58 ¹ Yupela ol lida i save tok tru ah? Yupela ol man bilong skelim kot i save kotim ol man wantaim stretpela pasin? ² Nogat tru, yupela i save kamapim pasin nogut long bel bilong yupela na yupela i save mekim pasin nogut wantaim han bilong yupela long olgeta hap long graun. ³ Ol sin man i go longwe long God taim ol i kamap long bel bilong mama na taim mama i karim ol, tok giaman bilong ol i mekim ol i go longwe long God. ⁴ Tok ol i mekim i nogut tru wankain olsem poisin bilong snek, ol i les long harim gutpela tok wankain olsem yau pas snek i no inap harim na ⁵ ol i no putim yau long harim gut ol man bilong mekim musik, maski ol i mekim gutpela musik. ⁶ Brukim tit bilong ol i stap insait long maus bilong ol, God, brukim ol bikpela tit bilong ol yangpela laion, God Yawe. ⁷ Larim ol i ken tanim i go olsem wara i save ron i go na taim ol i sutim spia, larim ol i ken stap olsem spia i nogat sap bilong en. ⁸ Larim ol i olsem wara i save drai na pinis, em bai wankain olsem pikinini i kamap nupela na i no lukim lait yet. ⁹ God bai bagarapim ol sin man wan tu tasol, i no wankain olsem gras ol i putim aninit long sospen long kukim wantaim paia, tasol em bai rausim ol wantaim strongpela win i rausim i go wan tu tasol. Ol gras i no kuk yet na ol gras i kuk pinis i wankain tasol. ¹⁰ Ol stretpela man bai i amamas taim ol i lukim God i mekim save long bekim pasin nogut ol i bin mekim, em bai wasim lek bilong em wantaim blut bilong ol man nogut, ¹¹ olsem na ol man bai i tok, "tru tumas, i gat presen bilong ol stretpela man, tru tumas, i gat God i stap long kotim olgeta man long graun."