60 ¹ God, yu rausim mipela i go pinis na yu brukim ol samting bilong mipela, yu brukim pinis dispela banis yu banisim mipela, yu i bin belhat long mipela pinis, yu mekim mipela kamap nupela gen. ² Yu mekim dispela graun i guria na bruk i go wan wan, yu no kamapim gen dispela graun em i bruk i go longpela na em i guria. ³ Yu mekim na ol manmeri bilong yu i lukim hatpela samting, yu mekim mipela i dring wain na mipela i no wokabaut stret. ⁴ Ol manmeri husait i mekim gut long yu, yu putim laplap long putim antap na soim ol lain husait i save kisim bunara i go. Selah ⁵ Olsem na husait manmeri yu save laikim, bai yu helpim ol, helpim mipela long hansut bilong yu na harim mipela. ⁶ God em i toktok long holi pasin bilong em yet, "Bai mi amamas na skelim ol Sekem na putim i go daun long ples daun bilong Sukot. ⁷ Gileat em bilong mi, Manase em bilong mi na Efraim em i olsem hat kapa bilong mi na Juda em i olsem wokabaut stik bilong mi. ⁸ Moap em i olsem ples waswas bilong mi na Idom em i olsem ples bilong putim su. Na bai mi singaut strong na pait wantaim ol Filistia na winim dispela pait." ⁹ Husait bai kisim mi i go insait long strongpela biktaun? Na husait bai kisim mi i go long Idom? ¹⁰ Tasol yu, God, bai yu les long mipela? Yu no i go wantaim ol soldia bilong mi long pait. ¹¹ Helpim bilong yu i mas i stap wantaim mipela long ol birua bilong mipela, helpim bilong man i nogat strong. ¹² Long helpim bilong God, mipela bai i winim dispela bikpela pait na em bai i krunkutim ol birua bilong mipela i go daun.