95 ¹ O kam na yumi singsing i go long God Yawe. Yumi singsing wantaim amamas i go long strongpela ston, em man bilong kisim bek yumi. ² Yumi ken go insait long pes bilong em na tok tenkyu long en. Yumi singsing i go long em wantaim song bilong litimapim em. ³ Long wanem God Yawe em i bikpela God na tu, em i bikpela king antap moa long olgeta god. ⁴ Olgeta aninit bilong graun i stap long han bilong em na olgeta ples antap long ol maunten em bilong em. ⁵ Na solwara em i bilong em, long wanem em yet i bin mekim na han bilong em i kamapim drai graun. ⁶ O kam, yumi daunim het na lotu, yumi brukim skru long pes bilong God Yawe, man husat i kamapim yumi. ⁷ Bilong wanem Yawe em i God bilong yumi na yumi ol manmeri long gras bilong banis sipsip bilong em na yumi olsem sipsip long han bilong em, olsem sapos yu inap harim nek bilong em nau! ⁸ ''Noken strongim bel bilong yupela, wankain olsem long ples Meriba, o wankain olsem dei bilong Masa long ples drai, ⁹ we ol tumbuna papalain bilong yupela i bin traim mi, na putim mi long traim, bihain long ol i lukim olgeta wok mi bin mekim. ¹⁰ Long 40 yia olgeta, mi bin bel hevi long ol dispela lain manmeri na mi bin tok, 'Dispela em ol lain husait bel bilong ol i go raun nabaut, ol i no luksave long pasin bilong mi.' ¹¹ Em olsem na long bel hat bilong mi, mi bin tok olsem dispela ol lain bai i no inap go insait long ples malolo bilong mi.''