97 ¹ God Yawe i bikpela, larim ples graun i amamas, larim ol planti nambis ples i mas amamas. ² Klaut na bikpela tudak i karamapim em. Stretpela pasin na pasin bilong mekim stretpela kot i as bilong sia king bilong em. ³ Paia i go pas long em na daunim ol birua bilong em long olgeta sait. ⁴ Strongpela lait bilong em i laitim dispela ples graun na ol ples graun lukim na guria. ⁵ Ol maunten i kamap malumalu olsem wara bilong kendol klostu long God Yawe, Bikpela bilong olgeta ples graun. ⁶ Ol skai i tokaut long stretpela pasin bilong em na olgeta kantri i lukim lait bilong em. ⁷ Olgeta lain husait i save lotu long ol piksa bilong ol samting bilong graun na brukim skru long ol god giaman bai i kisim bikpela sem. Yupela olgeta giaman god i mas brukim skru long em nau! ⁸ Saion harim na i amamas na taun bilong Juda i amamas long ol stretpela lo bilong yu, God Yawe. ⁹ Long wanem, yu God Yawe, i stap antap tru long olgeta ples graun. Yu stap antap tru long ol narapela god. ¹⁰ Yu husait i laikim God Yawe, les long pasin nogut! Em i lukatim laip bilong ol manmeri husait il mekim stretpela pasin na em kisim ol kamaut long han bilong ol nogut manmeri. ¹¹ Lait i kamap ples klia long ol stretpela manmeri na amamas i pulap tru long ol lain bilong tok tru. ¹² Amamas insait long God Yawe, yu stretpela manmeri na givim tenkyu taim yu tingim pasin holi bilong em.