7 ¹ Yawe God bilong mi, mi stap insait long yu olsem ples hait bilong mi. Helpim mi long olgeta lain husait i ronim mi na kisim bek mi. ² Nogut bai ol i bagarapim mi olsem laion i kaikai man na brukim mi i go liklik tru we bai i nogat man i kisim bek mi. ³ Yawe God bilong mi, sapos mi mekim dispela na i gat asua long han bilong mi, ⁴ sapos mi mekim pasin nogut long man husait i stap wanbel wantaim mi, o mi no save na mi bagarapim ol birua bilong mi, orait harim tok bilong mi. ⁵ Orait larim ol birua bilong mi ronim laip bilong mi na holimpasim mi, larim em i krungutim laip bilong mi long graun na putim nem bilong mi i go long graun. ⁶ Kirap ,God Yawe, insait long belhat, sanap na pait strong long ol birua bilong mi, kirap long slip bilong yu long gutpela bilong mi na bringim ol stretpela lo bilong mi i go olsem mi bin tokim yu. ⁷ Ol kantri i bung na raunim yu olsem na yu mas kisim ples tru bilong yu antap long ol. ⁸ God Yawe i skelim olgeta manmeri, givim mi wanem em bilong mi, God Yawe, long wanem mi stretpela na nogat asua. God antap tru. ⁹ Larim ol pasin nogut bilong ol manmeri nogut i kam pinis olsem, tasol kirapim ol stretpela manmeri, stretpela God tru , yu save skelim ol bel na tingting bilong mipela. ¹⁰ Hap plang bilong mi i kam long God man husait i lukautim ol man bel bilong i stret tru. ¹¹ God em i stretpela jas na God husait i save belhat long ol pasin nogut bilong wanwan dei. ¹² Sapos wanpela man i no tanim bel, God bai sapim bainat bilong em na bai em i redim bunara bilong em long pait wantaim em. ¹³ God i redi long yusim ol samting bilong pait wantaim em na God i mekim paia long nus bilong spia bilong sutim em. ¹⁴ Tingting long wanpela man o meri i gat bel wantaim ol pasin nogut, husait i kamapim tingting long mekim ol kainkain trabel, husait i save kamapim ol giaman bilong bagarapim ol narapela. ¹⁵ Em i dikim hul na rausim ol graun bilong insait i kam autsait na bihain em i pundaun i go insait long dispela hul em yet i bin mekim. ¹⁶ Dispela bagarap tingting bilong em yet i kambek long het bilong em na pasin nogut bilong em yet i tanim na bagarapim laip bilong em. ¹⁷ Bai mi tok tenkiu i go long God Yawe long stretpela pasin bilong em na bai mi singim song bilong givim bikneim i go long God Yawe em God antap tru.