6 ¹ Olsem na bai yumi tok wanem? Bai yumi mekim sin yet na bai marimari i pulap moa yet? ² Em i no olsem. Yumi i dai pinis long sin, bilong wanem na bai yumi i stap yet long pasin bilong sin? ³ Yupela i no save olsem, ol man i baptais insait long Krais Jisas, em ol i baptais i go insait long dai bilong em? ⁴ Ol i planim yumi wantaim em, insait long baptais yumi dai. Dispela i kamap olsem Krais i kirap bek long dai long strong bilong Papa, olsem tasol bai yumi ken wokabaut long nupela laip. ⁵ Sapos yumi pas wantaim em long dai bilong em, bai yumi pas wantaim em tu long kirap bek bilong em. ⁶ Yumi save long dispela olsem, olpela man bilong yumi i dai wantaim em long diwai kros, olsem na dispela bodi bilong sin bai i bagarap olgeta. Dispela i kamap olsem bai yumi i no moa stap wok boi bilong sin. ⁷ Man husait i dai, tok i tok olsem, em i kamap stretpela olgeta na i nogat sin. ⁸ Tasol sapos yumi dai wantaim Krais, yumi bilip olsem bai yumi i stap laip tu wantaim em. ⁹ Yumi save olsem Krais i kirap bek long dai na em i no inap dai gen. dai i no moa bosim em. ¹⁰ Olsem na long dai, em i dai long sin na em i dai wanpela taim tasol. Olsem na dispela laip em i stap,em i bilong God. ¹¹ Olsem tasol, yupela tu i mas lukim yupela yet olsem yupela i dai pinis long sin, tasol yupela i stap laip long God insait long Krais Jisas. ¹² Olsem na noken larim sin i bosim dispela bodi bilong bagarap bai yupela i bihainim ol pasin mangal bilong em. ¹³ Noken givim ol hap bodi bilong yupela i go long sin, olsem ol samting bilong mekim wok bilong pasin i no stret. Tasol, yupela i mas givim yupela yet i go long God, olsem man i dai pinis na i stap laip gen na givim ol hap bilong bodi bilong yupela i go long God olsem ol samting bilong mekim wok bilong stretpela pasin. ¹⁴ Noken larim sin i bosim yupela. Long wanem, yupela i no i stap aninit long lo, tasol yupela i stap aninit long marimari. ¹⁵ Em olsem wanem? Bai yumi mekim sin, long wanem yumi i no stap aninit long lo, tasol aninit long marimari? Em i noken kamap olsem. ¹⁶ Yupela i no save olsem, long husait man yu givim yu yet long em olsem wok boi em yu mas harim tok bilong em? Dispela em i tru olsem bai yu stap wok boi bilong sin na em bai kisim yu i go long dai o bai yu stap wok boi bilong bihainim tok na em bai kisim yu i go long stretpela pasin. ¹⁷ Tasol, litimapim nem bilong God. Yupela i bin stap wokboi bilong sin, tasol yupela i bihainim tok long bel bilong yupela long rot bilong tok skul yupela i kisim. ¹⁸ Yupela i kamap fri long sin na yupela i kamap wokboi bilong stretpela pasin. ¹⁹ Mi toktok olsem man long wanem, yupela i nogat strong long laik bilong bodi. Yupela i givim ol hap bodi bilong yupela olsem wokboi bilong pasin doti na pasin nogut, long wankain pasin tasol, yupela i mas givim ol hap bodi bilong yupela olsem wokboi igo long stretpela pasin bilong kamap holi. ²⁰ Taim yupela i bin stap wok boi bilong sin, yupela i no bin stap wok boi bilong stretpela pasin. ²¹ Long dispela taim, yupela i kamapim wanem kaikai bilong ol pasin nau yupela i sem long en? Dispela pasin em i kamapim dai tasol. ²² Tasol nau yupela i kamap fri long sin na kamap wokboi bilong God, yupela i kamapim gutpela pasin bilong mekim yupela i kamap holi. Dispela em i kamapim laip i stap oltaim. ²³ Long wanem, pe bilong sin em dai, tasol presen bilong God em laip i stap gut oltaim insait long Krais Jisas, Bikpela bilong yumi.