12 ¹ Mi laik tok strong long yupela ol brata olsem, insait long marimari bilong God, yupela givim ol bodi bilong yupela olsem wanpela ofa, na em i holi na em i orait olgeta long ai bilong God. Dispela em i olsem wanpela gutpela wok yupela bai i mekim. ² Noken kamap wankain olsem ol lain bilong dispela graun, tasol kamap senis olgeta wantaim nupela tingting. Mekim olsem na bai yupela i ken save long wanem samting em i gutpela na em i orait, na em i stret olgeta i bihainim laik bilong God. ³ Long wanem, mi tok long dispela marimari God i bin givim mi, olsem na olgeta lain manmeri i stap namel long yupela i noken kisim tingting i antap moa, na winim mak bilong em i nap long tingting long en. Tasol, ol i mas i gat gutpela tingting olsem, God yet i givim i go long olgeta lain wanwan, em mak bilong bilip. ⁴ Long wanem, yumi i gat planti ol haphap bilong bodi insait long wanpela bodi tasol, olgeta haphap bilong bodi i no save mekim wankain wok. ⁵ Long wankain pasin, yumi olgeta i wanpela bodi tasol insait long Kraist, na yumi wanwan em yumi haphap bilong wanpela bodi na bilong narapela tu. ⁶ Yumi olgeta i gat wanwan presen God i bin givim yumi insait long marimari bilong em. Sapos wanpela man i gat presen bilong tok profet, orait em i ken mekim tok profet bihainim mak bilong bilip em i gat long en. ⁷ Sapos presen bilong wanpela i bilong mekim ol wok, orait, larim em i mekim wok.Sapos wanpela i gat presen bilong givim skul,orait em i mas givim skul. ⁸ Sapos wanpela i gat presen bilong givim toktok bilong strongim arapela, orait em i mas givim toktok bilong helpim ol arapela. Sapos wanpela i gat presen bilong givim samting long ol arapela, orait em i mas givim ol samting wantaim hamamas. Sapos wanpela i gat presen bilong kamap lida , orait em i mas lidim ol pipol gut. Sapos wanpela i gat presen bilong soim pasin bilong marimari, orait em i mas soim pasin bilong marimari wantaim bikpela hamamas. ⁹ Larim trupela pasin bilong laikim i mas kamap na rausim ol giaman pasin na holim gutpela pasin. ¹⁰ Laikim ol arapela lain, wankain olsem dispela laikim namel long ol brata husait i bilong wanpela femili. Olsem, pasin bilong luksave long arapela, na givim bikpela luksave long arapela brata. ¹¹ Noken surik long mekim gutpela pasin wantaim hamamas. Oltaim, bel i mas kirap long bihainim laik bilong Spirit, na long Bikpela, olgeta taim yu mas mekim wok bilong em. ¹² Hamamas moa yet long dispela strongpela tingting yupela i gat bilong bihain taim. Insait long taim bilong hevi, yupela i mas i stap wantaim bel isi, na stap tru insait long beten. ¹³ Helpim arapela ol bilip lain husait i gat hevi. Painim ol rot bilong helpim na lukautim ol. ¹⁴ Bel isi long ol lain i givim hevi long yupela, laikim ol na noken mekim tok bilong bagarapim ol. ¹⁵ Hamamas wantaim ol lain husait i hamamas na krai wantaim ol lain husait i krai. ¹⁶ Stap wantaim wanpela tingting wantaim ol arapela. Noken tingting long rot bilong apim yupela yet, tasol luksave long ol lain i nogat namba tu. Noken i gat tingting bilong apim yupela yet. ¹⁷ Noken bekim pasin nogut long husait i mekim pasin nogut long yupela. Mekim gutpela pasin long ai bilong olgeta lain. ¹⁸ Sapos yupela i nap long mekim, sapos em orait wantaim yu, traim long i stap bel isi wantaim olgeta lain manmeri. ¹⁹ Yupela i noken bekim rong bilong arapela, yupela gutpela lain bilong mi, tasol, larim belhat bilong God yet i ken kamap. Long wanem, Tok i stap pinis olsem, " Pasin bilong bekim ol rong, em i bilong Mi na Mi yet bai i givim pe nogut, 'Bikpela i tok olsem." ²⁰ Tasol, sapos birua bilong yupela i hangere, orait givim kaikai long em na sapos nek bilong em i drai, orait givim em wara long dring. Sapos yupela i mekim olsem,orait bai yupela i putim ol hotpela ston antap long het bilong ol. ²¹ Yupela i noken larim pasin nogut i daunim yupela, tasol, daunim pasin nogut long gutpela pasin bilong yupela.