99 ¹ God Yawe i sindaun long sia king antap long ol ensel na ol manmeri i pret na guria na graun tu i guria. ² Long Saion God Yawe em i bikpela na em i bosim olgeta manmeri long graun. ³ Em i holi na ol manmeri i mas litimapim biknem bilong em. ⁴ Strongpela king yu save laikim stretpela pasin. Yu bin mekim mipela i skelim stret pasin bilong ol arapela manmeri. Yu bin givim mipela gutpela na stretpela pasin long bihainim. ⁵ Litimapim nem bilong God Yawe em God bilong yumi na go klostu long em na lotu long em. Em i holi. ⁶ Moses na Aron i bin i stap pris bilong Bikpela na Samuel tu i bin wanpela bilong ol man i bin lotu long em. Ol i prea long God Yawe na em i harim prea bilong ol. ⁷ Em i stap long bikpela klaut na givim tok long ol. Na ol i bihainim olgeta lo em i givim long ol. ⁸ God Yawe, yu God bilong mipela, harim prea bilong mipela , yu God bilong lusim sin tasol yu save bekim rong. ⁹ Litimapim God Yawe, yu God bilong mipela na lotu long em long maunten bilong em, long wanem God Yawe em i holi.