handel bilong dua. ⁶ Mi opim dua long man mi laikim tumas, tasol em i go pinis. Bel bilong mi i nogut tru taim mi no harim em i toktok. Mi painim em tasol mi no lukim em. Mi singautim em tasol em i no bekim singaut bilong mi. ⁷ Ol wasman i lukim mi taim ol i raunim biktaun. Ol i paitim mi na bagarapim skin bilong mi na ol i kisim saket bilong mi. ⁸ Mi laik yupela i mas promis long mi, ol meri bilong Jerusalem, sapos yupela i lukim pren bilong mi, bai yupela i tok wanem long em? Mi bagarap pinis long em. ⁹ Yu naispela meri na yu winim olgeta meri, dispela man bilong yu em wanem kain man na yu laikim em tumas? Ating em i winim olgeta man bilong mipela na yu laik bai mipela i mekim promis olsem? ¹⁰ Pren bilong mi i strongpela na lait skin man na i winim pes bilong 10,000 man. ¹¹ Pes bilong en i lait olsem gol, gras bilong em i longpela na i blak tru olsem gras bilong blakpela pisin. ¹² Ai bilong en i lait tumas olsem gras bilong waitpela balus pisin i waswas pinis na i sanap arere long wara. ¹³ Gras long wasket bilong en i olsem gaden i pulap long ol lip i gat gutpela smel. Maus bilong em i olsem naispela plaua na olsem wel sanda i gat gutpela smel. ¹⁴ Em i putim gol paspas i gat ol liklik ston i dia tumas long han bilong en. Long bel bilong en, em i pasim bis ol i wokim long tit bilong elefan, ol i bilasim long blupela ston sapaia. ¹⁵ Lek bilong em i olsem tupela pos ol i wokim long waitpela ston na i sanap long gol tru. Em i olsem gutpela diwai sida i nambawan tru i stap long maunten bilong Lebanon. ¹⁶ Maus bilong em i swit tru. Man bilong mi em i kain man olsem na yupela pikinini meri bilong Jerusalem harim, mi laikim em tumas.